نۇرسۇلتان نازارباەۆ: ءبىز ايەلدى جوعارى باعالاعان حالىقپىز

بۇگىن اقوردادا ەلباسى نۇرسۇلتان نازارباەۆتىڭ قازاقستاننىڭ ايەلدەر قاۋىمى وكىلدەرىمەن «كوكتەم شۋاعى» اتتى كەزدەسۋى ءوتىپ جاتىر. «قىمباتتى حانىمدار! الداعى كەلە جاتقان مەرەكە - ايەلدەر كۇنى بارشاڭىزعا قۇتتى بولسىن! باق-بەرەكە, جاقسىلىق تىلەيمىن! بۇگىن ءبىزدىڭ ورتامىزدا ايەل ازاماتتارىنىڭ ءار سالادا قىزمەت ىستەپ جۇرگەن وكىلدەرى بار. كوپ بالالى انالار, دەپۋتاتتار, عالىمدار, سوت, ديقان, كاسىپكەر, ونەرتاپقىش, دارىگەر, ءانشى, جۋرناليست, اكتريسا, سپورتشى, جاۋىنگەرگە دەيىن ارامىزدا وتىر. بىز انانى, ايەلدى ءار ۋاقىتتا قۇرمەتتەپ, جوعارى باعالاعان حالىقپىز. باتىر انالارىمىز ەل باسىنا كۇن تۇسكەندە ەرلەرمەن بىرگە قولىنا قارۋ الىپ, وتانىن قورعاعان. ەل ءۇشىن ەر-ازاماتتارمەن بىرگە جاۋعا شاپقان باياعىدان كەلە جاتقان, بىزگە بەلگىلى بوپاي حانىم, حيۋاز دوسپانوۆا, ءاليا, مانشۇكتەر وشپەس ەرلىكتەرىمەن ەلدىڭ ساناسىندا قالعانىن ءبارىمىز بىلەمىز. قازاق ايەلدەرىنىڭ اراسىندا زور قۇرمەتكە بولەنگەن ۇلكەن انالارىمىز دومالاق انا, ايشا ءبيبى, ايعانىم حانشا, زەرە اجەلەرىمىز پاراساتتىڭ سيمۆولى بولىپ سانالادى. بۇگىنگى قازاقستان ايەلدەرى سول پاراساتتى جالعاستىراتىن, جولىن جالعايتىن ءىزباسارلارى. ايەل ءۇيدىڭ قازىعى دەپ ايەلىن قۇرمەتتەگەن حالىقپىز. قىز وسسە ەلدىڭ كوركى دەپ قىزىن قۇرمەتتەگەن حالىقپىز. ۇلى دالادا قيلى زاماننان كەلە جاتقان يگى ءداستۇر قازىر دە جالعاسۋدا», - دەدى نازارباەۆ. سونىمەن قاتار پرەزيدەنت مەملەكەتتىگىمىزدىڭ نىعايۋىنا ايەلدەردىڭ قوسقان ۇلەسى ەرەكشە ەكەنىن اتاپ ءوتتى. "ەلىمىزدە ەڭبەك ەتەتىن ازاماتتاردىڭ تەڭ جارتىسىنان كوبى قىز-كەلىنشەكتەر. ايەلدەر ۇكىمەت قۇرامىندا, پارلامەنت قابىرعاسىندا, ءتۇرلى  دەڭگەيدەگى اكىمدىكتەردە تابىستى جۇمىس جاساۋدا", - دەدى ەلباسى. ونىڭ ايتۋىنشا, بىلىم بەرۋ سالاسىندا 65, دەنساۋلىق سالاسىندا 75, مەملەكەتتىك قىزمەتتە 55 پايىز ايەلدەر جۇمىس ىستەيدى. جەكە كاسىپكەرلىكتىڭ تەڭ جارتىسى, شاعىن جانە ورتا بيزنەستىڭ  42 پايىزى ايەل ازاماتتاردىڭ قولىندا. «بولاشاق» باعدارلاماسىمەن شەتەلدەن ءبىلىم العان 12 مىڭنان استام جاستىڭ تەڭ جارتىسى قىزدار.