وسكەمەندە ايەلدەر قاۋىمىنىڭ اسىعا كۇتەتىن مەرەكەسى الدىندا ادەمى اكتسيا ۇيىمداستىرىلدى. «سۇيىكتىڭە گۇل سىيلا» دەپ اتالاتىن داستۇرگە اينالعان شارا وسكەمەن قالالىق اكىمدىگى مەن جاستار رەسۋرستىق ورتالىعىنىڭ قولداۋىمەن ءوتتى.
اكتسيا بارىسىندا بۇگىن تاڭەرتەڭ اكىمدىك قىزمەتكەرلەرى جاستارمەن بىرگە كوشەگە شىعىپ, نازىك جاندىلاردى مەرەكەلەرىمەن قۇتتىقتاپ, گۇل شوقتارىن سىيلادى.
-حالىقارالىق ايەلدەر مەيرامى قارساڭىندا جىل سايىن شاھارداعى انالارىمىزعا, ارۋلارىمىزعا گۇل شوقتارىن تارتۋ ەتىپ كەلەمىز. قالانىڭ بارلىق اۋداندارىن قامتۋعا تىرىستىق, - دەيدى وسكەمەن قالالىق جاستار رەسۋرستىق ورتالىعىنىڭ ديرەكتورى ريناد احمەتجانوۆ.
بەلسەندى جاستار ادەمى بەزەندىرىلگەن كولىكتەرمەن شاھاردىڭ ورتالىق كوشەلەرى سانالاتىن رەسپۋبليكا الاڭىنان «يمپەراتور», «الشەمالي» ساۋدا ورتالىقتارىنا, ورتالىق بازار ماڭىنا جانە جىبەك ماتالار كومبيناتى ىقشام اۋدانىنداعى انا مەن بالا ورتالىعىنا ارنايى بارىپ, بۇرىمدىلاردى قۇتتىقتاپ, جىلى لەبىزدەرىن ءبىلدىردى. ۇيىمداستىرۋشىلاردىڭ ايتۋىنشا, تانىمايتىن ادامداردىڭ گۇل ۇسىنعانىنا تاڭىرقاي قاراپ, اۋەلدە باس تارتقان كىسىلەر دە بولىپتى. بىراق كوپشىلىگى توسىن سىيدى ەرەكشە ىقىلاسپەن قابىلداپ, العىستارىن بىلدىرگەن كورىنەدى.
ازامات قاسىم, «ەگەمەن قازاقستان»
وسكەمەن
