«بارسەلونا» پسج-عا التى گول سالىپ, شيرەك فينالعا جولداما الدى (ۆيدەو)

چەمپيوندار ليگاسى 1/8 فينالىنىڭ ەكىنشى ماتچىندا «بارسەلونا» ءوز الاڭىندا «پاري سەن جەرمەن» كلۋبىن 6:1 ەسەبىمەن ۇتىپ, شيرەك فينالعا جولداما الدى. ويىن باستالا سالا شابۋىلعا ۇمتىلعان الاڭ يەلەرى 3-مينۋتتا-اق سۋارەستىڭ كومەگىمەن ەسەپ اشىپ ۇلگەردى. قارقىندارىن ۇدەتە تۇسكەن كاتالوندىقتار العاشقى تايمنىڭ سوڭىنا تامان پاريجدىكتەردى تاعى ءبىر مارتە قاپى قالدىردى. بۇل رەتتە اندرەس ينەستانىڭ شەبەرلىگىنىڭ ارقاسىندا لەۆەن كۋرزاۆا ءوز قاقپاسىنا گول سوعىپ الدى. ال قوناقتار باستاپقى تايمدا ايتارلىقتاي قارسىلىق تانىتا المادى. لۋكاس موۋرانىڭ الىستان باعىتتاعان سوققىسىنان بولەك, جارىتىپ ەشنارسە ىستەي قويمادى. ماتچتىڭ ەكىنشى تايمىن پاريجدىكتەر وزگەشە كۇيدە باستادى. اياقتارىنا دوپ تيە سالىسىمەن, بىردەن تەر شتەگەننىڭ قاقپاسىنا قاراي ۇمتىلدى. دەگەنمەن, نەمىس قاقپاشىسىنىڭ جولى بولىپ, قاۋىپتىڭ بەتىن قايتارا ءبىلدى. ال كەزەكتى ساتتەردىڭ بىرىندە ءوز ايىپ الاڭىندا نەيمارعا قارسى ويىن ءتارتىبى بۇزىلعانى ءۇشىن پەنالتي بەلگىلەندى. مۇنداي شەشىم قوسىمشا تورەشىنىڭ ايتۋىمەن قابىلداندى. ال مەسسي وزىنە بەرىلگەن مۇمكىندىكتى جىبەرە قويمادى. ءوز كەزەگىندە قوناقتار دا قاراپ قالمادى. الاڭعا انحەل دي ماريا شىعىپ, پسج-نىڭ ويىنىنا قان جۇرگەندەي بولدى. 62-مينۋتتا ايىپ دوبىنان اسىرىلعان دوپقا توماس مەنە ءبىرىنشى بولىپ جەتىپ, كاۆانيگە ىڭعايلاپ بەردى. ۋرۋگۆايلىق شابۋىلشى بۇل تۇستا جويقىن سوققىسىمەن ءوز ۇجىمىنىڭ العاشقى گولىن سالدى. وسىدان كەيىن لۋيس ەنريكە شاكىرتتەرىنىڭ قارقىنى باسەڭدەپ, سۇرەڭسىز ويىن ءوربىدى. دەگەنمەن, پاريجدىكتەر ەكىنشى گولىن دا سالاتىن كەزدەرى بولعان, بىراق انحەل دي ماريا, ەدينسون كاۆاني سىندى بىلىكتى ويىنشىلار قاقپاشى تەر شتەگەنمەن جەكە شىققانمەن, دىتتەگەن ماقساتتارىنا جەتە المادى. نەگىزگى ۋاقىتتىڭ اياقتالۋىنا ەكى مينۋت قالعاندا نەيمار ايىپ دوبىن ءساتتى ورىنداپ, كومانداسىنا دەم بەردى. وسىدان كەيىن كامبەك بولاتىنىنا كوپشىلىك كۇمانمەن قاراعان ەدى. 91-مينۋتتا سۋارەسكە قارسى ويىن ءتارتىبى بۇزىلعانى ءۇشىن پەنالتي بەلگىلەنىپ, ونى نەيمار ءساتتى ورىندادى. ءدال وسى گولدان كەيىن قوس كوماندا ءۇشىن ناعىز سىن ساعاتى ورنادى. ءبىرى ءوز قاقپاسىن كەزەكتى گولدان امان الىپ قالۋ كەرەك بولسا, ەكىنشىسى سالۋ كەرەك بولدى. وسى ۋاقىتتا نەيمار بار جاۋاپكەرشىلىكتى ءوز موينىنا الىپ, سوڭعى سەكۋندتتاردا ايىپ الاڭىنا دوپتى اۋەلەتە تاستادى. بۇل رەتتە الاڭعا تىڭنان قوسىلعان سەرحي روبەرتو جەڭىستى گولدى سوعىپ, "بارسەلونانىڭ" كەلەسى كەزەڭگە وتۋىنە ۇلكەن سەپتىگىن تيگىزدى. ايتا كەتەيىك, كاتالوندىقتار العاشقى ويىندا پسج-دان 0:4 ەسەبىمەن كۇيرەي  جەڭىلگەن بولاتىن. سونداي-اق, چەمپيوندار ليگاسىنىڭ تاريحىندا ءدال وسىنداي ءىرى ەسەپپەن ەسە جىبەرە تۇرىپ, كەلەسى كەزەڭگە جولداما العان كوماندا بولعان ەمەس. «بارسەلونا» فۋتبول تاريحىن تاعى ءبىر مارتە جاڭارتتى دەۋگە تولىقتاي نەگىز بار.