بويجەتكەن مال بورداقىلاۋمەن اينالىسادى

جاسىراتىنى جوق, اۋىل شارۋاشىلىعى دەسە كوز الدىمىزعا بىردەن ەگدە ادامداردىڭ ەلەستەيتىنى راس. ويتكەنى, بۇگىنگى جاستاردىڭ كوبى مال وسىرگەندى, ونى باعىپ-قاققاندى بەينەتتى كاسىپ سانايدى. قيىندىعىنان قاشادى. الايدا اتا كاسىپكە ادالدىق تانىتىپ, مال شارۋاشىلىعىمەن شۇعىلدانىپ جۇرگەن جاستار دا جوق ەمەس. كوپ بولماسا دا, بار. سونداي ات توبەلىندەي از جاستىڭ ءبىرى – كۇرشىم اۋدانىنىڭ 20 جاستاعى تۇرعىنى سايا اقانوۆا. بىلتىرعى جەلتوقسان ايىندا بور­داقىلاۋ الاڭىن اشقان بويجەتكەن بۇل كاسىپكە كەزدەيسوق كەلگەنىن ايتادى. سايا اقتوبە قالاسىنداعى كوللەدجدەردىڭ بىرىندە بايلانىس سالاسى بويىنشا ءبىلىم الىپتى. وقۋىن بىتىرگەننەن كەيىن تۋعان جەرىنە كەلەدى. بىراق ماماندىعى بويىنشا جۇمىس تابىلمايدى. قول قۋسىرىپ, قاراپ وتىراتىن ەمەس. ديپلومدى ساندىقتىڭ تۇبىنە سالادى دا, مال بورداقىلاۋمەن اينالىسۋدى ءجون دەپ تابادى. قىزىنىڭ يدەياسىن اتا-اناسى دا قۇپتايدى. ءسويتىپ, ول الىپ-ۇشىپ اۋداندىق جۇمىسپەن قامتۋ ورتالىعىنا بارادى, سول جەردەگى مامانداردىڭ اقىل-كەڭەسىن تىڭدايدى. سودان, «جۇمىسپەن قامتۋدىڭ جول كارتاسى-2020» باعدارلاماسى ارقى­لى 1,5 ملن تەڭگە نەسيەگە قول جەتكىزىپ, 11 ءىرى قارا ساتىپ الادى. – نەسيەنىڭ قۇجاتتارىن رەسىمدەۋ جۇ­مىستارى قيىن ەكەن. تالاي ۋاقىتىم سوعان كەتتى. ال مال تاڭداۋعا اكەم كومەك­تەستى. مالدىڭ باعاسىنا كەلىسۋ, ساۋدالاسۋ وڭاي شارۋا ەمەس ەكەن, – دەيدى سايا. اۋدان ورتالىعى – كۇرشىم اۋىلىندا تۇراتىن بويجەتكەن قازىر وتباسىمەن بىرگە كۇن-ءتۇن دەمەي نەسيەگە العان سيىر­لارىن كۇتىپ, باعىپ ءجۇر. قىستىڭ كوزى قىراۋدا مالعا قاراۋ دا وڭاي شارۋا ەمەس. سوندىقتان سايا بۇل تاراپتا اكەسى مەن مەكتەپتەگى باۋىرىنىڭ كومەگىنە سۇيەنەدى. «نەسيە مەنىڭ اتىمدا بولعانىمەن, شارۋا بارىمىزگە ورتاق. ولار بولماعاندا بۇل ىسكە كىرىسپەۋىم دە مۇمكىن ەدى. ويتكەنى, بيز­نەس-جوبامنىڭ اتاۋى «وتباسىلىق مال بور­داقىلاۋ الاڭى» دەپ اتالادى», دەيدى ول. وسىندايدا اقىن قادىر مىرزا ءالىنىڭ ايتقان «بيزنەس دەگەنىڭ بىرەۋدىڭ اقشاسىن ۇرماي-سوقپاي تار­تىپ الۋ» دەگەن ءسوزى ەسكە تۇسەدى. ازىلگە بۇرىپ اي­تىل­سا دا, راسىندا, بيزنەسپەن شۇعىلدانۋ ەكىنىڭ ءبىرىنىڭ قولىنان كەلە بەرمەيتىن كاسىپ ەكەنى انىق. 20 جاستاعى بويجەتكەن مال بورداقىلاۋعا كىرىسپەس بۇرىن كاسىپكەرلەر پالاتاسىنىڭ اۋداندىق فيليالىندا بيزنەستىڭ الىپپەسىن مەڭگەرىپتى. – ءبىزدىڭ ۇيىمعا ۋىلجىپ تۇرعان جاس قىز كەلىپ, اۋىلدا كاسىپ اشقىسى كەلە­تىنىن ايتقاندا, تاڭعالعانىمىز راس. ءويت­كەنى, سايانىڭ زامانداستارىنىڭ كوبى ەشكىم جايلى جۇمىس دايىنداپ تۇرماسا دا, قالاعا ۇمتىلادى عوي. كەيىن ونىمەن سويلەسە كەلە, قانداي ءىستى قولعا السا دا, ورتا جولدان تاستامايتىنىنا سەندىك. ءبىزدىڭ فيليالدا وقي ءجۇرىپ, ءوزى ءۇشىن ەڭ قولايلى كاسىپ مال بورداقىلاۋ دەگەن شەشىمگە كەلىپتى. راسىمەن كۇتە بىلسە, مالدان تۇسەر بەرەكە كوپ قوي, – دەيدى فيليال ديرەكتورى سۆەتلانا كۋدەداەۆا. ەڭبەكسۇيگىش سايا قازىرگى ۋاقىتتا وسك­ەمەن­­دەگى كوللەدجدەردىڭ بىرىندە مۇ­عا­لىم ماماندىعىن سىرتتاي وقىپ جاتىر ەكەن. كەلەشەكتە ۇستازدىقپەن بىرگە اتا كا­سىپتى قاتار الىپ جۇرگىسى كەلەتىنىن دە جاسىرمادى. – كوپ كاسىپتىڭ ىشىنەن مال بورداقىلاۋ جوباسىن تاڭداپ العانىما وكىنبەيمىن. ويتكەنى, بۇل ءىستىڭ قىر-سىرى بالا كەزدەن تانىس. ەڭ باستىسى, اينالىسىپ جۇرگەن كاسىبىم وزىمە ۇنايدى. مالدىڭ كۇتىمىنە ارالاسۋدى ار سانامايمىن. مال باققانعا عانا بىتەدى عوي, – دەيدى سايا اقانوۆا. ازامات قاسىم, «ەگەمەن قازاقستان» شىعىس قازاقستان وبلىسى