سەمەيدە سۋعا كەتكەن بالانى ىزدەستىرۋ جۇمىستارى جالعاسىپ جاتىر

بۇل تۋرالى شىعىس قازاقستان وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى حابارلادى. قۇتقارۋشىلار وتكەن جەكسەنبى كۇنى مۇزدىڭ جارىلۋىنان سۋعا كەتكەن 10 جاستاعى بالانى بۇگىن مىنە, ءۇشىنشى كۇن بويى ىزدەستىرىپ جاتىر. سۋدىڭ اعىنى كەي جەرلەردە سەكۋندىنا 2 مەترگە جەتكەندىكتەن سۇڭگۋىرلەردىڭ سۋ استىنا ءتۇسۋى مۇمكىن بولماي وتىر. سوندىقتان تەرەڭدىگى 3 مەتر اۋماقتى قامتيتىن بەينەكامەرانى پايدالانىپ جاتقان كورىنەدى. سۋ اعىنى باياۋ جەرلەردە قۇتقارۋشىلار سۋ استىنا ءتۇسىپ, ىزدەستىرۋ جۇمىستارىن جۇرگىزىپ جاتىر. ولار ءۇش كۇن ىشىندە 20 مەترگە جۋىق مۇزدى ارشىپتى. قازىرگى ۋاقىتتا قۇتقارۋشىلار وزەن اعىسىمەن 2 شاقىرىمعا جۋىق جەردى ءجۇرىپ ءوتىپتى. ىزدەستىرۋ جۇمىستارىنا شىعىس وڭىرلىك اەروۇتقىر جەدەل قۇتقارۋ جاساعى مەن سەمەي قالالىق توتەنشە جاعدايلار باسقارماسىنىڭ 8 قىزمەتكەرى جانە 9 ەرىكتى جۇمىلدىرىلعان. ەسكە سالا كەتەيىك, قايعىلى وقيعا 5 ناۋرىز كۇنى ەرتىس وزەنىندە ورىن الدى. مۇز ۇستىندە ويناپ جۇرگەن ەكى بالانىڭ ءبىرى جۇقا مۇزدىڭ جارىلۋىنان سۋعا باتىپ كەتكەن بولاتىن. ازامات قاسىم, «ەگەمەن قازاقستان» شىعىس قازاقستان وبلىسى  سۋرەت شقو توتەنشە جاعدايلار دەپارتامەنتىنىڭ ءباسپاسوز قىزمەتىنەن الىندى