ەڭبەگىنىڭ زەينەتى – 15 مينۋتتا!..

ەرتە مە, كەش پە... مينيستر دە, مۇعالىم دە, ءجاي شارۋا ادامى مەن تانىمال بيزنەس يەسى دە, اتاعى دۇركىرەگەن ونەر ادامى مەن مادەنيەت قايراتكەرى دە وسى عيماراتتىڭ بوساعاسىنان اتتايتىن حالىقتىق ءداستۇر بار. ەڭبەگىنىڭ زەينەتىن كورۋگە قۇقىلى ءاربىر قازاقستان ازاماتى باس سۇعاتىن بۇل مەكەمە – مەملەكەتتىك زەينەتاقى تولەۋ ورتالىعى دەپ اتالادى. الماتى قالاسىنىڭ اۋەزوۆ اۋدانىنداعى وسىنداي ورتالىق ءدال بۇگىن قالا اۋماعىنداعى ەڭ كوپ سانالاتىن 46 مىڭ ادامعا اپتانىڭ 6-ى كۇنى قالتقىسىز قىزمەت كورسەتىپ كەلەدى. حالىقارالىق ايەلدەر مەرەكەسى قارساڭىندا ۇجىم قۇرامىن نەگىزىنەن 37 قىز-كەلىنشەك قۇرايتىن مەكەمەنىڭ – اۋەزوۆ اۋداندىق مەملەكەتتىك زەينەتاقى تولەۋ ورتالىعىنىڭ باسشىسى ءاليا ماقۇلباەۆانى اڭگىمەگە تارتقان ەدىك. – ءاليا دۇيسەبايقىزى, ورتالىقتاعى كونۆەيەر سەكىلدى قايناپ جاتقان جۇمىس ءبىر ساعاتقا توقتاپ قالدى دەلىك!.. ءومىردىڭ ءارتۇرلى سەبەپتەردەن قۇرالاتىنى سەكىلدى, مىسالى, ەلەكتر قۋاتىن بەرۋ تەجەلىپ, كومپيۋتەرلەر ءسونىپ قالادى. سوندا قىزمەتكەرلەرىڭىز ءبىر ساعات بويى نەمەن شۇعىلدانادى؟ – ونىڭىز راس, توسىن جاعدايلاردىڭ تۋىنداماسىنا قاي ۋاقىتتا دا كەپىلدىك جوق. ءبىزدىڭ قىزمەتىمىز تىكەلەي كومپيۋتەرلىك جۇيەگە, ينتەرنەتتىك جەلىگە بايلانىستى. دەسە دە, ءبىر ساعاتىڭىز نە, ءبىز 15 مينۋت تا قول قۋسىرىپ قاراپ وتىرا المايمىز. ويتكەنى, بىزگە كەلۋشى الەۋمەتتىك توپتار ساناتىنداعىلار – زەينەت جاسىنداعى ازاماتتار, ەكىقابات ايەلدەر, ءارتۇرلى مۇگەدەكتىك توپتاعى قالا تۇرعىندارى توبىندا شەك بولعان ەمەس. ءبىزدىڭ قىزمەتكەرلەرىمىز قانداي جاعدايدا دا جۇمىسىن كىدىرتە المايدى. مەكەمەگە باس سۇققان ءبىر دە ءبىر ادامنىڭ كوڭىلىنە قاياۋ تۇسپەۋى ءتيىس. سوندىقتان دا, شام جانعانشا, كومپيۋتەرلىك جەلى قوسىلعانشا, ەلەكتروندى ناقتى مالىمەتتەر دايىن بولعانشا ءبىز دە حال-قادەرىمىزشە كەلۋشىگە اۋىزشا جاۋاپ قايتارىپ, قىزمەتتىك تەحنيكالىق سەبەپتەردىڭ جىمىن بىلدىرمەي جىبەرەمىز. ودان قولىمىز قالت ەتسە, ارحيۆپەن جۇمىس ىستەيمىز. سوندىقتان دا, ءبىزدىڭ جۇمىس توقتاۋسىز ءجۇرىپ جاتقان كونۆەيەر ىسپەتتى. – قىزدار توبىنان قۇرالعان ۇجىمدى باسقارۋدىڭ قانداي قيىندىقتارى بولادى؟ – ءوزىم دە سول توپتىڭ وكىلى بولعاندىقتان, قول استىمداعى قىزمەتكەرلەرگە وزىمە قويعان تالاپتى قويامىن. ولار دا مەن سەكىلدى بىرەۋدىڭ قىزى, كەلىنى, زايىبى, اناسى... قانداي ساتتەردە ولاردىڭ جان دۇنيەسىن تۇسىنۋگە تىرىسىپ باعامىن. ويتكەنى, ولار – مەنىڭ ارىپتەستەرىم. – دەمەك, ارىپتەستەرىڭىزگە قاتال ەمەسسىز عوي؟! – جالپى... قاتال ەمەسپىن. بىراق تا, قاجەتتى كەزىندە تاباندى تالاپتار قويا الامىن. سولاي بولا تۇرا, ارىپتەستەرىمنىڭ جۇرەگىن جارالاپ الۋدان اۋلاقپىن. مۇنداي حالىق نوپىرىمەن قىزمەت ىستەيتىن مەكەمەدە ەرەكشە ءتارتىپ بولۋى كەرەكتىگىن ءبارىمىز دە تۇسىنەمىز. قۋاناتىنىم سول. قىزمەتكەرلەرىمنىڭ بارلىعى دا ءوزىم سەكىلدى, اتقارىپ وتىرعان مىندەتىن جاقسى تۇسىنەدى. – ءوزىڭىز تۋرالى ءبىر اۋىز مالىمەت بەرىپ وتسەڭىز؟ – ماماندىعىم – ەكونوميست. بۇل سالادا 11 جىلدان بەرى ەڭبەك ەتىپ كەلەمىن. جۇمىستى ءجاي مامان بولۋدان باستاپ, سالالىق قىزمەتتىڭ بارلىق بۋىنىنان وتە كەلىپ, قازىر اۋداندىق ۇجىمدى باسقارىپ وتىرمىن. – حالقىمىزدا «قىزدىڭ جاسىن سۇرامايدى» دەگەن جاقسى ءسوز بار, دەيتۇرعانمەن, ۇجىمداعى قىزمەت ىستەيتىن قىز-كەلىنشەكتەردىڭ جاس شاماسى قانشادا؟ – ۇجىمداعى قىزداردىڭ ورتا جاسى – 25! قىزمەتىمىزدى كىدىرىسسىز دوڭگەلەتىپ جۇرگىزىپ وتىرعان دا وسى جانىپ تۇرعان جاستارىمىز. وتە ەلگەزەك, تىندىرىمدى جاس ارىپتەستەرىمنىڭ جان-جاقتان ءتۇسىپ تۇراتىن ءارتۇرلى ۆاكانسيالارعا ساي قىزمەتتەرىنىڭ وسۋىنە دە قولداۋ كورسەتىپ تۇرامىن. تاياۋدا ۇجىم بولىپ قۇرمەتتەپ بىرنەشە اپامىزدى زەينەتكە شىعارىپ سالدىق! – وتە جاقسى ەكەن. ايتپاقشى... سىزدەردىڭ ۇجىمدا زەينەتكە شىعۋ وتە جەڭىل شىعار؟! قۇجات جيناۋ, كەڭەس الۋ دەگەن ءبارى ءوز قولدارىڭىزدا دەگەندەي... – جو-جوق... نەگە ولاي دەيسىز. زاڭ بارىمىزگە ورتاق. زەينەت جاسىنا جەتكەن ازاماتتارعا قويىلاتىن تالاپ – بىرەۋ-اق. – سىزدەر زەينەتكە شىعۋ, بالا تۋعاننان كەيىنگى كومەك, مۇگەدەكتىك جاردەم الۋ دەگەن سەكىلدى ون سان ءتۇرلى الەۋمەتتىك قولداۋ كورسەتۋگە ءزارۋ توپتارمەن جۇمىس ىستەيسىزدەر. مۇنداي ساتتەردە ءىسى ءبىر جايلى بولعان ازاماتتار كوڭىلى توعايعان سوڭ ەلگەزەك ۇجىمنىڭ وكىلىنە سىيلىق جاساپ جىبەرۋگە دايىن تۇرادى... – ءتۇسىندىم... ءبىز دارحان كوڭىلدى حالىقپىز عوي. تيتتەي جاقسىلىق كورسەڭ, سول جاقسىلىققا اسىرا مازىرەت جاساۋعا اسىعىپ تۇرامىز. ونداي سىي-سياپات جاساعىسى كەلىپ تۇراتىندار بولادى. بىراق, حالىققا ءمىنسىز قىزمەت كورسەتۋ – ءبىزدىڭ ءتول مىندەتىمىز ەكەنىن كوپشىلىككە باپپەن تۇسىندىرەمىز. بىزگە اۋىزشا العىستىڭ ءوزى جەتكىلىكتى ەكەنىن جەتكىزەمىز. ءبىزدىڭ ءاربىر قىزمەت-قيمىلدارىمىز بەينەكامەرالار ارقىلى باقىلاناتىنىن بۇگىندە كەلۋشىلەردىڭ وزدەرى دە جاپ-جاقسى ءبىلىپ العان. العىس حات جازسا قابىلدايمىز. مۇنىڭ بارلىعى دا وركەنيەتتىڭ ءساتتى جاسالعان قادامدارى عوي... الەۋمەتتىك ءارتۇرلى توپتاعى ازاماتتار كۇن سايىن ەسىگىمىزدەن ونداپ, جۇزدەپ اتتاپ جاتادى. ەسىكتەن كىرە ايقايلاپ كەلەتىندەر نەمەسە ءبىر اۋىز سوزگە كەلمەي شۋ كوتەرەتىن ادامدار, جۇيكەسى سىر بەرگەن ازاماتتارمەن جۇمىس ىستەۋ دە وڭاي ەمەس. سولاردىڭ بارلىعىنا جىلى قاباق تانىتىپ, جايلى سويلەسۋگە بەيىمبىز. ءبىزدىڭ شۋاقتى كوڭىل-كۇيىمىزدى كورىپ ولار دا جۇمسارىپ سالا بەرەدى, اشۋى باسىلادى. قىسقاسى, ورتالىققا جىلاپ كەلسە دە, جادىراپ-ك ۇلىپ كەتىپ جاتادى... – اڭگىمەڭىزگە راحمەت. قىزدار ۇجىمىن ءتول مەرەكەسىمەن قۇتتىقتايمىز, تابىستى بولىڭىزدار! اڭگىمەلەسكەن تالعات ءسۇيىنباي, «ەگەمەن قازاقستان» الماتى سۋرەتتى تۇسىرگەن نۇرمانبەت قيزات ۇلى