ساۋد ارابياسى 2010 جىلدان بەرگى ەڭ ۇلكەن ەكونوميكالىق داعدارىستىڭ الدىندا تۇر, دەپ جازادى RT.
اسكەري شىعىنداردىڭ كوبەيگەنىنەن پايدا بولعان 100 ملرد دوللارلىق تاپشىلىعىن جويۋ ءۇشىن مەملەكەت تاياۋ شىعىستاعى ەڭ ءىرى مۇناي كورپوراتسياسى سانالاتىن Saudi Aramco-نىڭ اكتسيالارىن ساتپاق. دەگەنمەن, وسىدان تۇسەتىن تابىس تاعى دا سول قورعانىس سالاسىنا باعىتتالماق. سونىڭ ىشىندە اسكەريلەر مەن اقش اسكەري ينسترۋكتورلارىنىڭ جالاقىسىنا جۇمسالادى. ال ەل ازاماتتارى مۇنداي شىعىنعا نارازىلىقتارىن ءبىلدىرىپ كوتەرىلىسكە شىعۋدا. مەملەكەت بولسا, ولاردى باسىپ, جىل باسىنان بەرى 47 ادامدى ءولىم جازاسىنا كەستى.
ساۋد ارابياسىنىڭ بيۋدجەت تاپشىلىعى 2017 جىلى 100 ملرد دوللاردى قۇرايدى. Moody’s اگەنتتىگىنىڭ مالىمەتىنشە, بۇل ءجىو-ءنىڭ 22 پايىزى. مۇنداي كورسەتكىش قانداي ەلدى بولماسىن داعدارىسقا ۇشىراتادى. ال 2016 جىلى بيۋدجەت تاپشىلىعى 90 ملرد دوللار بولعان ەدى. بۇل ءجىو-ءنىڭ 18 پايىزىنا تەڭ بولعان.
ەلدىڭ كورولى مەن ونىڭ ەكونوميكالىق كەڭەسشىلەرى 2017 جىلى داعدارىسپەن بەلسەندى كۇرەسە باستادى. ءبىرىنشى كەزەكتە ەل بيلىگى Saudi Aramco كومپانياسىنىڭ 49 پايىز اكتسياسىن ساتۋ تۋرالى شەشىم قابىلدادى. جوسپار بويىنشا, وسىدان تۇسكەن تابىستى 2014-2016 جىلدارى 175 ملرد دوللار جوعالتقان رەزەرۆتىك قوردى تولتىرۋعا جۇمسايدى.
