وڭتۇستىك قازاقستان وبلىسىندا كوكتەمگى دالا جۇمىستارىنا دايىندىق جۇمىستارى پىسىقتالدى. وبلىس اكىمدىگىندە وتكەن سەلەكتورلىق ماجىلىستە شارۋالاردى ارزانداتىلعان جانار-جاعارمايمەن قامتاماسىز ەتۋ, نەسيەلەندىرۋ شارالارىن تەزدەتۋ, كووپەراتيۆتەر قۇرۋ, جىلىجاي كولەمىن ارتتىرۋ, شەگەرتكەمەن كۇرەس ماسەلەلەرى جان-جاقتى تالقىلاندى, دەپ حابارلايدى وقو اكىمىنىڭ ءباسپاسوز قىزمەتى.
كوكتەمگى دالا جۇمىستارىنا دايىندىق بارىسى جونىندە وبلىستىق اۋىلشارۋاشىلىق باسقارماسىنىڭ باسشىسى سەرىك تۇربەكوۆ بايانداما جاسادى.
ونىڭ ايتۋىنشا, ەگىس كولەمىن, سۋارمالى جەرلەردى ۇلعايتۋ, ينتەنسيۆتى باۋ, جاڭعاق, ءجۇزىم شارۋاشىلىعىن دامىتۋ, شاعىن مال بورداقىلاۋ الاڭدارى مەن ءسۇت فەرمالارىن, قۇس, بالىق شارۋاشىلىقتارىن دامىتۋ بويىنشا ينديكاتورلار اۋدان, قالا اكىمدىكتەرىمەن كەلىسىلىپ بەكىتىلگەن.
بۇدان بولەك, بيىل وبلىسىمىزدا 792,3 مىڭ گەكتارعا اۋىل شارۋاشىلىعى داقىلدارى ەگىلەتىن بولادى. بۇل وتكەن جىلمەن سالىستىرعاندا 3,7 مىڭ گەكتارعا ارتىق. سونداي-اق 1500 مىڭ گەكتارعا ينتەنسيۆتى باۋ, ءجۇزىم, جاڭعاق وتىرعىزىلماق. جىلىجاي كولەمى 300 گەكتارعا ارتىپ, تامشىلاتىپ سۋارۋ ءادىسى 7,2 مىڭ گەكتار القاپتا قولدانىلاتىن بولادى.
باسقارما باسشىسىنىڭ بايانداماسىن تىڭداعان وبلىس اكىمى كوكتەمگى ەگىس جۇمىستارىنا دايىندىق قاعاز جۇزىندە بولماۋىن ەسكەرتىپ, جىلىجايلار كولەمىن ۇلعايتۋدى تاپسىردى.
«ءبىز كۇزدە مول ءونىم الۋ ءۇشىن, بۇگىنگى دايىندىق جۇمىسى جوعارعى دەڭگەيدە بولۋى قاجەت. بارلىق اۋدان, قالا اكىمدەرى مەن اۋىل شارۋاشىلىعى بولىمدەرىنىڭ باسشىلارىنا وندىرىستىك جىلىجايلاردىڭ كولەمىن كوبەيتۋدى تاپسىرامىن. مەجەلى 300 گەكتارعا جەتكىزۋ جۇمىستارى جۇيەلى تۇردە اتقارىلۋى ءتيىس. ونداعى ماقسات - ەلىمىزدى ەرتە كوكتەمگى كوكونىسپەن قامتاماسىز ەتۋ. بۇل باعىتتاعى جۇمىستار مەنىڭ جەكە باقىلاۋىمدا بولادى», - دەدى جانسەيىت قانسەيىت ۇلى.
ايتا كەتەيىك, وبلىستا بارلىق جىلىجايلار كولەمى 1123,1 گەكتاردى قۇراپ رەسپۋبليكاداعى ۇلەسى 87 پايىزعا جەتىپ وتىر. ونىڭ ىشىندە ونەركاسىپتىك جىلىجايلار كولەمى 67,7 گەكتار قۇرايدى.
بيىل وبلىسىمىزدا مال شارۋاشلىعى بويىنشا 45 ءسۇت قابىلداۋ بەكەتتەرى, 16 مال سويۋ پۋنكتەرى, 10 قۇس شارۋاشىلىعى كووپەراتيۆتەرى, 5565 بىرلىك بورداقلاۋ الاڭدارىن قۇرۋ جوسپارلانىپ وتىر. بۇدان بولەك, 111 ءسۇت قابىلداۋ بەكەتى, 56 مال سويۋ الاڭشاسى, 33 قۇس شارۋاشىلىعى كووپەراتيۆتەرىن قۇرۋ جوسپاردا بار. سونداي-اق بيىل وڭىرىمىزدە 12796 باس مال بورداقىلاۋ الاڭدارى قۇرىلاتىن بولادى.
جالپى بيىل اۋىل شارۋاشىلىعى تاۋار وندىرۋشىلەرىنە سۋبسيديانىڭ 41 ءتۇرى بويىنشا قولداۋ كورسەتىلەدى. بيىلعى جىلى كۇرىش, ماقتا, سۇرلەم جۇگەرى, جىلىجايعا گەكتارلىق, مايلى داقىل مەن ماقتانىڭ ونىمىنە سۋبسيديا تولەنەدى.
5 گەكتاردان كوپ الما باعىنا اپورت سورتتىنا 7 جىل كولەمىندە قولداۋ كورسەتىلەتىن بولادى. تۇقىم شارۋاشىلىعىن دامىتۋ بويىنشا وتاندىق تۇقىمدار مەن كوشەتتەردىڭ 70 پايىزى, شەتەلدىك تۇقىمداردىڭ 30 پايىزى كولەمىندە سۋبسيديا بەرىلمەك. بىلتىرعى جىلدان ەرەكشەلىگى 1 گەكتارعا پايدالانىلاتىن تۇقىم تولىعىمەن سۋبسيديالانادى.
مينەرالدى تىڭايتقىشتار بويىنشا وتاندىق جانە شەتەلدىك مينەرالدى تىڭايتقىشتاردىڭ نارىقتىق قۇنىنىڭ ەڭ تومەنگى ءتۇرى بويىنشا 50 پايىزىنا دەيىن سۋبسيديالانادى جانە بىلتىرعى جىلعى تۇقىم پايدالانۋ نورماسى شەكتەۋى الىنىپ تاستالدى.
