قاراعاندىدا گولوۆكين اتىنداعى سپورت كەشەنى اشىلادى

قاراعاندىدا گەننادي گولوۆكين اتىنداعى سپورت كەشەنى اشىلادى. ونداعى سەكتسيالار مەن زالداردىڭ بارلىعى تەگىن جۇمىس ىستەيدى, دەپ حابارلايدى قازاقپارات. اتقارۋشى بيلىك دەنە شىنىقتىرۋ-ساۋىقتىرۋ كەشەنىنە WBA (Super), IBO, WBC جانە IBF تۇجىرىمدارى بويىنشا الەم چەمپيونى, كاسىپقوي بوكسشى گەننادي گولوۆكيننىڭ ەسىمىن بەرۋ تۋرالى شەشىم قابىلداعان. بۇگىن قاراعاندى وبلىسى اكىمىنىڭ ورىنباسارى اسىلبەك دۇيسەباەۆ سالىنىپ جاتقان دەنە شىنىقتىرۋ-ساۋىقتىرۋ كەشەنىنە باردى. ول جەردە اۋىر اتلەتيكا زالى, باسكەتبول, ۆولەيبول, شاعىن-فۋتبولعا ارنالعان امبەباپ سپورت زالى, 25 مەترلىك باسسەين جانە بوكس زالى ورنالاساتىن بولادى. «نىساندى پايدالانۋعا بەرەر كەزدە جاتتىقتىرۋشىلاردىڭ بارلىق ەسكەرتپەلەرى مەن تىلەكتەرىن ەسەپكە الۋدى تاپسىرامىن. سونداي-اق, سپورت زالداردىڭ حالىقارالىق ستاندارتتار مەن تالاپتارعا ساي بولۋىن جۇكتەيمىن. بۇل جەردە ءتۇرلى دەڭگەيدەگى سايىستار وتكىزىلەتىن بولادى», – دەپ مالىمدەدى اسىلبەك دۇيسەباەۆ سونداي-اق, دۇيسەباەۆ قۇرىلىس جۇمىستارىن ساپالى ءارى جىلدام جۇرگىزۋدى تاپسىردى. اتالمىش نىسان «سپورت نىساندارىن دامىتۋ» باعدارلاماسى بويىنشا جۇزەگە اسۋدا. ونىڭ قۇرىلىس جۇمىستارىنا وبلىستىق جانە قالالىق بيۋدجەتتىڭ قارجىلارى كەزەڭ-كەزەڭىمەن ءبولىنىپ جاتىر. سپورت كەشەنىنىڭ اشىلۋى وسى جىلدىڭ كوكتەمىنە جوسپارلانىپ وتىر. وتكەن جىلدىڭ قىركۇيەك ايىندا قۇرىلىس الاڭىنا بوكسشى گەننادي گولوۆكين كەلگەن بولاتىن. ول قۇرىلىسشىلارعا سپورت كەشەنىنە كەلۋشىلەردىڭ جاعدايىن جاساۋعا جانە جاتتىعۋلارىن ويداعىداي وتكىزۋ ءۇشىن بىرقاتار تالاپ-تىلەكتەرىن ايتقان.