وڭتۇستىك قازاقستان وبلىسىنىڭ اكىمى جانسەيىت تۇيمەباەۆ يران يسلام رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى مودجتابا داميرچيلۋمەن كەزدەستى, دەپ حابارلادى وقو اكىمىنىڭ ءباسپاسوز قىزمەتى.
باسقوسۋدا وڭىرىمىزگە ارنايى جۇمىس ساپارىمەن كەلگەن مارتەبەلى مەيمانعا ءوڭىر باسشىسى العىسىن ءبىلدىرىپ, ايماقتىڭ ونەركاسىپ پەن اۋىل شارۋاشىلىعى سالاسىنداعى جەتىستىكتەرىمەن تانىستىردى. سونىمەن قاتار, وبلىسىمىزدىڭ ينۆەستيتسيالىق جانە تۋريستىك الەۋەتىن شەتەل نارىعىنا تانىستىرۋ باستى باسىمدىقتارىمىزدىڭ ءبىرى ەكەنىن ايتىپ, بىرلەسە جۇمىس ىستەۋگە شاقىردى.
«ءۇش ميلليونعا جۋىق حالقى بار وڭتۇستىك ءوڭىرىنىڭ سان سالالار بويىنشا الەۋەتى جوعارى. وعان وبلىسىمىزداعى بۇگىندە 151 ينۆەستيتسيالىق جوبا جۇزەگە اسىرىلىپ جاتقان 11 يندۋستريالدى ايماعىمىز بەن 10 ءىرى كاسىپورنى بار «وڭتۇستىك» ارنايى ەكونوميكالىق ايماعىمىزدىڭ جۇمىسىن جۇرگىزۋى دالەل. بۇل رەتتە, شەتەلدىك ينۆەستورلارعا دا ىڭعايلى جاعدايلاردىڭ جاسالاتىنىن, ماسەلەن, سالىقتان بوساتۋ سىندى جەڭىلدىكتەردىڭ بولاتىنىن ايتا كەتۋىمىز قاجەت», - دەدى ج.تۇيمەباەۆ.
ءوز كەزەگىندە, يران ەلشىسى دە ايماق باسشىسىنا ريزاشىلىعىن ءبىلدىرىپ, قازاقستانمەن, ونىڭ ىشىندە, وڭتۇستىك وڭىرىمەن ساۋدا-ەكونوميكالىق بايلانىستارىنىڭ ودان ءارى نىعايۋىنا نيەتتى ەكەنىن جەتكىزدى. سونداي-اق, اۋىل شارۋاشىلىعى, تۋريزم, كاسىپكەرلىك, سپورت سالالارىندا بىرلەسە جۇمىس ىستەۋگە دايىن ەكەنىن ءبىلدىردى.
«وڭتۇستىك قازاقستاندا يراندىق كاسىپكەرلەر بۇرىننان-اق كاسىبىن اشىپ, جۇمىسىن دوڭگەلەتىپ ءجۇر. بۇگىنگى ساپاردىڭ ماقساتى – وسى بايلانىستى ودان ءارى دامىتىپ, كەڭەيتۋ. سوندىقتان, ايماقتىڭ ينۆەستيتسيالىق الەۋەتىمەن تولىقتاي تانىسىپ, بىرلەسكەن جوبالار جايىن ويلاستىرۋعا يراندىقتار جاعى ءازىر», - دەدى ەلشى مىرزا.
ەكى جاقتى كەزدەسۋ بارىسىندا اكىم وبلىستاعى سالا جەتەكشىلەرىنە ايماقتاعى ينۆەستيتسيا سالۋدى قاجەت ەتەتىن جوبالار رەتىن ءتۇزىپ, جان-جاقتى زەرتتەپ, يران ينۆەستورلارىنا ۇسىنۋدى تاپسىردى. سونداي-اق, شەتەلدىك كاسىپكەرلەرگە اكىمدىك تاراپىنان جاسالاتىن بارلىق جەڭىلدىكتەردى ۇيىمداستىرۋدى جۇكتەدى.
ايتا كەتۋ كەرەك, يران يسلام رەسپۋبليكاسى مەن وڭتۇستىك قازاقستان وبلىسىنىڭ اراسىنداعى ساۋدا-ەكونوميكالىق بايلانىس جىلدان جىلعا ارتىپ كەلەدى. ماسەلەن, وتكەن جىلدىڭ وزىندە, قوس تاراپ اراسىنداعى ىشكى ساۋدا اينالىمى 19 ملن. اقش دوللارىن قۇراعان. وڭىرىمىزگە يراننان قۇرىلىس ماتەريالدارى مەن كەراميكالىق بۇيىمدار, سانتەحنيكا, تۇرمىستىق حيميا, كىلەم ونىمدەرى جانە جەمىس-جيدەكتەر يمپورتتالسا, بىزدەن ەكسپورتتالاتىن تاۋارلاردىڭ قاتارىنا جاڭعاق, تسەمەنت, تەرى ونىمدەرى مەن ەت ونىمدەرى, ارپا جاتادى.
