ازيادا-2017. قازاقستان قۇراماسى كوماندالىق ەسەپتە ءتورتىنشى ورىندا كەلەدى

جاپونيانىڭ ساپپورو قالاسىندا ءوتىپ جاتقان VIII قىسقى ازيا ويىندارىنىڭ التىنشى كۇنى اياقتالدى. وسى ۋاقىت ارالىعىندا كوماندالىق ەسەپتە جاپونيا قۇراماسى 56 مەدالىمەن (19 التىن, 19 كۇمىس, 18 قولا) كوش باستاسا, ەكىنشى ورىندا وڭتۇستىك كورەيا كەلەدى. ولاردىڭ ەنشىسىندە 14 التىن, 14 كۇمىس, 14 قولا بار. ال ۇشتىكتى قىتاي قۇراماسى تۇيىندەپ تۇر. اسپاناستى ەلىنىڭ سپورتشىلارى التى كۇننىڭ ىشىندە 9 التىن, 8 كۇمىس, 7 قولا جۇلدە جەڭىپ الدى. ال قازاقستان قۇراماسى ازىرگە ءتورتىنشى ورىندا كەلەدى. وسى ۋاقىت ارالىعىندا جەرلەستەرىمىز بارلىعى 19 مەدالعا قول جەتكىزدى. ونىڭ بەسەۋى – التىن, التاۋى – كۇمىس, سەگىزى – قولا. ايتا كەتەيىك, بۇگىن ەل قورجىنىنا بياتلونشىلارىمىزدان يان ساۆيتسكي (12,5 شاقىرىم) كۇمىس, گالينا ۆيشنەۆسكايا (10 شاقىرىم) التىن, پاراللەلدى موگۋل جارىسىندا يۋليا گالىشەۆا التىن, فريستايلشى دميتري رەيحەرد جۇپتىق موگۋل جارىسىندا قولا, شاڭعى ەستافەتاسىندا ەرلەرىمىز كۇمىس, شاڭعىمەن ترامپليننەن سەكىرۋ جارىسىندا مارات جاپپاروۆ قولا مەدال سالدى.