وڭىردەگى وزگە ەلدەرگە ۇلگى
مەن قازاقستان رەسپۋبليكاسى مەن ونىڭ پرەزيدەنتىنىڭ باسقارۋدىڭ اشىق جانە دەموكراتيالانعان فورماسىنداعى باعىتىنا بەت الۋىن ەرەكشە اتاپ وتكىم كەلەدى. جاقىندا پرەزيدەنت نۇرسۇلتان نازارباەۆ ۇكىمەتتىڭ ەسەپ بەرۋشىلىگىن ارتتىراتىن جانە پارلامەنت پەن مينيسترلىكتەرگە كوپتەگەن وكىلەتتىكتەردى بەرەتىن كونستيتۋتسيالىق رەفورمالاردى جاريالادى.
وتكەن جىلدىڭ جەلتوقسانىندا قازاقستان ءوزىنىڭ كەڭەس وداعىنان تاۋەلسىزدىگىنىڭ جيىرما بەس جىلدىعىن اتاپ ءوتتى. جيىرما بەس جىل ىشىندە قازاقستان دامىعان رەسپۋبليكاعا اينالىپ, نارىقتىڭ ەكونوميكا جولىنا ءتۇستى, حالقىنىڭ ءال-اۋقاتىن ارتتىرۋعا زور كوڭىل ءبولدى. قازىرگى ۋاقىتتا قازاقستان پرەزيدەنتى ن.نازارباەۆ رەسپۋبليكانى ءارى قاراي دامىتۋ ءۇشىن ۇزاق مەرزىمدى تۇراقتىلىق پەن وركەندەۋگە قاجەتتى ساياسي جانە كونستيتۋتسيالىق رەفورمالاردى جۇزەگە اسىرۋدى مىقتاپ قولعا الدى. ءسويتىپ, وسى باعىتتا نىق قادامدار جاساۋدا.
مەن قۇراما شتاتتار مەن قازاقستان اراسىنداعى ارىپتەستىك قاتىناستاردى ماقتان تۇتامىن. قازاقستان ءوز ازاماتتارى قۇقىقتارىنىڭ اينىماستىعى ساياساتىن جالعاستىرادى جانە ءبىز وسى ءۇردىستىڭ ءتۇرلى باعىتتاردا تەرەڭدەي تۇسكەنىن قالايمىز. ەلدەگى دەموكراتيالىق قادامدار وڭىردەگى وزگە ەلدەرگە ۇلگى.
مەن الداعى كەزەڭدە قازاقستاننىڭ امەريكا قۇراما شتاتتارىنداعى جاڭا ەلشىسى ەرجان قازىحانوۆپەن جۇمىس جاسايتىن كەزدى اسىعا كۇتەمىن جانە قازاقستان ۇكىمەتىنىڭ ەلدەگى مەملەكەتتىك باسقارۋ جۇيەسىن ۇنەمى جەتىلدىرۋگە دەگەن ۇمتىلىسىن جوعارى باعالايمىن.
مارك مەدوۋس,
سولتۇستىك كارولينا شتاتىنان وكىلدەر پالاتاسىنىڭ دەپۋتاتى (اقش)
ۆاشينگتون,
اقش
بۇل – جاھاندىق ءۇردىس
قازاقستان پرەزيدەنتى ن.نازارباەۆ بيلىك وكىلەتتىكتەرىن قايتا ءبولۋ تۋرالى دۇرىس شەشىم قابىلدادى. بۇل – جاھاندىق ءۇردىس جانە اتالعان قادام قازاقستانعا الەمدىك ۇدەرىستەر ديناميكاسىنا ەنۋگە مۇمكىندىك بەرىپ قانا قويماي, باسقارۋدى قازىرگىدەن دە ءتيىمدى ەتە تۇسەتىن بولادى. ويتكەنى, بۇل باستاما قازاقستان سياقتى جاس مەملەكەتتى دامۋدىڭ داڭعىل جولىنا سالادى دەپ ەسەپتەيمىن.
قازاقستان حالقىنا دا ماقتانۋعا بولادى. سەبەبى, ونىڭ 25 جىلدا قول جەتكىزىلگەن جەتىستىكتەرى اتاپ كورسەتۋگە لايىق. بۇگىندە قازاقستان مەن مەكسيكا اراسىندا جاقسى قارىم-قاتىناس قالىپتاسىپ وتىر. بۇعان مەحيكودا قازاقستان ەلشىلىگىنىڭ اشىلۋى ايقىن دالەل بولا الادى. ال «قازاقستان-2050» ستراتەگياسى قازاقستاندى الەمدەگى اسا دامىعان 30 مەملەكەتتىڭ قاتارىنا قوساتىنى كۇمانسىز.
گيلەرمو امادور ەرناندەس,
مەكسيكا ۇلتتىق
مەديتسينا ۋنيۆەرسيتەتىنىڭ وقىتۋشىسى,
پانامەريكا اناتوميا قاۋىمداستىعىنىڭ مۇشەسى
