بۇلاننىڭ مۇنىسى نەسى؟

التى اي قىسى بار التايدا ءتۇز تاعىلارى مەن ادامدار اراسىنداعى مۇنداي كەزدويساق «كەزدەسۋلەر» ءجيى بولماسا دا, ارا-تۇرا بولىپ تۇرادى. بۇل جولعى «كەزدەسۋ» زىريان اۋدانىنداعى پۋتينتسەۆ اۋىلىنىڭ ماڭىندا بولدى. بىرنەشە كولىكپەن قازداي ءتىزىلىپ جۇيتكىپ كەلە جاتقان جولاۋشىلاردى جول ۇستىندە بۇلاننىڭ ۇرعاشىسى قارسى الىپ, «توقتاتقان» كورىنەدى. ءتۇز تاعىسى كولىكتەردەن مۇلدە سەسكەنبەگەندىكتەن, جولاۋشىلار وزدىگىنەن توقتاۋعا ءماجبۇر بولىپتى. – بىرنەشە كولىكپەن دەمالىس­تان قايتىپ كەلە جاتقان ەدىك. جول ۇستىندە تۇرعان الىپ جانۋار ەرىكسىز نازارىمىزدى وزىنە اۋداردى. جول بولعاندا, قۇددى ماي قىزمەتكەرلەرىندەي جولدىڭ تۋرا ورتاسىنا تۇرىپ الىپتى. ءتۇز تاعىسىن تابيعات اياسىندا العاش رەت كورۋىم. ءۇيدىڭ ۇلكەندىگىندەي تىرشىلىك يەسىنە جاقىنداۋعا ەش­كىمنىڭ باتىلى بارمادى. ارينە, بۇل كورىنىستەن العان اسەرىمىز كەرەمەت, بىراق قورىققانىمىزدى دا جاسىرا المايمىز, – دەيدى بۇل جايتقا كۋا بولعان زىريان اۋدانىنىڭ تۇرعىنى رومان پوحيلەنكو. زىرياندىقتار بۇلاننىڭ بۇل ءجۇرىسىن سان-ساققا جۇگىرتىپ وتىر. «زىريان ورمان شارۋاشىلىعى» مەكەمەسىنىڭ قىزمەتكەرى, اڭشى ۆاسيلي گولوۆتسوۆ اۋدان تۇرعىن­دارىنىڭ «ءتۇز تاعىسى قاردىڭ قالىڭ­دىعىنان اشىعىپ, ادامداردان جاردەم كۇتىپ ءجۇر», دەگەن پىكىرىنە كەلىسپەيتىندىگىن ءبىلدىرىپ, كوكتەم مەزگىلىندە بۇلان­نىڭ بۇلاي ءجۇرۋى قالىپتى جاعداي ەكەندىگىن, وعان الاڭداۋدىڭ قاجەتى جوقتىعىن ايتتى. – قىس ۋاعىندا بۇلاندار تاۋ بەتكەيىندە ۇيىرىمەن جايىلادى. ازىعى مول جەرلەردە جۇرەدى. ال جازىققا ولار تەك كوكتەم مەزگى­لىن­دە قاردىڭ كوبەسى سوگىلگەن ۋاقىت­تا تۇسەدى, – دەيدى اڭشى. ءتۇز تاعىلارىنىڭ مىنەزىن بەس ساۋساعىنداي بىلەتىن اڭشى دە- م­الۋ­شىلاردىڭ بۇلانعا جاقىن­داماعانىنىڭ دۇرىس بولعاندىعىن, جاقىنداسا, جازىم قىلۋى ابدەن مۇمكىن ەكەندىگىن جاسىرمادى. – بۇلانمەن ويناۋعا بولمايدى. بۇل – كۇشتى عانا ەمەس, تاۋداي ءىرى جانۋار. اسىرەسە بۇلاننىڭ ۇرعاشىلارى ىزاقور كەلەدى. ادامداردى اعاش باسىنا ورمەلەتىپ, مىقتى دەگەن تراكتوردىڭ ءوزىن زاقىمداعان جاع­دايلارعا تالاي مارتە كۋا بولعانبىز, – دەگەن ۆاسيلي گولوۆ­تسوۆ كوكتەمنىڭ كوكوزەگىندە بۇلاندى كەزدەستىرۋ ۇيرەنشىكتى دۇنيەگە اينالعانىن, ولاردىڭ بۇل جەرگە جىل سايىن كەلەتىندىكتەرىن تىلگە تيەك ەتتى. ابىروي بولعاندا, زارداپ شەككەن ەشكىم جوق. بۇلان دا, بۇل اڭدى كولىكتەرىنە تىعىلىپ تاماشالاعان تۇرعىندار دا ءدىن امان. ءتۇز تاعىسى تەك ءبىر كولىككە عانا تۇياعىن تيگىزىپ, قالىڭ ور­مانعا ءسىڭىپ جوعالىپتى. ازامات قاسىم, «ەگەمەن قازاقستان» شىعىس قازاقستان وبلىسى