مانەرلەپ جۇزۋدەگى ءمانسىز اڭگىمە

مانەرلەپ نەمەسە سينحروندى جۇزۋدەن ۇلتتىق قۇرامادا ونەر كورسەتىپ جۇرگەن جانە سپورت مانساپتارىن اياقتاعان قىزدارىمىزدىڭ باپكەرلەر شتابىنا وكپەسى قارا قازانداي ەكەن. كوپشىلىكتەن وزدەرىن قورعاۋدى, ال قۇزىرلى ورگانداردان ماماندار تاراپىنان جاسالعان باسسىزدىققا نۇكتە قويۋدى سۇرايدى سۋعا سۇلۋ ورنەك سالعان قىزدارىمىز. ءبارىن باسىنان باستاساق. وسىدان ون شاقتى كۇن بۇرىن عالامتور بەتىندە سينحرونشى قىزدارىمىزدىڭ اشىق حاتى جاريالاندى. مۇندا ولار باس جاتتىقتىرۋشى جاننا دەمچەنكو جانە شتابتاعى وزگە باپكەرلەر ءاليا كارىموۆا مەن نايليا بايمۇرزينا تاراپىنان بولعان ادىلەتسىز ارەكەتتەردەن ابدەن شارشاعاندارىن جازعان. ءتىپتى, ناق وسى «جاناشىر» ما­مان­داردىڭ ارقاسىندا سپورتپەن قوش ايتىسۋعا ءماجبۇر بول­دىق دەگەندى دە ايتادى حات يەلەرى. جالپى, قالام الىپ حات جازعان قىزداردىڭ ەسىمى ەلىمىز­دەگى سۋدا مانەرلەپ ءجۇزۋ سالاسىندا جاقسى تانىمال. مى­سالى, اينۇر كەرەي مەن ايگەرىم جەكسەنبينوۆا 2010 جىلى گۋانچجوۋدا وتكەن ءXVى ازيا ويىندارىنىڭ قولا ءجۇل­دەگەرلەرى. ال ارنا توقتاعان بولسا, دوحا-2006 ازياداسىندا قولا مەدال العان سپورتشى. سونىمەن, اشىق حات ءماتىنى جاريا بولىسىمەن سپورت­شىلارىمىزعا جان-جاقتان حابارلاسۋشىلار كوبەيگەن. سون­دىقتان ولارمەن تىلدەسۋ وڭاي بولمادى. دەسە دە, ورىن العان وقيعاعا قاتىستى قۇراماداعى تانىمال سپورتشى, ازيا ويىن­دارىنىڭ جۇلدەگەرى اينۇر كە­رەيدىڭ پىكىرىن ءوز اۋزىنان ەستۋدىڭ رەتى كەلدى. تاجىريبەلى سپورتشى قىزدىڭ ايتۋىنشا, ۇلتتىق قۇراماداعى باسسىزدىقتار ءبىراز ۋاقىتتان بەرى جالعاسىپ كەلەدى ەكەن. جاۋاپتى مەكەمەلەر تاراپىنان سينحرونشىلاردى قامتاماسىز ەتۋگە جەتكىلىكتى قارجى ءبولىن­گەنىمەن, ولار قىزدارعا جەتپەي قالىپ وتىرعان. ولاردىڭ قايدا كەتىپ جاتقانىنان دا بويجەتكەندەرىمىز بەيحابار. ال بۇلار بولسا, قاجەتتى كيىم-كەشەك پەن جارىستارعا باراتىن قاراجاتتى ۇزاق ۋاقىتتان بەرى ءوز قالتالارىنان شىعارىپ كەلگەن. ەستەرىڭىزدە بولسا, بىلتىر جاننا دەمچەنكو ريو-2016 وليمپياداسىنا دايىندىق بارىسى جايلى سۇحبات بەرىپ, قۇراما مۇشەلەرىنىڭ جاعدايى تولىق جاسالعاندىعىن, ال سۋدا شومىلۋ كيىمدەرى ماسكەۋدە ارنايى تىگىلەتىنىن ايتقان بولاتىن. بىراق باپكەردىڭ بۇل سوزدەرىن اينۇر جوققا شىعارىپ وتىر. «جاننا حانىمنىڭ ءبىزدىڭ جىل سايىن كيىم-كەشەكپەن قامتاماسىز ەتىلەتىنىمىز تۋرالى ايتقان سوزدەرىن ەستىپ تاڭعالدىم. سەبەبى, ءبىز الەم چەمپيوناتتارىنداعى كيىم­دەرىمىزدى وزگە جارىستاردا دا كيۋ ءۇشىن بىرنەشە جىل بويى ساقتاپ جۇرەمىز. كەرەك-جاراق­تىڭ قاشان بەرىلەتىندىگىن ءبىل­مەيتىنبىز. سۋدا شومىلۋ كيىمىن ساتىپ العان كەزدەرىمىز دە بولعان», دەگەن ءۋاجدى العا تارتادى ازيا ويىندارىنىڭ جۇلدەگەرى. ارىپتەسىنىڭ ويىن مانەرلەپ ءجۇزۋشى ايگەرىم جەكسەنبينوۆا دا قوشتايدى. ءوز كەزەگىندە ول باس جاتتىقتىرۋشىعا قىمبات سىيلىقتار الۋ ءۇشىن شتابتاعى باپكەرلەردىڭ وزدەرىنەن بىرنەشە مارتە اقشا جيناعانىن جايىپ سالدى. ارينە, سپورتشىنىڭ باعىن اشاتىن دا, بابىن كەلىستىرەتىن دە باپكەر ەكەندىگىن ەسكەرسەك, سول ماماننىڭ ەڭبەگىن باعا­لاپ, لايىقتى سىي-سياپات كورسەت­كەندە تۇرعان ەشتەڭە جوق دەۋگە دە بولاتىن شىعار. دەگەنمەن, ول سىيلىقتىڭ ءماجبۇرلى تۇردە ەمەس, شىن كوڭىلمەن بەرىلگەنى ورىندى ءارى زاڭعا قايشى كەل­مەيدى. قىزداردىڭ اشىق مالىمدە­مەسىنە قارسى العاش پىكىر ءبىلدىر­گەندەردىڭ ءبىرى – جۇزۋدەن ريو-2016 وليمپياداسىنىڭ چەمپيونى دميتري بالاندين بولدى. ول ءوزىنىڭ Instagram پاراقشاسىندا «سينحروندى جۇزۋدەن قر ۇلت­تىق قۇراماسىنىڭ جالعان ءمۇ­شەلەرى جازعان اشىق حاتتى جوق­قا شىعارۋ», دەپ شا­عىم­دانۋ­شىلاردىڭ سوزدەرىنىڭ شىن­دىققا نەلىكتەن جاناس­پايتىندىعى تۋرالى ويىن ءبىر­نەشە تارماققا ءبولىپ جازعان بولاتىن. بالاندين دە, سينحرونشى قىزدار دا ءبىر ۇيىمنىڭ – سۋ سپورتى تۇرلەرى فەدەرا­تسياسىنىڭ قاراماعىنا كىرەدى. بىراق ولار­دىڭ سالالارى مۇلدە بولەك. سوندىقتان وليمپيادا چەمپيو­نىنىڭ مۇنداي قادامعا نە سەبەپتى بارعانى تۇسىنىكسىز. جو­عارى جاقتىڭ تاپسىرما­سى ما, الدە قۇربىسى ءارى مانەرلەپ جۇزۋدەن ۇلتتىق قۇراما كاپيتانى كريستينا تىنىبەكوۆانىڭ ءوتىنىشى مە, ول جاعى بىزگە بەيمالىم. راس, كوپ ۇزاماي دميتري بۇل جازبانى پاراقشاسىنان ءوشىرىپ تاستادى. دەگەنمەن, ونىڭ سوزدەرى قۇرامانىڭ بۇرىنعى مۇشەلەرىنە اۋىر تيگەنى انىق. قىزدار «ءبالانديندى سوتقا بەرەمىز, قۇرامانىڭ بۇرىنعى مۇشەسى ەكەنىمىز راس, بىراق جالعان قۇراما دەپ ايتۋعا ونىڭ قۇقى جوق», دەپ مالىمدەپ ءۇل­گەردى. ال ءمان-جايدى ءوز اۋزىنان ەستۋ ءۇشىن دميتريگە حابارلاسقانىمىزدا, ول ارەكەت ناتيجە بەرمەدى: چەمپيون تەلەفون تۇتقاسىن كوتەرمەدى... ال ەندى, كريستينا تىنى­بەكوۆانى تىڭداساق, ارىزدانۋشى توپتىڭ باستى ماقساتى – باپكەرلەر شتابىنداعى ورىنداردى يەلەنۋ. سونان سوڭ, بۇل – قىزداردىڭ ءبىرىنشى حاتى ەمەس ەكەن. «مۇنداي حاتتار بۇعان دەيىن دە جازىلعان. بىردە, ءتىپتى, بىزگە قۇرامادان كەتىپ, ءوز كوماندامىزدى قۇرۋ تۋرالى ۇسىنىس جاسالدى. باپكەرلەرسىز. سپورتشىلار وزدەرى دە تابىستى ونەر كور­سەتە الادى, تەك قارجى ماسەلەسى شەشىلسە بولعانى دەگەن پىكىرلەر ايتىلدى. ولار­دىڭ «جىلى ورىن» ىزدەپ ءجۇر­گەن­دەرىنە كۇمانىم جوق. قازىرگى باپكەرلەر جۇمىستان كەتسە, جە­ڭىمپاز رەتىندە سولاردىڭ ورنىن يەلەنبەك. باس باپكەرلىككە اينۇر كەرەيدى لايىق كورەدى. قالعاندارى ونىڭ سەنىمدى سەرىگىنە اينالماقشى». تىنىبەكوۆا بۇل كەلەڭسىز جاعداي قۇراماداعى قىزداردىڭ ۇيىمشىلدىعىن مىعىمداي تۇسكەنىن ايتىپ وتىر. باپكەرلەر شتابى قازىر اڭگىمەلەسۋگە اسا ق ۇلىقتى ەمەس. ال جاننا دەم­­چەنكونىڭ بۇل وقيعاعا قا­تىستى نە دەيتىنىن ءبىلۋ ءۇشىن حا­بارلاسقانىمىزدا, ول قازىر ۋاقى­تىنىڭ تىعىزدىعىن, بىراق الداعى كۇندەرى ءبىزدى قىزىق­تىر­عان ساۋالدارعا تولىققاندى جاۋاپ بەرەتىندىگىن ايتىپ, ۋادە بەردى. قالاي دەگەنمەن دە, كىمنىڭ جالعان سويلەپ, قاي تاراپتىڭ ءسوزى شىندىققا جاناسىمدى ەكەندىگى مىندەتتى تۇردە انىق­تالادى دەپ سەنەمىز. سەبەبى, مۇنداي كەلەڭسىزدىكتەر قاي سالادا بولسىن بار جانە ونىڭ تامىرىنا بالتا سىلتەگەننەن باسقا امال جوق. ال اقيقات سال­تانات قۇرار بولسا, زاڭ مەن ەرەجەنى بەلشەسىنەن باسىپ جۇرە­تىندەردىڭ ارەكەتتەرىنە تىيىم سالىنار دەگەن ءۇمىت­تەمىز. ءمادينا اسىلبەك, جۋرناليست استانا