قىرىمبەك كوشەرباەۆ قىز-كەلىنشەكتەردى 8 ناۋرىز مەرەكەسىمەن قۇتتىقتادى

8 ناۋرىز مەرەكەسى قارساڭىندا قىزىلوردا وبلىسىنىڭ اكىمى قىرىمبەك كوشەرباەۆ سىر ەلىندەگى ايەلدەر قاۋىمىنىڭ بەلگىلى وكىلدەرىمەن  كەزدەسىپ, ولاردى حالىقارالىق ايەلدەر كۇنىمەن قۇتتىقتادى. اكىم ايماقتاعى ماڭىزدى سالالاردىڭ باسى-قاسىندا قىز-كەلىنشەكتەردىڭ  جۇرگەنىن ايرىقشا  اتاپ ءوتتى. - سوڭعى جىلدارداعى ستاتيستيكاعا جۇگىنسەك, بۇگىنگى تاڭدا پەداگوگتاردىڭ 73 پايىزى, دارىگەرلەر مەن مەديتسينا قىزمەتكەرلەرىنىڭ 87 پايىزى ايەلدەر. بارلىق بيۋدجەتتىك سالا قىزمەتكەرلەرىنىڭ 60 پايىزى قىز-كەلىنشەكتەردىڭ ۇلەسىندە.  وبلىس ەكونوميكاسىنىڭ ماڭىزدى سالاسى شاعىن جانە ورتا بيزنەستە – 80  پايىز ايەلدەر. بۇگىنگى كەزدەسۋگە كوپبالالى انالار, اۋىل ەڭبەككەرلەرى, مۇعالىمدەر, دارىگەرلەر, ءبىر سوزبەن ايتقاندا ەلىمىزدىڭ تاۋەلسىزدىگىن نىعايتۋعا بار كۇش-جىگەرىن سالىپ ەڭبەك ەتىپ جۇرگەن قۇرمەتتى قىز-كەلىنشەكتەر, اياۋلى ارۋلار جينالىپ وتىر. وبلىستاعى بارلىق جەتىستىكتەرگە سىزدەردىڭ ارقايسىلارىڭىزدىڭ قوسقان ۇلەستەرىڭىز زور,- دەدى وبلىس اكىمى. مەرەكەگە وراي اسقار توقماعامبەتوۆ اتىنداعى مادەنيەت ۇيىندە سالتاناتتى جيىن ءوتتى. مەرەكەلىك شارا قازاقستاندىق ەسترادا جۇلدىزدارىنىڭ قاتىسۋىمەن وتكەن كونتسەرتتىك باعدارلاماعا ۇلاستى.