قتل تۇركيا ءبىلىم مينيسترلىگىنىڭ باسقارۋىنا وتپەيدى – قر بعم

ناۋرىزدىڭ باسىندا تۇركيانىڭ قازاقستانداعى توتەنشە جانە وكىلەتتى ەلشىسى نەۆزات ۋيانىك قازاق-تۇرىك ليتسەيلەرىنىڭ (قتل) تۇركيا ءبىلىم مينيسترلىگى باسقارۋىنا وتەتىندىگىن ايتقان بولاتىن. قر ءبىلىم جانە عىلىم مينيسترلىگى مۇنداي شارانىڭ بولۋ ىقتيمالدىعىنىڭ ءوزىن رەسمي تۇردە جوققا شىعاردى. «قتل «ءبىلىم-يننوۆاتسيا ليتسەيلەرى» بولىپ قايتا قۇرىلىپ, قازاقستاندىق ءبىلىم بەرۋ ستاندارتتارى بويىنشا جۇمىس ىستەيدى», دەلىنگەن مينيسترلىكتىڭ ءباسپاسوز قىزمەتى تاراتقان مالىمدەمەدە. سونىمەن قاتار, جاڭا اتاۋ بەرىلگەن وقۋ ورىندارىنىڭ جۇمىسى وزگەرمەيتىندىگى اتاپ ءوتىلدى. «قر ءبىلىم جانە عىلىم مينيسترلىگى مەن قر سىرتقى ىستەر مينيسترلىگى وسى ماسەلە بويىنشا بىرىگىپ مالىمدەمە جاسايدى. وعان دەيىن قر ءبىلىم جانە عىلىم مينيسترلىگى قازاقستاندىقتاردى تۇركيا ەلشىسىنىڭ جاساعان مالىمدەمەسىنە بايلانىستى الاڭداماۋلارىن سۇرايدى. «ءبىلىم-يننوۆاتسيا ليتسەيى» جۇمىسىنىڭ ادەتتەگى ءتارتىبى وزگەرىسسىز قالادى», دەلىنگەن حابارلامادا. ايتا كەتەرلىگى, «ءبىلىم-يننوۆاتسيا ليتسەيى» - جۇرتشىلىق اراسىندا جوعارى بەدەل مەن قۇرمەتكە يە بولىپ كەلگەن ءبىلىم بەرۋ مەكەمەسى. قازاق-تۇرىك ليتسەيلەرىنىڭ ءبارى 2016 جىلى «ءبىلىم-يننوۆاتسيا ليتسەيلەرى» بولىپ قايتا قۇرىلدى.