«قايرات» ۆەنگريالىق فۋتبولشىمەن تولىقتى

ۆەنگريانىڭ «ديوشدەر» ۇجىمىندا ويناعان اكوش ەلەك الماتىنىڭ «قايرات» كومانداسىنا اۋىستى, دەپ حابارلادى vesti.kz. فۋتبولشىنىڭ ەلىمىزگە كەلگەنى وسىعان دەيىن حابارلانعان. مەديتسينالىق تەكسەرىستەن وتكەننەن كەيىن «قايراتپەن» كەلىسىمشارتقا وتىرادى. Transfermarket.de مالىمەتى بويىنشا 28 جاستاعى جارتىلاي قورعاۋشىنىڭ ترانسفەرلىك قۇنى 800 مىڭ ەۋرونى قۇراۋى مۇمكىن. «وسىعان دەيىن بىرنەشە رەت وزگە ەلدە دوپ تەپكىم كەلەتىنىن ايتقانمىن. ەندى مىنە, ماقساتىما جەتىپ وتىرمىن. شىنىمدى ايتسام, شىعىس ەۋروپا ەلدەرىنىڭ بىرىنە جول تارتقىم كەلدى. بىراق ۇسىنىس بولمادى. ال قازاقستان پرەمەر-ليگاسى سوڭعى جىلدارى قارقىندى تۇردە دامىپ كەلەدى. ءوزىمدى جاقسى قىرىمنان كورسەتەتىن ۇلكەن مۇمكىندىك تۋىپ تۇر», – دەدى اكوش ەلەك. ايتا كەتەيىك, جارتىلاي قورعاۋشى فۋتبولشىلىق جولىندا ۆەنگريانىڭ «كازينتسبارتسيكا», «ۆيدەوتون», قىتايدىڭ «چانچۋن ياتاي», تۇركيانىڭ «ەسكيشەحيرسپور» سەكىلدى كوماندالارىندا ويناعان. ال ۆەنگريا ۇلتتىق قۇراماسىنىڭ ساپىندا 40 ماتچقا قاتىسقان. بىلتىر فرانتسيادا وتكەن ەۋروپا چەمپيوناتىندا 1/8 فينالعا دەيىن جەتكەن بولاتىن.