قر پرەمەر-ءمينيسترىنىڭ ءبىرىنشى ورىنباسارى اسقار مامين تاشكەنتكە جۇمىس ساپارى بارىسىندا وزبەكستاننىڭ پرەزيدەنتى شاۆكات ميرزيوەۆپەن كەزدەستى, دەپ حابارلادى قر ءسىم.
تاراپتار ساۋدا-ەكونوميكالىق بايلانىستاردىڭ بارلىق سپەكترى بويىنشا ەلدەر اراسىنداعى ىنتىماقتاستىق پەرسپەكتيۆالارىن تالقىلادى.
«قازاقستان ورتالىق ازيا وڭىرىندە وزبەكستاننىڭ ءىرى ستراتەگيالىق ساۋدا ارىپتەسى بولىپ تابىلادى», – دەدى پرەزيدەنت ش. ميرزيوەۆ.
پرەمەر-ءمينيستردىڭ ءبىرىنشى ورىنباسارى ا. مامين مەملەكەت باسشىسى نۇرسۇلتان نازارباەۆ وزبەكستانمەن ىنتىماقتاستىقتى دامىتۋعا ەرەكشە نازار اۋداراتىنىن اتاپ ءوتتى.
ا. مامين وزبەك ارىپتەستەرىمەن جۇيەلى نەگىزدە جۇمىس جۇرگىزىلىپ جاتقانىن حابارلادى. اگروونەركاسىپ كەشەنى, حيميا جانە مۇناي-حيميا ونەركاسىبى سالالارىندا بىرلەسكەن ساۋدا ۇيلەرى اشىلىپ, ءوزارا جەتكىزىلىمدەر نومەنكلاتۋراسى ۇلعايعان. ىنتىماقتاستىقتىڭ اۆتوموبيل جاساۋ, تۋريزم, مۇناي-حيميا سياقتى جاڭا سالالارى ايقىندالعان.
«بىرقاتار ينفراقۇرىلىمدىق جوبالار بويىنشا ناقتى كەلىسۋلەر بار, سونىڭ ىشىندە اۆتوبۋس جانە اۋە قاتىناسىن اشۋ. جۋىق ارادا الماتى – تاشكەنت جەدەل تەمىرجول قاتىناسى ىسكە قوسىلادى. قازاقستان مەن وزبەكستان اراسىنداعى اسكەري جانە اسكەري-تەحنيكالىق ىنتىماقتاستىق سالاسىنداعى ىنتىماقتاستىقتى رەتتەۋ تۋرالى كەلىسۋشىلىكتەرگە قول جەتكىزىلدى», – دەلىنگەن حابارلامادا.
2016 جىلى ءوزارا ساۋدا كولەمدەرى اقشالاي كورىنىستە 40% ارتقان. 2020 جىلعا دەيىن وسى كورسەتكىشتى 1,6-دان 5 ملرد دوللارعا دەيىن ۇلعايتۋ مىندەتى قويىلعان.
