كوپتەن كۇتكەن جاڭا فۋتبول ماۋسىمى دا كەلىپ جەتتى. ەرتەڭ, ياعني 8 ناۋرىزدان باستاپ ەلىمىزدىڭ ءار ايماعىنان سىنعا تۇسەتىن 12 كوماندا قاراشاعا دەيىن الا دوپ الامانىنىڭ كورىگىن قىزدىراتىن بولادى.
بەرگەر كەستەسى
الدىمەن پرەمەر-ليگانىڭ جۇيەسىنە توقتالىپ وتسەك. قازاقستان پرەمەر-ليگاسىندا بيىل تاعى 12 كوماندا وينايدى. بىراق بۇرىنعىداي العاشقى ەكى اينالىمنان كەيىن قوس التىلىققا بولىنبەيدى. بۇل جولى چەمپيونات بەرگەر كەستەسى بويىنشا وتكىزىلەدى. وتكەن جىلعى ماۋسىم اياقتالعان سوڭ, جاڭا چەمپيوناتتىڭ فورماتىنا قاتىستى كوپتەگەن ۇسىنىستار ايتىلعان ەدى. پرەمەر-ليگاداعى كوماندالار سانىن 14 نەمەسە 16-عا دەيىن جەتكىزۋ ماسەلەلەرى كوتەرىلدى. الايدا, سول بۇرىنعىسىنشا 12 كوماندا قالاتىن بولدى. قازاقستان كاسىپقوي فۋتبول ليگاسىنىڭ جالپى جينالىسىندا قابىلدانعان شەشىم وسىنداي. ايتەۋىر, ءبىر وزگەرىس بار. ەندى ەل بىرىنشىلىگى ءۇش اينالىمدىق جۇيەمەن وتكىزىلەدى. العاشقى ەكى اينالىمدا بارلىق كوماندالار ۇيدە جانە تۇزدە كەزدەسىپ شىعادى. ال ءۇشىنشى اينالىمداعى ماتچتار بەرگەر كەستەسى بويىنشا قۇراستىرىلادى.پرەمەر-ليگامەن ءۇش كوماندا قوشتاسادى
پرەمەر-ليگاداعى وزگەرىستىڭ ءبىرى ماۋسىم سوڭىندا 11-ءشى جانە 12-ورىن العان كوماندالار بىردەن ءبىرىنشى ليگاعا ءتۇسىپ قالادى. ال 10-ورىنعا يە بولعان كوماندا «وتپەلى ماتچتا» باق سىنايدى. ەسەسىنە, ءبىرىنشى ليگاداعى ءبىرىنشى جانە ەكىنشى ورىن العان كوماندالار 2018 جىلى جوعارى توپتاعى مىقتىلار اراسىندا وينايتىن بولادى.لەگيونەرلەر
لەگيونەرلەرگە قاتىستى ەرەجەگە دە ەشقانداي وزگەرىس ەنگەن جوق. سول بۇرىنعىشا ءار كوماندا حاتتاماعا 8 لەگيونەر تىركەي الادى. ونىڭ التاۋى ءبىر مەزەتتە الاڭعا شىعادى. سونداي-اق, وسى كۇنگە دەيىن قازاقستان فۋتبولىندا لەگيونەر رەتىندە دوپ تەۋىپ كەلگەن نەناد ەريچ, ەۆگەني پوستنيكوۆ, سەرگەي كۋتسوۆ, ۆياچەسلاۆ كوتليار, تاراس دانيليۋك, ميحايل باكاەۆ سەكىلدى ءبىرنەشە ويىنشىنىڭ ارىزدارى قاناعاتتاندىرىلدى. ەندى ولار ءبىزدىڭ ەلدە قازاقستان فۋتبولىنىڭ تۇلەگى رەتىندە وينايتىن بولادى. كاسىپقوي فۋتبول ليگاسى رەسمي سايتىنىڭ تۇسىندىرۋىنشە, ولار «قازاقستان فۋتبولىنىڭ تۇلەگى» ەرەجەسى قابىلدانعانعا دەيىن ءبىزدىڭ ەلدىڭ ازاماتى بولعاندىقتان ارىزدارى قاناعاتتاندىرىلىپتى.چەمپيوندىقتان ۇمىتكەرلەر
باس جۇلدەدەن ۇمىتكەر دەپ «استانا» مەن «قايراتتى» عانا ايتۋعا بولاتىن سياقتى. وزگە كوماندالاردىڭ قۇرامى, قارجىلىق مۇمكىندىگى ەلىمىزدىڭ ەكى باس قالاسىنىڭ كومانداسىمەن باسەكەلەسە المايتىن ءتۇرى بار. «استانا» ماۋسىمارالىق ءۇزىلىس كەزىندە ازدرەن لۋلاكۋ, يۆان ماەۆسكي رومان مۇرتازاەۆ, ديدار جالمۇقان, سەكىلدى جاڭا ويىنشىلارمەن تولىقتى. ال الەكسەي ششەتكين, سەرگەي مالىي, دجوردجە دەسپوتوۆيچ ۇشەۋىن «توبىلعا», روحەر كانياستى كيپردىڭ اپوەل كلۋبىنا ماۋسىمعا دەيىن جالعا بەردى. ەگەر ەلوردا كلۋبىنىڭ ويىنى جۇرمەي جاتسا, اتالعان فۋتبولشىلار قايتىپ ورالاتىن شىعار. تاڭات نوسەرباەۆ پەن ازات نۇرعاليەۆ تۋعان جەرلەرى – شىمكەنتتىڭ «ورداباسى» كلۋبىنا اۋىستى. شىنى كەرەك, «استانانىڭ» ويىنشىلارىنىڭ دەڭگەيى ءدال قازىر «قايراتتان» ءسال تومەندەۋ. ونى باس باپكەر دە سەزەتىن سەكىلدى. باس جاتتىقتىرۋشى ستانيمير ستويلوۆ شابۋىل شەبىن كۇشەيتەتىن فۋتبولشى كەرەك دەگەندى ايتىپ قالدى. «قايرات» بىلتىرعىدان كۇشەيمەسە, باسەڭدەگەن جوق. ەندى سول فۋتبولشىلاردى ويناتۋ باس باپكەردىڭ قارىم-قابىلەتىنە بايلانىستى. ترانسفەر اشىلعان كەزدە ەلدوس احمەتوۆ, يۆو يليچەۆيچ, گەورگي جۋكوۆ قاتارعا قوسىلدى. دەگەنمەن, سۇرمەرگەن جەرار گوۋدىڭ ماۋسىم بويى جالعىز ءوزى جوعارى دەڭگەيدە ويناۋى مۇمكىن ەمەس. سوندىقتان كومانداعا تاعى ءبىر شابۋىلشى قاجەت ەكەنى انىق. ءۇش جىل قاتارىنان «استاناعا» چەمپيوندىق جارىستا ەسە جىبەرگەن الماتى كومانداسى بيىل جانكۇيەرلەرىن قۋانتا الا ما, جوق پا؟ بۇل سۇراقتىڭ جاۋابىن قاراشادا بىلەتىن بولامىز.«برازيليالىق كوماندا»
ەل بىرىنشىلىگىندە 10 جىلدان استام تۇراقتى تۇردە جۇلدەگە ىلىگىپ, بەس مارتە چەمپيون اتانعان «اقتوبە» وتكەن جىلى چەمپيوناتتى التىنشى بولىپ اياقتادى. ماۋسىم اياقتالعان سوڭ, كلۋب ديرەكتورىنىڭ ۇستىنەن قىلمىستىق ءىس قوزعالىپ, قاماۋعا الىندى. باس باپكەرى ەلىنە قايتتى. بيىل كوماندا قايتادان جاساقتالىپ جاتىر. باس جاتتىقتىرۋشى قىزمەتىنە ۋكراينادان يگور راحاەۆتى شاقىرتتى. ول كومانداعا لاتىنامەريكالىق لەگيونەرلەردى جيناپ الدى. قازىردىڭ وزىندە حۋان مانۋەل توررەس (ارگەنتينا), جۋنينو (برازيليا), كاسسيانو (برازيليا), ۆيتور جۋنيور (برازيليا), يۋري مامۋتە (برازيليا) سەكىلدى ويىنشىلار «اقتوبەمەن» كەلىسىمشارتقا قول قويىپ ۇلگەرگەن.«اتىراۋدان» 9 ۇپاي الىندى
قازاقستاندا جىلدا جاڭا فۋتبول ماۋسىمىندا شۋ شىعادى. وتكەن جىلى «التاي» كلۋبىنان 9 ۇپاي الىنىپ تاستالعان ەدى. بىراق, كەيىننەن شىعىس قازاقستان كومانداسى حالىقارالىق سوتقا شاعىمدانىپ, ۇپايلارىن قايتارىپ العان بولاتىن. بۇل جولى پرەمەر-ليگاداعى «اتىراۋ» كلۋبىنان 9 ۇپاي الىندى. «اتىراۋ» كلۋبى بۇرىنعى ويىنشىسى دجوناتاس ريكاردو دا سوۋزا مەن باپكەر زوران فيليپوۆيچكە قارىز اقشالارىن وتەمەگەن. اتالعان ويىنشى مەن باپكەر 2011-2012 جىلدارى «مۇنايشىلار» قاتارىندا بولعان ەكەن. ەندى سول ءۇشىن FIFA تارتىپتىك كوميتەتى قفف-دان باتىسقازاقستاندىق كوماندادان توعىز ۇپاي الىپ تاستاۋدى سۇراپتى. قازاقستان فۋتبول فەدەراتسياسى حالىقارالىق فۋتبول قاۋىمداستىعىنىڭ بۇل ءوتىنىشىن ورىنداعان. الايدا «اتىراۋ» كلۋبىنىڭ باسشىلىعى بۇل جازامەن كەلىسپەيدى. ويتكەنى, كلۋبتا جوعارىدا اتالعان بەرەشەكتىڭ تولەنگەندىگىن دالەلدەيتىن قارجىلاي قۇجاتتار بار ەكەن. كلۋب ديرەكتورى تيمۋر نىعىموۆ سول سەبەپتەن دە لوزانناداعى حالىقارالىق سپورتتىق اربيتراج سوتىنا اپەللياتسيا جولداعانىن ايتىپ وتىر.باپكەرلىكتى ديرەكتوردىڭ كرەسلوسىنا اۋىستىردى
ءبىر جارىم جىل «ورداباسى» كلۋبىنا باس باپكەر بولعان باقتيار بايسەيىتوۆ ەندى ديرەكتوردىڭ كرەسلوسىنا جايعاستى. بايسەيىتوۆ باپكەرلىك ەتكەن تۇستا كوماندا ەكى ماۋسىم قاتارىنان ءتورتىنشى ورىننان كورىندى. ەۋروپا ليگاسىنىڭ ىرىكتەۋ راۋندىنا قاتىستى. بايسەيىتوۆ «ورداباسى» كلۋبىندا بۇعان دەيىن دە ديرەكتور بولىپ قىزمەت اتقارعان. بىراق 2003 جىلى كەلىسىلگەن ويىن وتكىزدى دەگەن كۇدىكپەن سول كەزدەگى وبلىس اكىمى بولات جىلقىشيەۆتىڭ ءوزى بوساتقان ەدى. بۇل جاعداي كەيبىر شىمكەنتتىك جانكۇيەرلەردى الاڭداتاتىنى انىق. دەگەنمەن, باقتيار دانيار ۇلىنىڭ جاڭا جۇمىسىنا ساتتىلىك تىلەيمىز! بايسەيىتوۆتەن قالعان باس باپكەرلىك قىزمەتكە الەكسەي پەترۋشين تاعايىندالدى. بۇل مامان قازاقستانعا جاقسى تانىس. كەزىندە «قايراتتى», ودان كەيىن سەمەيدىڭ «سپارتاك» كلۋبىن ءبىر ماۋسىم جاتتىقتىرعان.لەگيونەرى كوپ كوماندا
پرەمەر-ليگاعا قايتا ورالعان قىزىلوردانىڭ «قايسارى» ترانسفەرلىك نارىقتا وتە بەلسەندى بولدى. كومانداعا جاڭادان 16 ويىنشى كەلىپ قوسىلدى. ونىڭ ىشىندە جەتەۋى لەگيونەر. ازىرگە وزگە كلۋبتاردىڭ بىردە-بىرەۋى مۇنشا لەگيونەر العان جوق. دجون كاماررا (سەررا-لەونە), ماتياس كۋرور (مارتينيكا), گرەگوري نەلسون (گوللانديا/برازيليا), ۆلاديمير ارجانوۆ (ۋكراينا), ابدەل لامانج (فرانتسيا/كامەرۋن), ستەفان نيكوليچ (چەرنوگوريا), سايدي نتيبونكيزا (بۋرۋندي) قىزىلوردا كلۋبىمەن كەلىسىمشارت جاساپ ۇلگەردى. سونداي-اق, قازاقستان ازاماتى دەگەن تولقۇجاتى بار ماقسات بايجانوۆ, جامبىل كوكەەۆ, ۆالەري كوروبكين, الەكسەي مۋلداروۆ سەكىلدى فۋتبولشىلار دا جاڭا ماۋسىمدا «قايساردىڭ» نامىسىن قورعايدى.«ءبىزدىڭ دجەرارد» كارەراسىن اياقتادى
سپورتتىق كارەراسىندا ءبىر عانا كلۋبتا دوپ تەپكەن ويىنشى الەمنىڭ ءوزىندە اسا كوپ ەمەس. قازاقستاندا ءتىپتەن ساۋساقپەن سانارلىق. سونداي ويىنشىلاردىڭ ءبىرى قاراعاندىلىق «شاحتەردىڭ» شابۋىلشىسى اندرەي فينونچەنكو بولاتىن. جاقىندا فۋتبولشى ءوزىنىڭ كارەراسىن اياقتادى. فينونچەنكو ويىنشى رەتىندە الاڭدا دوپ تەپپەسە دە, «شاحتەردان» كەتپەيدى. ول ەندى باس باپكەر الەكسەي ەرەمەنكونىڭ كومەكشىسى بولىپ قىزمەتىنە كىرىسىپ كەتتى. جاقىندا «شاحتەر» كلۋبىنىڭ مۇشەلەرىمەن كەزدەسكەن قاراعاندى وبلىسىنىڭ اكىمى نۇرمۇحامبەت ابدىبەكوۆ فينونچەنكونى ايگىلى «ليۆەرپۋلدىڭ» كاپيتانى ستيۆەن دجەراردپەن سالىستىردى. اندرەي 1982 جىلى قاراعاندى قالاسىندا دۇنيەگە كەلگەن. العاشىندا بالالار باپكەرى اناتولي چۋدينوۆتەن ءتالىم العان. كەيىننەن چۋدينوۆ باپكەر ومىردەن وتكەننەن كەيىن, ونىڭ ورنىن «شاحتەر» فۋتبول كلۋبىنىڭ ەكس-ويىنشىسى, كسرو سپورت شەبەرى گەننادي كوستيۋچەنكو باستى. ءدال وسى باپكەر فينونچەنكونىڭ جاڭا قىرلارىن اشتى. بۇدان كەيىن اندرەي شابۋىلعا ءجيى ارالاساتىن بولدى. ناتيجەسىندە, فۋتبولشى ءوزىنىڭ الاڭداعى ناق ورنىن تاۋىپ, ءوز كومانداسىنىڭ تابىسقا جەتۋىنە كوپ ەڭبەك ءسىڭىردى. وسى ۋاقىت ىشىندە فۋتبولشى «شاحتەر» ساپىندا 434 ماتچقا قاتىسىپ, 126 گول سوققان. «شاحتەرمەن» بىرگە ەكى رەت ەل چەمپيوناتىن ۇتىپ الدى. سونداي-اق, 2013 جىلعى قازاقستان كۋبوگى مەن سۋپەر كۋبوگىنىڭ يەگەرى اتاندى. 2003 جىلى ەل بىرىنشىلىگىنىڭ سۇرمەرگەنى اتانسا, 2013 جىلى قازاقستاننىڭ ۇزدىك ويىنشىسى اتاندى. سونداي-اق, ەكى رەت «شاحتەرمەن» قولا جۇلدەگە قول جەتكىزگەنى تاعى بار. ەۋروپا ليگاسىنىڭ توپتىق كەزەڭىندە ونەر كورسەتتى. ۇلتتىق قۇراما ساپىندا 20 ماتچ وتكىزىپ, 5 مارتە مەرگەندىك تانىتقان. سونىمەن, 8 ناۋرىز كۇنى ميلليونداردىڭ سۇيىكتى ويىنى – فۋتبولدان قازاقستان پرەمەر-ليگاسىنىڭ چەمپيوناتى تۇساۋ كەسەدى. ارمىسىڭ, فۋتبول الامانى دەيمىز! بەك تولەۋوۆ, جۋرناليست استانا
