فيرۋزا ءشارىپوۆا: قارجى ماسەلەسىن شەشە الماي وتىرمىز

قازاقستاندىق كاسىپقوي بوكسشى قىز فيرۋزا ءشارىپوۆا الداعى جوسپارىنىڭ كۇرت وزگەرۋىنە بايلانىستى فيلمدەرگە تۇسۋدەن باس تارتقانىن مالىمدەدى. بۇل تۋرالى allfight.ru حابارلادى. العاشىندا ءشارىپوۆانىڭ تيتۋلدى جەكپە-جەك وتكىزەتىنى حابارلانعان. «تيتۋلدى ايقاس ءۇشىن ءبىراز قارجى كەرەك بولدى. ال ءبىز ازىرگە دەمەۋشى تابا المادىق. ونىڭ ۇستىنە باپكەرىم دە اۋىستى. ول كىسى دە مەنىڭ شارشى الاڭداعى كۇشىمدى بايقاپ كورگىسى كەلەدى. سول ءۇشىن ءبىز رەيتينگتى ۇرىس وتكىزۋ ءجون دەپ سانادىق», – دەيدى بوكسشى قىز. فيرۋزانىڭ بۇل جولعى قارسىلاسى دا كاسىپقوي رينگكە جاڭادان كەلگەن بوكسشى. «قازىرگى ۋاقىتتا قارسىلاس تابۋ وڭاي شارۋا ەمەس. كوبىسى باس تارتادى نەمەسە قوماقتى قارجى سۇرايدى. دەبيۋتانت دەگەندە تاجىريبەسى از ەكەن دەپ ويلاماعان ءجون. يۋليا چەرنوبورودوۆا ۇلكەن تۋرنيرلەردە توپ جارعان مىقتى بوكسشى. كاسىپقوي بوكسقا العاش رەت شىعايىن دەپ تۇرعاندىقتان التى راۋندتان ۇزاي المايمىز», – دەدى ءشارىپوۆا. «سوڭعى كۇندەرى جوسپارىمىز كۇرت وزگەرىپ كەتتى. قازاقستاننان, رەسەيدەن ءتۇرلى كينولارعا, باعدارلامالارعا ءتۇسۋ جونىندە ۇسىنىستار تۇسكەن. جاقىندا گولليۆۋدتىڭ رەجيسسەرلەرىمەن تانىسۋ ءۇشىن ءارى كاستينگتەرگە قاتىسۋ ءۇشىن امەريكاعا جول جۇرمەك بولعانبىز. مەن تۇسەتىن «يگرا پرەستولوۆ» ءفيلمى دە بولعان. بىراق بارىنەن باس تارتۋعا ءماجبۇر بولدىق. سەبەبى, بوكس مەن ءۇشىن ءبىرىنشى ورىندا. چەمپيوندىق جەكپە-جەگىمە دەيىن جەكە شارۋاما ۋاقىتىم بولمايدى», – دەدى قازاقستاندىق بوكسشى قىز. «يۋليا چەرنوبورودوۆاعا قارسى ايقاسىم الەم چەمپيوندىعى ءۇشىن وتەتىن ۇرىسىما دەيىنگى دايىندىق بولماق. ال ودان كەيىن ءساۋىر ايىندا ماسكەۋدەگى «بوكس اكادەمياسىندا» تاعى دا رينگكە شىعۋدى جوسپارلاپ وتىرمىز. ول تيتۋلدى جەكپە-جەك بولۋى ءتيىس. جوسپارىمىزدىڭ ءبارىن قارجى ماسەلەسى ۇستاپ تۇر. وسى ءىس شەشىلگەننەن كەيىن تاجىريبەسى كوپ, چەمپيون قىزداردىڭ ءبىرىن جەكپە-جەككە شاقىرامىز. قازىردىڭ وزىندە الەمدەگى جەتەكشى ۇيىمداردىڭ بىرىنەن رەيتينگى جوعارى بوكسشىلاردىڭ بىرىمەن تيتۋلدى ۇرىس وتكىزۋ جونىندە الدىن الا رۇقساتىن الدىق», – دەدى بوكسشى قىز. «و باستا ءبىر كومپانيامەن دەمەۋشىلىك ماقساتىندا كەلىسىمشارتقا قول قويعانبىز. بىراق ولار ءوز مىندەتىن ورىنداۋدان باس تارتتى. ودان بولەك كوپتەگەن مەكەمەلەر قارجىلاي كومەكتەسەتىندەرىن ايتقان. بىراق ءبارى سوزبەن عانا شەكتەلدى. قازىر كوماندام دەمەۋشىلەر ىزدەۋمەن اينالىسىپ جاتىر», – دەدى فيرۋزا ءشارىپوۆا. ايتا كەتەيىك, فيرۋزا ءشارىپوۆا 4 ناۋرىز كۇنى يۋليا چەرنوبورودوۆامەن جۇدىرىقتاسادى.