گولوۆكين: ءوزىڭدى مىقتى جاعىنان كورسەتسەڭ, ەشكىم جەكپە-جەككە شىققىسى كەلمەيدى

ورتا سالماقتا WBA (Super), IBO, WBC جانە IBF تۇجىرىمدارى بويىنشا قازاقستاندىق گەننادي گولوۆكين (36-0, 33 كو) WBA (Regular) بەلبەۋىنىڭ يەگەرى دەنيەل دجەيكوبسپەن وتەتىن جەكپە-جەگى جايلى پىكىر ءبىلدىردى.  بۇل تۋرالى vesti.kz حابارلايدى. «ماعان ەسكى مەكتەپ ۇنايدى. كەيدە مەن ەرەكشە ءبىر جەكپە-جەك ۇيىمداستىرعىم كەلەدى. ىلعي مىقتى قىرىمنان كورسەتە بەرسەم, جۇدىرىقتاسۋعا ەشكىم شىقپايدى», – دەدى قازاقستاندىق بوكسشى. «دجەيكوبس مەنەن قورىقپايدى, سەبەبى بۇل – بوكس. ول ءوز مىندەتىن, شاما-شارقىن جاقسى بىلەدى. ءبىزدى تارتىسقا تولى جەكپە-جەك كۇتىپ تۇر. بۇل ەكەۋىمىز ءۇشىن ناعىز سىن ساعاتى بولماق», – دەپ جازادى Boxingnews24.com. بۇعان دەيىن GGG دجەيكوبسقا قارسى كەزدەسۋدە جانكۇيەرلەرىنە ۇلكەن سىي جاسايتىنىن, سونداي-اق, دجەيكوبستى تىزە بۇكتىرۋ ءۇشىن بارىن سالاتىنىن مالىمدەگەن. ايتا كەتەيىك, قوس بوكسشىنىڭ اراسىنداعى ايقاس 18 ناۋرىز كۇنى اقش-تىڭ نيۋ-يورك قالاسىنداعى Madison Square Garden ارەناسىندا وتەدى. HBO تەلەارناسى اقىلى ترانسلياتسيا جۇيەسى ارقىلى تاراتسا, ەلىمىزدە بۇل كەشتى 19 ناۋرىزدا 08:00-دە «قازاقستان» جانە «KazSport» تەلەارنالارى تىكەلەي ەفيردە كورسەتەدى.