ەلىمىزگە تانىمال سەمەيلىك قولونەر يەسى قۇرمان اباي ۇلى ايمۇحانبەتوۆ قىتاي ەلىندە, شاۋەشەك قالاسىندا دۇنيەگە كەلگەن. كەيىنىرەك قانا اتامەكەنگە ورالعان قانداس باۋىرلارىمىزدىڭ ءبىرى. سوندىقتان بولار, ونىڭ تۋعان جەرگە دەگەن ىستىق سەزىمى, ماحابباتى ءاربىر تۋىندىلارىنان بايقالىپ تۇرادى.
بۇگىندە قۇرمان اباي ۇلى قالاداعى ەڭ ۇزدىك وقۋ ورنىنىڭ ءبىرى – بيزنەس جانە سەرۆيس كوللەدجىندە تابىستى ەڭبەك ەتىپ ءجۇر.
– مەنىڭ جاس بۋىن ستۋدەنتتەرگە ساباق بەرىپ قانا قويماي, وسىنداي ونەرمەن ءوز شىعارماشىلىعىممەن اينالىساتىنىمدى بايقاعان ديرەكتورىمىز, بىلگىر مامان, بىلىكتى باسشى الميرا بالتابەكقىزى حوجانوۆا ۇنەمى قولداۋ, كومەك كورسەتىپ تۇرادى, – دەيدى قۇرمان اعا اعىنان جارىلىپ, – كوللەدجدە مەنىڭ اۆتورلىق كورمەم تۇراقتى جۇمىس ىستەپ تۇر. سونىمەن قاتار, العاشقى ەڭبەكتەرى جاقسى جاسالعان شاكىرتتەرىمنىڭ دە كورمەسى بىرگە قويىلعان.
جاقىندا استانادا قازاقستان رەسپۋبليكاسى تۇڭعىش پرەزيدەنتى – ەلباسى كىتاپحاناسىندا سەمەي يادرولىق سىناق پوليگونىنىڭ قۇندى قۇجاتتارىنا وراي كورمە ۇيىمداستىرىلعان ەدى. كورمەگە ءمۇسىنشى باس-اياعى ون بەس دۇنيە اپارىپتى.
قۇرمان اباي ۇلى جاساعان دۇنيەلەر كورمەدە ەلباسى نۇرسۇلتان نازارباەۆتىڭ سەمەي پوليگونىن جابۋ, كۋرچاتوۆتاعى ۇلتتىق يادرولىق ورتالىعىن اشۋ سياقتى كوپتەگەن قۇندى قۇجاتتارىمەن قاتار تۇرىپتى. سول تۋىندىلارىنىڭ قاتارىندا «ءولىم سەبۋشى ساڭىراۋقۇلاقتىڭ جانۋارعا اسەرى», «جارىلىس ازابى», «وتقا ورانعان ۇشەۋ», «قارا جانە شوشى» سياقتى كوپتەگەن عاجايىپ مۇسىندەر بار.
– مەنىڭ كورمەگە قويعان جۇمىستارىمنان شاراسىزدىقتى عانا كورمەڭىزدەر. بۇل الداعى بولاشاققا قورقىنىش, الاڭداتۋ دەپ ءتۇسىنىپ, وسىنداي سۇمدىقتى ادامدار ەندى قايتالاماسا دەگەن ەسكەرتۋ. ءاربىر ەكسپونات جان ءتۇرشىكتىرەدى. ويعا باتىرادى. بۇل ارامىزدا ءومىر ءسۇرىپ جاتقان جانداردىڭ ءپروتوتيپى. ولار تەك تاۋقىمەت شەگىپ جاتىر. ءبىرەۋدىڭ قاتەسى ءۇشىن ازاپ شەككەندەر. وسىنى ىستەگەن ادام! – دەيدى قۇرمان اعا, – مىنا ءبىر مۇسىنىمدە, پوليگوننىڭ زاردابى تيمەسە, شىركىن, سۇلۋ قىزدار قارايتىن جىگىتكە اينالار ما ەدى دەگەن بوزبالانىڭ ويىن جەتكىزۋگە تىرىستىم. ءاربىر ءمۇسىننىڭ وزىندىك ءمانى مەن ماعىناسى بار. بەينەلەر ويدان شىعارىلمايدى. بۇگىندە سەمەي پوليگونىنىڭ زاردابىنا بايلانىستى 30 ءمۇسىن جاسالدى. ءالى دە 2 كولىك اعاش بۇتاقتارى مەن شوركەلەر كەزەگىن كۇتىپ تۇر.
راۋشان نۇعمانبەكوۆا
سەمەي
سۋرەتتەردى تۇسىرگەن اۆتور
