ازيادا-2017. حوككەيدەن قازاقستان قۇراماسى قىتايدى ويسىراتا جەڭدى

جاپونيانىڭ ساپپورو قالاسىندا ءوتىپ جاتقان VIII قىسقى ازيا ويىندارىندا ەرلەر اراسىندا حوككەيدەن قازاقستان قۇراماسى قىتايدى 8:0 ەسەبىمەن جەڭدى. جەرلەستەرىمىز ويىن باستالا سالا قارسىلاستارىن قىسپاققا الىپ, بىرقاتار شابۋىل ۇيىمداستىردى. ناتيجەسىندە, 10-مينۋتتا ماكسيم ۆولكوۆ كەزدەسۋدەگى العاشقى شايبانى سالدى. 14-مينۋتتا يليا كوۆزالوۆ ەسەپتى ەسەلەي تۇسكەنى سول ەدى, ءبىر مينۋت وتپەي جاتىپ كونستانتين ساۆەنكوۆ قازاقستان قۇراماسىنىڭ ءۇشىنشى گولىن سوقتى. اسپاناستى ەلىنىڭ حوككەيشىلەرى دە قارسى شابۋىلعا شىعىپ, سەرگەي كۋدرياتسەۆ قورعاعان قاقپانى بىرنەشە مارتە نىساناعا العان. بىراق ءبارى ءساتسىز اياقتالىپ جاتتى. ەكىنشى كەزەڭ دە وسى باعىتتا ءوربىدى. جەرلەستەرىمىز «ءا» دەگەننەن-اق ويىن تىزگىنىن ءوز قولدارىنا الىپ, ورايى كەلگەن ساتتەردى ءتيىمدى پايدالانۋعا تىرىستى. كەزدەسۋدىڭ 23-مينۋتىندا ماكسيم ۆولكوۆ دۋبل يەسى اتانسا, 34-مينۋتتا دميتري گرەنتس باسىمدىقتى ارتتىرا ءتۇستى. 37-مينۋتتا كونستانتين ساۆەنكوۆ ءوزىنىڭ وسى ماتچتاعى ەكىنشى گولىن سالدى. سوڭعى 20 مينۋتتا وتانداستارىمىز ساۋاتتى قورعانىپ, قارسى شابۋىلدارعا ءجيى شىقتى. 45-مينۋتتا ساۆەنكوۆ حەت-تريك يەسى اتانسا, اراعا بەس مينۋت سالىپ كيريلل ساۆيتسكي كەزدەسۋدەگى سوڭعى شايبانى سوقتى. ايتا كەتەيىك, سەرگەي ستارىگين شاكىرتتەرى وسىمەن ەكىنشى ويىندا جەڭىسكە جەتىپ وتىر. بۇعان دەيىن وڭتۇستىككورەيالىقتاردان 4:0 ەسەبىمەن باسىم تۇسكەن. ال كەلەسى ماتچ 26 اقپان كۇنى جاپونيا قۇراماسىمەن وتەدى.