استانادا سيريا ماسەلەسى بويىنشا 3-ءشى كەلىسسوز وتەدى

سيريا بويىنشا استانا پروتسەسىنىڭ شەڭبەرىندەگى جوعارى دەڭگەيدەگى كەزەكتى حالىقارالىق كەزدەسۋ 2017 جىلعى 14-15 ناۋرىزدا قازاقستاننىڭ استاناسىندا وتەدى, دەپ حابارلايدى قر سىرتقى ىستەر مينيسترلىگىنىڭ ءباسپاسوز قىزمەتى. كەلىسسوزدەرگە رەسەي, تۇركيا جانە يراننىڭ جوعارى لاۋازىمدى دەلەگاتسيالارى قاتىسادى. بۇۇ, اقش جانە يوردانيا وكىلدەرىنە شاقىرۋلار جولدانۋدا. كەپىلدىك بەرۋشى مەملەكەتتەر تاراپىنان سيريا ۇكىمەتى جانە قارۋلى وپپوزيتسياسى دەلەگاتسيالارىنىڭ كەزدەسۋگە قاتىسۋلارى بويىنشا راستاۋلارى كۇتىلۋدە. 14 ناۋرىزعا الدىن الا كونسۋلتاتسيالار جوسپارلانعان, ال 15 ناۋرىزعا جالپى وتىرىس بەلگىلەنگەن. قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ تولىق قولداۋىمەن جانە تىكەلەي اتسالىسۋىمەن باستالعان استانا پروتسەسىنىڭ اياسىندا 2017 جىلعى 23-24 قاڭتاردا جانە 15-16 اقپاندا استانادا سيريا بويىنشا جوعارى دەڭگەيدەگى حالىقارالىق كەزدەسۋدىڭ ەكى راۋندى, سونداي-اق 6 اقپاندا ساراپشىلاردىڭ تەحنيكالىق كەزدەسۋى ءوتتى. بۇل كەزدەسۋلەردىڭ نەگىزگى ناتيجەسى بۇۇ قاۋىپسىزدىك كەڭەسىنىڭ 2254 (2015) قارارىنا سايكەس تاراپتارعا جەنەۆا پروتسەسىنىڭ اياسىندا كۇن ءتارتىبىنىڭ ساياسي ماسەلەلەرىن تالقىلاۋعا كوشۋ مۇمكىندىگىن بەرگەن سيرياداعى سوعىس امالدارىن توقتاتۋ رەجيمىن باقىلاۋ بويىنشا بىرلەسكەن جەدەل توپ تۋرالى ەرەجەنى كەلىسۋ بولىپ تابىلدى. قازاقستان سيرياداعى جاعدايدى رەتتەۋ بويىنشا حالىقارالىق كۇش-جىگەرلەرگە ءوزىنىڭ بارلىق ۇلەسىن قوسۋدى جانە سيريانىڭ ىشكى قاقتىعىسىن ساياسي تۇردە شەشۋ جولدارىن ىزدەۋدى ءارى قاراي جالعاستىرۋعا دايىن.