ديماش: اتا-انامنىڭ ارقاسىندا وسىنداي دەڭگەيگە جەتىپ وتىرمىن

قىتايدا «I’m a Singer» حالىقارالىق ءان بايقاۋىنا قاتىسىپ جاتقان وتانداسىمىز ديماش قۇدايبەرگەن «جەنمين جيباو» («حالىق گازەتى») گازەتىنە سۇحبات بەردى, دەپ حابارلادى قازاقپارات. ديماش – قازاقستان رەسپۋبليكاسىنىڭ مادەنيەت قايراتكەرلەرى قانات قۇدايبەرگەن ۇلى مەن سۆەتلانا ايتباەۆانىڭ ۇلى. ونەرلى وتباسىندا تۋعان. «ونەرلى وتباسىندا دۇنيەگە كەلگەنىمە, وسىنداي اتا-انام بولعانىنا ءوزىمدى ەرەكشە باقىتتى سەزىنەمىن. اتا-انام ونەر ادامدارى بولماعاندا, قانشا قۇلشىنعانىممەن, ءانشى بولۋىم ەكىتالاي ەدى», – دەدى ول. ديماش جاقسى ءانشى بولۋدىڭ قىر-سىرىن ايتىپ ءوتتى. «مەنىڭشە, مۋزىكالىق جاعىنان تابىسقا جەتۋ ءۇشىن كاسىبي قابىلەت باسىم بولۋ كەرەك. ەڭ ماڭىزدىسى, ءاندى جۇرەكپەن ورىنداۋىڭ قاجەت. مەن مايكل دجەكسوننىڭ, دجەكي چاننىڭ, لۋچانو ءپاۆاروتتيدىڭ جانكۇيەرىمىن. ولاردىڭ بارلىعى تىنباي ەڭبەكتەنۋىنىڭ ارقاسىندا ۇلكەن تابىستارعا جەتكەن. بارىنەن دە ماڭىزدىسى, ولاردىڭ ءبارى الەمدىك دەڭگەيدەگى جۇلدىزدار بولسا دا, وتە كىشىپەيىل, باۋىرمال جاندار. سوندىقتان مەن ولاردى ۇلگى تۇتامىن», – دەدى ءانشى ديماشتىڭ ونەر جولىندا مۇنداي دەڭگەيگە جەتۋىنە اتا-اناسىنىڭ زور ەڭبەگى سىڭگەنى راس. بۇل تۋرالى ول: «ول كىسىلەردىڭ ارقاسىندا وسى كۇنگە جەتتىم. ۇستازدارىما دا ەرەكشە العىس ايتامىن. ولار ارقاشاندا ماعان قولۇشىن بەرىپ, مەنى قولداپ كەلەدى. ءارى مەنىڭ كاسىبي دەڭگەيىمنىڭ وسۋىنە ۇلكەن سەپتىگىن تيگىزدى», – دەدى ديماش. ديماش قازاق, ورىس, يتاليان, فرانتسۋز تىلدەرىندە, ءتىپتى قىتاي تىلىندە ءان ايتىپ الەمدى تاڭعالدىردى. «كوپ ىزدەنەمىن. وپەرالىق باعىتتا ءان ايتاتىن بولعاندىقتان, ءارتۇرلى تىلدەردەگى ايگىلى وپەرالاردى ورىنداپ كوردىم. ارينە, قۇلشىنا ۇيرەنۋ ماڭىزدى. الدىمەن, سول ەلدەردىڭ مۋزىكاسى مەن اۋەنىن ۇناتۋ كەرەك. وسىدان كەيىن ان ءماتىنىن ۇيرەنەسىڭ. ءتىپتى, ءاندى جان-دۇنيەڭمەن تۇسىنە الاسىڭ. ۇستازدارىمنىڭ كومەگىمەن وسى تىلدەردى  ۇيرەنۋگە تىرىسىپ, شەتەلدىك وپەرالاردى ناقىشىنا كەلتىرىپ ورىندادىم. سول ارقىلى نەمىس, ۋكراين, فرانتسۋز, يتاليان, اعىلشىن, تۇرىك تىلدەرىندە ايتىپ ۇيرەندىم. قازىر قىتاي تىلىندە ايتۋدى ۇيرەنىپ ءجۇرمىن», – دەدى ول. ديماش اسپاناستى ەلىندەگى «I’m a Singer» حالىقارالىق ءان بايقاۋىنا قالاي كەلگەن ەكەن؟ «بايقاۋدىڭ باس رەجيسسەرى, تالىمگەر حۋن تاو بۇرىنعى مەنىڭ حالىقارالىق بايقاۋلاردا ونەر كورسەتكەنىمدى بايقاپ, وسىندا شاقىردى. «I’m a Singer» بايقاۋى – ناعىز انشىلەر باق سىنايتىن ونەر دوداسى. ۋاقىتى مەن اينالىمى دا ەرەكشە ۇزاق. ول سەنىڭ ساحناداعى ءساتىڭدى عانا ەمەس, ءانشىنىڭ بايقاۋعا دايىندالۋ بارىسىن, سونداي-اق, ساحنادان تىس تۇرمىس-تىرشىلىگىن دە كورسەتەدى. كورەرمەندەرگە ءانشىنىڭ ونەرىمەن بىرگە ءومىرىن دە تولىق تانىستىرادى. بۇل جوبانىڭ ەڭ ۇلكەن ەرەكشەلىگى – جاسى ۇلكەن, اتاعى ايگىلى, تابىسقا جەتكەن انشىلەرمەن بىرگە باق سىناپ ءجۇرمىن», – دەدى ديماش قۇدايبەرگەن ۇلى. تىڭدارماندارى ديماشتان جوعارى ناتيجە كۇتىپ جۇرگەنى انىق. ال ءانشىنىڭ ءوزى ءشى؟ «بايقاۋدىڭ ناتيجەسىنەن بۇرىن, ەڭ باستىسى, كورەرمەندەردىڭ قولداۋىنا يە بولسام دەيمىن. بارىنشا جاقسى ونەر كورسەتىپ, بيىك بەلەستەرگە ۇمتىلىپ, جانكۇيەرلەرىمنىڭ كوڭىلىنەن شىعامىن دەگەن ۇمىتتەمىن», – دەدى ءانشى. ديماش قىتاي ەلىنىڭ انشىلەرىنەن كىمدەردى ءسۇيىپ تىڭدايدى ەكەن؟ كىمنىڭ ونەرىن جوعارى باعالايدى؟ بۇل تۋرالى: «مەنىڭ جاقسى كورەتىن انشىلەرىم كوپ. قىتايلىق انشىلەرمەن كوپ كەزدەسۋلەردە بولدىم. بارلىعى وتە قاراپايىم, اشىق-جارقىن, يناباتتى ادامدار. مەن تالىمگەرلەر حان حۋن مەن لين جىشۋاننىڭ ونەرىن جوعارى باعالايمىن», – دەدى ول. ديماش ەكسپو كەزىندە ساحناعا شىعاتىنىن مالىمدەدى. «بيىل ماۋسىم ايىندا قازاقستاندا ەكسپو-2017 حالىقارالىق كورمەسى باستالادى. ەكسپو تۇڭعىش رەت ورتالىق ازيا ەلىندە وتكىزىلەيىن دەپ وتىر. بارلىقتارىڭىزدى قازاقستانعا كەلىپ, ەكسپو كورمەسىن تاماشالاۋعا شاقىرامىن. ءبارى ساتىمەن بولسا, مەن ءان ايتاتىن بولامىن», – دەدى 22 جاستاعى ءانشى. ديماش ءسوز سوڭىندا تىڭدارماندارىنا جىلى لەبىزىن ءبىلدىردى. «ارماندارىڭىزدىڭ ورىندالۋىن, ءومىر جولدارىڭىزداعى كوزدەگەن ماقساتتارىڭىزعا قول جەتكىزۋلەرىڭىزدى تىلەيمىن. كۇندەرىڭىز كوڭىلدى, تاتۋ-ءتاتتى, ارالارىڭىز مەيىرىمگە, سىيلاستىققا تولۋ بولۋىن تىلەيمىن», – دەپ اياقتادى ءسوزىن.