چەمپيون بىرىنشىلىكتى جەڭىلىسپەن باستادى

فۋتبولدان قازاقستاننىڭ 26-شى چەمپيوناتى سەنساتسيامەن باستالدى دەسە دە بولادى. سوڭعى جىلدارى ايدارىنان جەل ەسىپ جۇرگەن «استانا» وڭتۇستىك ءوڭىرى­نە بارىپ, شىمكەنتتىڭ «وردا­باسى» كومانداسىنان 0:3 ەسەبىمەن وڭباي جەڭىلدى. مۇنىڭ الدىندا ەلوردالىق كلۋب ەلىمىزدىڭ سۋپەر­كۋبوگى ءۇشىن بولعان سىندا «قايرات­تىڭ» الدىندا تىزە بۇككەن ەدى. ەسىن جيا الماعان ەكەن... شىنتۋايتىنا كەلگەندە, بۇل ماتچتا «استانانىڭ» باسىمدىعى بايقالعان. بىرنەشە مارتە قاقپا الدىندا قاۋىپتى ساتتەر تۋعىزدى دا. بىراق, جەمە-جەمگە كەلگەندە, ارەكەتىنىڭ ءبىر دە ءبىرىن گولعا اينالدىرا الماي, السىزدىك تانىتتى. ءسويتىپ, ماردان تولەبەك (15-مينۋت) پەن ازات نۇرعاليەۆ (75-ءشى) ءجا­نە ابۋلاي دياكاتە (88-ءشى) سوق­قان جاۋاپسىز ءۇش گول «وردا­باسى» كلۋبىنا ءىرى جەڭىس اكەلدى. ماۋسىماشار ويىندا «توبىل­دىڭ» دا ايى وڭىنان تۋدى. قوستا­نايلىقتار ءوز الاڭىندا «اتى­راۋدى» 3:0 ەسەبىمەن ويسىراتا ۇتىپ, بيىلعى الامانعا جان-جاقتى دايىن­دىقپەن كەلگەنىن اڭعارتتى. بۇل ويىنداعى ءۇش گولدىڭ دا اۆتورى الەكسەي ششەتكين بولعانىن ايتا كەتۋ كەرەك. دەمەك, بۇل – بيىل­عى چەم­پيوناتتاعى تۇڭعىش حەت-تريك. العاشقى تۋردا الماتىنىڭ «قايراتى» دا ءۇش ۇپاي ولجالادى. «اقتوبەمەن» ارادا اسا تارتىستى وتكەن ويىندا الاڭ يەلەرى جەرار گوۋ سوققان جالعىز دوپتىڭ ارقا­سىندا جەڭىسكە جەتتى. وتكەن جىلعى چەمپيوناتتىڭ قولا جۇلدەگەرى «ەرتىس» پاۆلو­دار­دا «اقجايىق» فۋتبول كلۋ­بىن قابىلداعان بولاتىن. ەكىنشى تايم باستالماي جاتىپ «ەرتىستىڭ» شابۋىلشىسى اسلان داراباەۆ ەسەپ اشتى. وسى ەسەپ كەزدەسۋدىڭ 84-ءشى مينۋتىنا دەيىن وزگەرمەي تۇرعان ەدى. الايدا, فرەددي كورو­نەل ورتيز الىستان تەۋىپ, تۋرا «توعىزدىقتان» دوپ كىرگىزدى دە, تارازى باسىن تەڭەستىرىپ كەتتى. ارادا ءتورت مينۋت وتكەندە قوناق­تار­دىڭ قورعاۋشىسى ايىپ الا­ڭىندا نۇربول جۇماسقاليەۆتى شالىپ جىعىپ, تورەشى پەنالتي بەلگىلەگەن بولاتىن. ون ءبىر مەترلىك ايىپ دوبىن ورىنداۋعا كەلگەندە ستەفان جيۆكوۆيچ مەرگەندىك تانىتتى. ەسەپ – 2:1. «قايسار» ءوز الاڭىندا «وقجەت­پەستەن» 1:0 ەسەبىمەن باسىم تۇسسە, «تاراز» بەن «شاحتەر» اراسىنداعى ماتچ 0:0 ەسەبىمەن تەڭ اياقتالدى. پرەمەر-ليگانىڭ ەكىنشى تۋرى 12 ناۋرىزدا وتەدى. بۇل كۇنى «قاي­سار» – «تاراز», «قايرات» – «وقجەت­پەس», «توبىل» – «اقتوبە», «وردا­باسى» – «اتىراۋ», «ەرتىس» – «استانا» جانە «اقجايىق» – «شاح­تەر» كوماندالارى جاسىل الاڭ ۇستىندە كۇش سىناسىپ, ءوزارا كىم مىق­تىنى انىقتايدى. قايرات ءابىلدينوۆ, «ەگەمەن قازاقستان»