استانادا وتاندىق ونىمدەردىڭ ورتاق پاۆيلونى اشىلدى

وتاندىق كاسىپكەرلەر ۇسىنعان ەڭ ۇزدىك تاۋارلاردى ءبىر دۇكەننەن ساتىپ الۋعا بولادى, دەپ جازادى palata.kz. استانا قالاسىندا ەۋرازيا ىسكەر وداعىنىڭ باستاماسىمەن وداققا مۇشە ەلدەر مەن سەرىكتەستەردىڭ تاۋارلارىن, سونداي-اق كەڭ اۋقىمدا «Made in Kazakhstan» برەندىن قولداۋ جانە ناسيحاتتاۋ ماقساتىندا «ەكسپو» ساۋدا پاۆيلونىنىڭ اشىلۋ سالتاناتى ءوتتى. اشىلۋ سالتاناتىنا ەۋرازيا ىسكەر وداعىنىڭ باسقارما توراعاسى ۆيكتور كامبولوۆ, «حالىق ماركاسى فەدەراتسياسى» زتب پرەزيدەنتى ريمما تاجىباەۆا, «قازاقستاننىڭ ساۋدا كاسىپورىندارى قاۋىمداستىعى» زتب ۆيتسە-پرەزيدەنتى جىبەك اجىباەۆا, «ەكسپو پاۆيلون» ساۋدا-كورمە پاۆيلونىنىڭ باس ديرەكتورى ايجان نۇرلانوۆا قاتىستى. «بۇگىنگى اشىلۋ سالتاناتىنىڭ قىزىل لەنتاسىن قيماس بۇرىن بارشالارىڭىزدى ەۋرازيا ىسكەر وداعى اتىنان وتاندىق ءونىمدى ىلگەرىلەتۋدەگى جاسالعان قاداممەن قازاقستاندىق كاسىپكەرلەردى قۇتتىقتاعىم كەلەدى. بۇل – ارىپتەس ەلدەر اراسىنداعى قىرۋار ەڭبەكتىڭ جەمىسى», – دەپ قۇتتىقتادى ەۋرازيا ىسكەر وداعىنىڭ باسقارما توراعاسى ۆيكتور كامبولوۆ. شارا بارىسىندا جۇرتشىلىق نازارىنا پاۆيلونعا قويىلعان ۇزدىك تاۋارلار لەگى تانىستىرىلدى. جەتپىس جىلدىق تاريحى بار «سىمبات» اكادەمياسى, «Aida KaumeNOVA» برەندتەرىنەن باستاپ, تابيعى بوياۋلارمەن ارلەنگەن قول قۇرتى, كونە رەتسەپتىمەن دايىندالعان «دۋداراي» پريانيگى, كونسەرۆىلەر, تاعى باسقا دا كوز جاۋىن الاتىن ونىمدەر كوز جاۋىن الدى. ساپاسى مەن باعاسى ۇيلەسكەن تاۋارلار «Made in Kazakhstan» اتاۋىنا ابدەن لايىق. ايتا كەتەلىك, وتاندىق «Made in Kazakhstan» برەندىن قولداۋ ماقساتىندا ەۋرازيا ىسكەر وداعىنىڭ باستاماسىمەن رف ماسكەۋ قالاسىندا ەاەو مۇشە ەلدىردىڭ تاۋار ونىمدەرىن تاراتۋعا ارنالعان ءىرى «Food city» اتتى پاۆيلون اشىلعان بولاتىن. سەرىكتەس ەلدەردىڭ اراسىنان قازاقستاندىق ءونىم ساپاسى جاعىنان سۇرانىسقا يە بولعان. ماسكەۋ, تاياۋ شىعىس ەلدەرى, اسىرەسە, قازاقستاندىق قۇرعاق قىمىز, ساۋمال سىندى سالاۋاتتى ءومىر سالتىنا ۇستانۋدا پايدالى ونىمدەر ەرەكشە باعالاعان. «ماسكەۋدە اشىلعان ساۋدا پاۆيلونىندا قازاقستاندىق ونىمگە سۇرانىس ارتىپ وتىر. بۇل وتاندىق تاۋاروندىرۋشىلەرى ءۇشىن قۋانتارلىق جاعداي. سوندىقتان ەلوردا تورىندە بۇگىن اشىلعان وتاندىق ءونىم پاۆيلونى تاۋاردى ەكسپورتقا شىعارماس بۇرىن, ساپاسىنا, تاۋارلىق بەلگىسىنە, جالپى باسەكەگە توزىمدىلىگىن سىناقتان وتكىزۋ بولىپ سانالادى. وسى پاۆيلون ارقىلى ءبىز ەكسپورت جولدارىن جاقسارتۋ, وتاندىق ءونىمدى كەڭىنەن ناسيحاتتاۋ بويىنشا جۇمىس ىستەيمىز. ماسەلەن, تاۋاردىڭ سىرتقى كەلبەتىنەن باستايمىز: قاپتاماسى ستاندارتقا ساي ءارى تارتىمدى بولۋى كەرەك, اتاۋى دا ادەمى بولۋى شارت, تاۋار سەرتيفيكاتسيادان ءوتتى مە, ساپاسىنا قاراي باعاسى لايىق قويىلدى ما, وسى ماسەلەنىڭ بارلىعى سىنالادى. وسىلايشا ەكسپورتقا شىقپاس بۇرىن ىشكى نارىقتا تالاپتاردى قاتاڭ ۇستانساق, «Made in Kazakhstan» برەندىنە دەگەن سۇرانىس تا, بەدەل دە ارتاتىنى ءسوزسىز», – دەدى «حالىق ماركاسى فەدەراتسياسى» زتب پرەزيدەنتى ريمما تاجىباەۆا. فەدەراتسيا باسشىسىنىڭ ايتۋىنشا, پاۆيلون وتاندىق تاۋاردىڭ ءبىر ورتاعا شوعىرلانۋى الەم نارىعىنا شىنىقتىراتىن كاتاليزاتورعا اينالماق. اشىلۋدىڭ وزىندە پاۆيلوندا 30-دان استام باسەكە ورتاسىندا شىندالعان تاۋاروندىرۋشىلەر ءوز ونىمدەرىن ساتىلىمعا قويعان. بۇل ساۋدا الاڭى كەز كەلگەن جاڭا وتاندىق ءونىمنىڭ ءىرى نارىققا شىعۋىنا مۇمكىندىك بەرەدى. «پاۆيلوننىڭ ارتىقشىلىعى – كاسىپكەرلەرگە جاساعان ناقتى كومەك. مۇندا كاسىپكەرلەر تەگىن ورىن,تەگىن سۋ, جىلۋ مەن جارىق, تەگىن ساتۋشى قىزمەتىنە يە بولا الادى, تەك قانا سورەلەردى تازالىقتا ۇستاۋ, تاۋاردى رەتتەپ تۇرۋ, ساتىپ الۋشىلارعا تاۋاردى تانىستىرۋ سىندى جۇمىستارىنا كوزدەلگەن ءبىر جىلعا 300 مىڭ تەڭگە عانا تولەيدى. استانانىڭ ورتالىعىندا بارلىق جاعداي قاراستىرىلعان دۇكەن قىزمەتىن يەمدەنۋ تاماشا مۇمكىندىك بولادى», – دەدى ريمما تاجىباەۆا. ءوز سوزىندە ەۋرازيا ىسكەر وداعىنىڭ باسقارما توراعاسى قازاقستاندىق كاسىپكەرلەردىڭ بەلسەندىلىگىنە, جاۋاپكەرشىلىگىنە ءتانتى بولدى. ءۇش دەڭگەيلى پاۆيلوننىڭ جالپى كولەمى 300 شارشى مەترگە تەڭ. «ەندى قازاقستاندىق ۇزدىك تاۋارلار ەاەو مۇشە ەلدەردە, سونداي-اق وداق سەرىكتەستەرى ەلدەرى نارىعىنا شىعا الاتىن بولادى. ازىرگە پاۆيلونداردان ءبىز بيزنەس كوزىن, پايدانى ويلاپ جاتقان جوقپىز. باستىسى كاسىپكەرلەردىڭ اياققا تۇرىپ, الەمدىك نارىققا وداق مۇشەلەرى ۇسىنعان ۇزدىك تاۋارلاردىڭ اۋقىمدى لەگىن شىعارۋعا دەمەۋ جاساۋ بولىپ وتىر», – دەدى ۆيكتور كامبولوۆ.