ەلباسى ءھام ەل زيالىلارى

ساۋساقتارىمىز پەرنەتاقتانىڭ ۇستىندە جورعالاۋدى ۇيرەنگەننەن باستاپ ءبىز اق پاراققا ءوز قولىمىزبەن جازۋ جازبايتىن بولدىق. اسىرەسە, سوڭعى ون جىلدا اق پاراقتى كوك سيامەن ورنەكتەپ, «التىننان ارداقتى, كۇمىستەن سالماقتى» دەپ باستالىپ, كىسىنىڭ قادىر-قاسيەتىن سەزىندىرەتىن حات جازۋ مۇلدە قالىپ كەتتى. سودان با, الدە ەكى بىردەي زيالى تۇلعاعا ەلباسىنىڭ ءوز قولىمەن جازعانى اسەر ەتتى مە, «قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى» مەملەكەتتىك مەكەمەسىنىڭ ينتەراكتيۆتى ءبىلىم بەرۋ ورتالىعىندا تۇرعان مىنا ەكى حات كوزىمە سونداي ىستىق كورىندى. «اسا قادىرلى اقسەلەۋ!» دەپ باستالاتىن العاشقى حات اقسەلەۋ سەيدىمبەكتىڭ الپىس جىلدىق مەرەيتويىندا, 2002 جىلى جازىلىپتى. «سوناۋ جاس كەزىمىزدەن ءبىر-ءبىرىمىزدى ءبىلىپ, سىيلاسىپ كەلەمىز. سەنىڭ «لەنينشىل جاستا» كور­رەسپوندەنت كەزىڭ, مەنىڭ مەتال­لۋرگياداعى (تەمىرتاۋدا) العاشقى قادامدارىم ەسىمە تۇسەدى. زىمىراپ ۋاقىت ءوتتى. سەن دە الپىستىڭ اسۋىنا شىقتىڭ. قۇتتى بولسىن. عۇمىرلى بول. ەڭبەگىڭدى ەلىڭنەن اياما», دەپتى ەلباسى. «ۇلتجاندىلىعىڭا, ەلىڭە, جەرىڭە دەگەن ۇلكەن ءجۇ­رەگىڭە ريزامىن زامانداسىم!». «تورقالى تويىڭنىڭ ءتورىن­دەمىن, سىيلايمىن, سەندەي ازا­ماتتار قازاقتا كوپ بولسا ەكەن دەپ ارماندايمىن», دەيتىن سويلەمدەرى ارقىلى جازۋشىنى قالاي باعالايتىنىن جەتكىزىپتى. ال ءازىلحان نۇرشايىقوۆقا ارناپ جازعان حاتىندا 1991 جىلعى تۇڭعىش پرەزيدەنت سايلاۋىنان كەيىنگى ەكەۋى­نىڭ كەزدەسۋىنەن باستاپ جازۋشى­نىڭ شىعارمالارى تۋرالى كوز­قاراستارى ورنەكتەلگەن. «5/1. بولعان كەزدەسۋدە ماعان «ماحاببات, قىزىق مول جىل­داردى», «حاليمانى» سىي­عا تارتتىڭىز. ءبىرىنشىسىن بۇرىن وقىپ ەدىم. ەكىنشىسىن قولىما العان بويدا باس كوتەرمەي وقىپ شىقتىم. ءتالىم-تاعىلىمى مول كەرەمەت شىعارما ەكەن. ءدال قازىرگى زاماندا جاستار كوبىرەك وقيتىن حيكايا. ءسىزدىڭ شىعارمالارىڭىز, ويلارىڭىز – ەل قازىناسى. ءومى­رىڭىز – ۇلگى! امان ساۋ بولىڭىز, ءاز اعا!» – دەلىنگەن 6.01.2003 جىلى ەلباسى جازعان حاتتا. ايگۇل سەيىلوۆا, «ەگەمەن قازاقستان» سۋرەتتەردى تۇسىرگەن ورىنباي بالمۇرات, «ەگەمەن قازاقستان»