اسەمدىك الەمىنە شاقىرادى

حالىقارالىق ايەلدەر مەرەكەسى قارساڭىندا وسكەمەندەگى مۋ­زەي-قورىقتىڭ «التاي» گالەرەياسىندا سۋرەتشى توعجان وسپا­نوۆانىڭ «ايەل كوزقاراسى» اتتى دەربەس كورمەسى اشىلدى. «مۋزەي كەڭىستىگىندەگى جاڭا ەسىمدەر» اتتى ۇزاق مەر­زىمدى جوبا اياسىندا ۇيىم­داستىرىلعان كورمەگە سۋ­رەت­شىنىڭ 50-دەن استام تۋىندىلارى قويىلعان. قىلقالام شەبەرىنىڭ «اعا­راڭ­داعان جەلكەن», «تاۋ ەتەگىن­دە», «كوفە حانشايىمى», «جۇل­دىزدى اسپان», «نوسەر», «بەلگى پاننوسى» سىندى كارتينالارىنا كوز سالعان كورەرمەن كوگىلدىر كوك­تەمنىڭ لەبىن سەزىنىپ, اسەمدىك الەمىنە تەرەڭىنەن بويلايدى. توعجان وسپانوۆانىڭ نەگىزگى ماماندىعى – مۇعالىم. زاڭ­گەرلىك ءبىلىمى دە بار. سۋرەت سالۋعا مەكتەپ قابىرعاسىندا ءجۇر­گەننەن اۋەس بولعانىن ايتقان سۋرەتشى وزگە ماماندىقتى تاڭداسا دا, قىلقالامعا دەگەن قۇشتارلىعىنىڭ ەشۋاقىتتا كەمىمەگەنىن, بالالارى ەسەيىپ, ەر جەتە باستاعان سوڭ سۇيىكتى كاسىبىنە قايتادان دەن قويعانىن تىلگە تيەك ەتتى. – بۇگىنگى كورمەگە قويىلعان ەڭبەكتەرىمنىڭ بارلىعىندا مەنىڭ ومىرگە دەگەن كوزقاراسىم, ويلارىم مەن سەزىمدەرىم بار. ءبىر جاعىنان ءوزىم ءبىرتۇرلى جالاڭاشتانىپ قالعانداي كۇيدە تۇرمىن. ويتكەنى, ارالاساتىن ورتام – جاقىندارىم مەن ارىپتەستەرىمنىڭ اراسىندا مەنىڭ سۋرەت سالاتىنىمدى بىلمەيتىندەر دە بار. بۇل كورمە ولار ءۇشىن ناعىز جاڭالىق بولدى, – دەيدى سۋرەتشى. ازامات قاسىم, «ەگەمەن قازاقستان» وسكەمەن