وبلىستىق تۋريزم جانە سىرتقى بايلانىستار باسقارماسىنىڭ باسشىسى جاسۇلان سارسەباەۆتىڭ ايتۋىنشا, وسى جىلدىڭ العاشقى ەكى ايىندا وبلىس تۇرعىندارى 16 مىڭعا جۋىق بيلەت (9 240 بيلەتتى پوشتا ارقىلى, 6 747 بيلەتتى ينتەرنەت ارقىلى) ساتىپ العان. -بۇل كورسەتكىش بويىنشا وبلىسىمىز رەسپۋبليكادا كوش باستاپ تۇر. كورمە بيلەتتەرى «قازپوشتانىڭ» وبلىستاعى 67 بولىمشەسىندە جانە ينتەرنەت ارقىلى ساۋدالانۋدا. جۋىق ارادا وسكەمەندەگى «يمپەراتور» ساۋدا ۇيىندە ەكسپو-نىڭ رەسمي بيلەت كاسساسى اشىلادى, - دەيدى باسقارما باسشىسى.
جاقىندا وسكەمەندە «ەكسپو» كورمەسىنىڭ جايىن تالقىلاعان جيىندا ءوڭىر باسشىسى دانيال احمەتوۆ جەرگىلىكتى قۇزىرلى ورگاندارعا ەلورداعا ماڭىزدى شارانى تاماشالاۋعا باراتىن وبلىس تۇرعىندارىنا جايلى جاعداي جاساۋدى تاپسىرعان-دى. – بۇل ماسەلەگە ەرەكشە كوڭىل بولگەن ءجون. ماسەلەن, اۋدانداردان استاناعا باراتىن ادامداردىڭ جول مارشرۋتىن ويلاستىرىپ, جوسپار جاساۋ قاجەت. ەلورداعا بارىپ, قوناق ۇيلەرمەن كەلىسىم جاساڭىزدار. ءبىز ءۇشىن ونى ەشكىم ىستەمەيدى. ەڭ باستىسى, كورمەگە باراتىن وبلىس تۇرعىندارىنا قالىپتى جاعداي جاسالىپ, قاۋىپسىزدىگى قامتاماسىز ەتىلۋى كەرەك, – دەدى وبلىس اكىمى. وبلىستىق ىشكى ساياسات باسقارماسىنىڭ باسشىسى ەرجان سەمبينوۆتىڭ ايتۋىنشا, وڭىردە كورمەنى اقپاراتتاندىرۋ باعىتىندا بىرقاتار شارالار قولعا الىنعان. ارنايى مەديا-جوسپار ازىرلەنگەن. قازىرگى ۋاقىتتا وسكەمەندىك ستۋدەنتتەردەن 138 ەرىكتى جاساقتالىپ, استانادا وتەتىن كورمە كەزىندە شەت ەلدىك قوناقتارعا قىزمەت كورسەتۋگە ازىرلەنىپ جاتقان كورىنەدى.
ازامات قاسىم,
«ەگەمەن قازاقستان» وسكەمەن
