باۋىرىن اناسىنا ءبولىپ بەرگەن

ادام اعزالارىنا جاسالاتىن كۇردەلى وتانىڭ ءبىرى – باۋىر اۋىستىرۋ. وڭىرلەر اراسىندا بۇل ءادىستى بۇگىندە اقتوبەلىك دارىگەرلەر ءتاپ-ءتاۋىر مەڭگەرىپ قالعانى باي­قالادى. تاياۋدا التى ساعات­قا سوزىلعان وتا ءساتتى ءوتتى. وتا­نىڭ تاعى ءبىر ەرەك­شەلىگى – لا­پاروسكوپيالىق ءتاسىل­مەن جاسالعانىندا. مامان­داردىڭ مالىمدەۋىنشە, مۇنداي جاعدايدا جالاڭداعان حيرۋرگ پىشاعى اشىقتان-اشىق ءتاندى تىلگىلەمەيدى. سونىڭ اسەرىنەن جاراقات تا, ونىڭ تىلىگى دە از بولادى. سول سەبەپتەن جارانىڭ ورنى دا تەز ءبىتىپ, جازىلىپ كەتەدى. بۇل وسىنداي وزىق ءادىس­­پەن ىسكە اسقان ەلىمىزدەگى ەكىن­شى وتا بولىپ شىقتى. ال العاشقى وتا وتكەن جىلى قا­زان ايىندا رەسپۋبليكالىق ەندوسكوپيستەردىڭ كونگرەسى كە­زىندە جاسالعان. بۇل جولى اقتوبەدە 24 جاستاعى قىز 48 جاستاعى اناسىنا باۋىرىنىڭ جارتىسىن بەرگەن. وتانى سەۋل ۇلتتىق ۋنيۆەرسيتەتىنىڭ پروفەسسورى كۆانگ ۆۋنگ لي مەن اقتوبەلىك حيرۋرگ-ماماندار بىرلەسىپ جاسا­دى. قازىر بوي جەتكەننىڭ دە, اناسى­نىڭ دا جاعدايى بىرقالىپتى. دەگەن­مەن, ولار اۋرۋحانا­دان شىققاننان كەيىن دە دارىگەر­لەردىڭ باقىلاۋىندا بولماق. وبلىستىڭ باس حيرۋر­گى ەرلان سۇلتان­گەرەەۆ­تىڭ اي­تۋىن­شا, اقتوبەلىك دارىگەر­لەر لا­پا­روس­كو­پيالىق ءادىستى كو­رەيالىق حيرۋرگتاردان ۇيرەنىپ, اتال­عان ەلدە بىلىمدەرىن جەتىل­دىرىپ قايتىپتى. تەمىر قۇسايىن, «ەگەمەن قازاقستان» اقتوبە