ۇلت كوشباسشىسى ن.ءا.نازارباەۆتىڭ قازاقستان رەسپۋبليكاسىنىڭ پرەزيدەنتى قىزمەتىنە كىرىسۋ سالتاناتىنداعى ءسوزى
قىمباتتى وتانداستار!
مارتەبەلى مەيماندار!
حانىمدار مەن مىرزالار!
بۇگىن ەلدىڭ اقجولتاي سەنىمىن, ابىرويلى اماناتىن ارقالاعان مەن ءۇشىن ەرەكشە تەبىرەنىسكە تولى ايرىقشا ايشىقتى كۇن. قازاقستان حالقى پرەزيدەنت سايلاۋى ارقىلى بۇگىنىن بايىپتايتىن, بولاشاعىن بەكەمدەيتىن تاريحي تاڭداۋ جاسادى. سوندىقتان, ماعان تاعدىرىن تابىستاپ, اق كيىزگە قايتادان كوتەرگەن, ەل تىزگىنىن سەنىپ ۇستاتقان ارداقتى حالقىما اقجارما العىسىمدى ايتامىن. ءبىزدىڭ جارقىن جەڭىسىمىز كوشىمىزدىڭ ءتۇزۋ, كوكجيەگىمىزدىڭ شۋاقتى, باعىتىمىزدىڭ دۇرىس ەكەنىن تاعى ءبىر ايعاقتاي ءتۇستى. ەلدىڭ تىلەگىمەن وتكەن, تاعىلىمى تاريحىمىزعا ەنگەن سايلاۋدىڭ ناتيجەسى – توككەن تەر, ەتكەن ەڭبەكتىڭ باعاسى دەپ بىلەمىن. تاۋەلسىزدىك جىلدارىندا مەن حالقىمنىڭ باقىتتى ءومىرى, باياندى بولاشاعى ءۇشىن بار قاجىر-قايراتىممەن ەڭبەك ەتىپ كەلەمىن. تاعدىرى تۇتاس, تىلەگى ۇقساس قازاقستان حالقى وسى كەزەڭدە عاسىرلىق ءمانى بار عالامات تابىستارعا قول جەتكىزىپ وتىر. ءبىز التاي مەن اتىراۋ, ارقا مەن الاتاۋ اراسىنداعى ۇلان-عايىر دالادا بىرلىگى بەكەم, ۇلىسى ۇيىسقان, قۋاتتى مەملەكەت قۇردىق. قۇبىلعان زاماندا قۇبىلاسىنان جاڭىلماعان قازاقستان دامۋدىڭ وزىندىك داڭعىل جولىنا ءتۇستى. از ۋاقىتتا ايبىنى اسقان الاش جۇرتى الەۋەتى اسقان, ءداۋلەتى تاسقان, ىرگەسى بەرىك, بەدەلى زور ايدىندى ەلگە اينالدى. باتىس پەن شىعىستى جالعاعان ەلىمىز وركەنيەتتەر ۇندەستىگىنىڭ جەرۇيىق بەسىگى سانالدى. ەسىلدىڭ بويىنداعى ەڭسەلى ەلوردامىز ەۋرازياداعى بايسالدى تۇراقتىلىقتىڭ التىن ارقاۋىنا بالاندى. ىزگىلىك نۇرىن شاشقان استانا رۋحى كۇللى الەمگە بەيبىتشىلىك پەن كەلىسىمنىڭ كيەلى كىلتىن ۇسىندى. بيىل ەل تاۋەلسىزدىگىنىڭ 20 جىلدىعىن اتاپ وتەتىن قازاقستان وسىلايشا جاسامپاز جاڭا داۋىرگە قادام باستى. وسىنىڭ ءبارى ءبىزدىڭ ۇرپاقتىڭ ماڭدايىنا جازىلعان, پەشەنەسىنە بۇيىرعان ايرىقشا باق ەكەنىن سەزىنۋىمىز كەرەك. دەگەنمەن, الدىمىزدا الماعايىپ زامان بار, ۇلان اسۋ, بەلەس بار. ەندەشە, ءبىز بولدىق دەپ بوساڭسىمايمىز, تولدىق دەپ تاسىمايمىز. تۇراقتىلىق پەن تاتۋلىققا نەگىزدەلگەن سارابدال جولىمىزدى تاباندى تۇردە جالعاستىرا بەرەمىز.قۇرمەتتى قازاقستاندىقتار!
قۇرمەتتى مەنىڭ وتانداستارىم!
سىزدەر مەنى قازاقستان رەسپۋبليكاسىنىڭ پرەزيدەنتى ەتىپ سايلاپ, تاعى دا اسا جوعارى سەنىم كورسەتتىڭىزدەر. مەن ءۇشىن تاۋەلسىزدىكتىڭ 20 جىلدىعىندا مەملەكەت باسشىلىعىنا بۇكىل حالىقتىڭ اتىنان سايلانىپ, عاجايىپ كوپۇلتتى وتانىمنىڭ كوشباسشىسى ميسسياسىن جالعاستىرۋ ۇلكەن ابىروي. مەن بارلىق قازاقستاندىقتارعا وتكەن سايلاۋدا شىنايى قولداۋ كورسەتكەندەرى ءۇشىن اق جۇرەكتەن شىققان ريزاشىلىعىمدى بىلدىرەمىن. بۇل – بۇگىندە تۋعان قازاقستانىمىز قول جەتكىزگەن وسىنداي تابىستى مەملەكەت قۇرۋ جولىنداعى ءبىزدىڭ ورتاق ەڭبەگىمىزگە بەرىلگەن ەڭ ۇزدىك باعا. مەن ەلىمىزدىڭ بۇكىل الەمدەگى ءبىزدىڭ بارلىق اق نيەتتى دوستارىمىزعا شىن جۇرەكتەن ريزامىن. وزدەرىڭىز بىلەتىندەي, مەن قازىردىڭ وزىندە رەسەي, قىتاي, تمد مەن ەۋرووداق, باسقا دا كوپتەگەن ەلدەر باسشىلارىنان كوپتەگەن قۇتتىقتاۋلار الدىم جانە بۇل قۇتتىقتاۋلار ءتۇسۋىن جالعاستىرۋدا. مەن ولاردى ريزاشىلىقپەن قابىلداۋدامىن, ويتكەنى, ولاردا قازاقستاندىقتاردىڭ تاڭداۋىنا عانا ەمەس, سونداي-اق ءبىزدىڭ ستراتەگيالىق باعىتىمىزعا دا شىنايى قولداۋلار بار. ەلىمىزدىڭ بارلىق تۇكپىرلەرىندەگى قازاقستاندىقتاردان دا مىڭداعان قۇتتىقتاۋلار ءتۇسىپ جاتىر. مەن بارلىق وتانداستارىما وسى قۇتتىقتاۋلاردا ايتىلعان جىلى سوزدەرى مەن ىزگى تىلەكتەرى ءۇشىن ريزامىن. مەن دە بارلىعىنا سونى, ماعان تىلەگەن ىزگىلىك پەن باقىتتى تىلەيمىن. بۇگىندە قازاقستان بۇكىل الەمگە حالىق بىرلىگى مەن مەملەكەتتىك بيلىكتىڭ قۋاتىن كورسەتىپ وتىر. وتكەن سايلاۋ, ساراپشىلاردىڭ ەسەپتەۋىنشە, ۇيىمداستىرىلۋى مەن دەموكراتيالىلىعى جاعىنان قازىرگى قازاقستان تاريحىنداعى عانا ەمەس, سونداي-اق, بۇكىل ورتالىق ازياداعى ەڭ وزىعى بولدى. تۇراقتىلىق پەن وركەندەۋ باعىتىنا داۋىس بەرە وتىرىپ, ءار قازاقستاندىق ءوزىنىڭ بولاشاعى ءۇشىن, ءوز وتباسىنىڭ بولاشاعى ءۇشىن, ەلى ءۇشىن, وتانى ءۇشىن داۋىس بەردى!قۇرمەتتى قازاقستاندىقتار!
بۇگىندە مەن 1991 جىلدىڭ جەلتوقسانىندا العاشقى بۇكىلحالىقتىق سايلاۋدان كەيىن حالىققا ادالدىعىم تۋرالى انت بەرىپ, جوعارى پرەزيدەنتتىك بيلىكتىڭ رەگالياسىن قابىلداعانىمدى ەسىمە الامىن. سول كەزدە ءبىزدىڭ الدىمىزدا مۇلدەم باسقا مىندەتتەر تۇردى. ءبىز ىدىراعان سۋپەردەرجاۆانىڭ قيراندىلارىندا قالعان ەدىك. ءبىزدى, ءبىرىنشى كەزەكتە, حالىقتى قايتسەك تاماقتاندىرامىز دەگەن ماسەلەلەر تولعاندىردى. ءوندىرىستىڭ قۇلدىراۋىن, ينفلياتسيانى قالاي توقتاتۋ كەرەك؟ ادامدارعا ەڭبەكاقى مەن زەينەتاقىنى ۋاقتىلى تولەۋ ءۇشىن اقشانى قايدان تابۋ كەرەك؟ ءوز جەرىمىزدى قاۋىپ-قاتەرلەر مەن سىناقتارعا تولى كۇردەلى الەمدە قالاي ساقتايمىز؟ بىزدە نە ءوزىمىزدىڭ ۆاليۋتامىز, نە ستراتەگيالىق قورلارىمىز, نە ءوزىمىزدىڭ جالاڭاش قالعان شەكارالارىمىزدى قورعايتىن اسكەرىمىز بولعان جوق.
بۇگىندە وسىنىڭ بارلىعى بۇدان بار-جوعى 20 جىل بۇرىن عانا بولعانىن ەلەستەتۋ قيىن. سول جىلدارى مەن ءۇشىن كۇن تارتىبىندە ەكونوميكا جانە تەك قانا ەكونوميكا تۇردى.
ادامداردىڭ قاناعات تۇتار قاراپايىم ءومىر دەڭگەيىن قامتاماسىز ەتۋ ءۇشىن قارجى تابۋ باستى ماسەلە بولدى.
اشىعىن ايتقاندا, سول تۇستا اڭگىمە كادىمگى جان ساقتاۋ تۋرالى بولدى.
كەڭەس وداعىنىڭ قيراۋى ۇدەمەلى تىعىرىق پەن تۇڭىلۋشىلىككە الىپ كەلدى.
وعان تەك ءال-اۋقاتتى جوعارىلاتۋدى, دەمەك – ەكونوميكالىق ءوسىم مەن وسى ماقسات توڭىرەگىندە تۇتاسۋدى عانا قارسى قويۋعا بولاتىن ەدى.
ناق حالىق سەنىمى, وتانىمىزدىڭ بولاشاعىنا دەگەن حالىقتىڭ تەرەڭ سەنىمى بىزگە بارلىق قيىندىقتارعا قارسى جۇرۋگە كۇش بەردى.
ءسويتىپ, ءبىز ەكونوميكالىق كوللاپستى ەڭسەرىپ, جاھاندىق قازىرگى الەمگە ينتەگراتسيالانعان ءتيىمدى ەكونوميكا قۇردىق.
ءبىز قۋاتتى الەۋمەتتىك باعدارلانعان داعدارىسقا قارسى شارالارىمىزدىڭ ارقاسىندا ەندى عانا بولىپ وتكەن اسا اۋىر جاھاندىق داعدارىستان كەيىنگى الەمدىك قارجى جانە ەكونوميكالىق داعدارىس قاتەرلەرىنە قارسى تۇرا بىلدىك.
جانە بۇل كوپتەگەن مەملەكەتتەر وزدەرىنىڭ الەۋمەتتىك مىندەتتەمەلەرىن توقتاتقان نەمەسە قىسقارتقان كەزەڭدە بولدى.
ءبىز ۇدەمەلى يندۋستريالىق جانە يننوۆاتسيالىق دامۋعا باسىمدىق بەردىك.
بۇكىل قازاقستان بويىنشا جاڭا وندىرىستەر جانە جاڭا جۇمىس ورىندارى قۇرىلدى.
بۇگىندە ءبىز الەمدەگى بارىنشا دامىعان باسەكەگە قابىلەتتى 50 ەلدىڭ قاتارىنا كىرۋ جونىندەگى بەلگىلەنگەن ماقساتقا سەنىمدى تۇردە قادام باسىپ كەلەمىز.
بىرقاتار كورسەتكىشتەر بويىنشا ءبىز قازىردىڭ وزىندە الەم ەلدەرىنىڭ العاشقى ەلۋلىگىنە ەندىك.
ماسەلەن, حالىقارالىق رەزەرۆتەر دەڭگەيى بويىنشا.
ۇلتتىق قورمەن بىرگە, ولار 69 ميلليارد اقش دوللارىنا جەتتى.
ءبىز كاسىپكەرلىك تابىنا قولداۋ كورسەتىپ, ونى ەكونوميكانى دامىتۋدىڭ ناقتى جانە ءتيىمدى قاتىسۋشىسىنا اينالدىردىق.
ءبىز 2020 جىلعا قاراي شاعىن جانە ورتا بيزنەس ۇلەسى ەل ءىجو-ءسىنىڭ كەم دەگەندە 40 پايىزىن قۇرايتىن بولادى دەپ ەسەپتەيمىز.
بۇگىندە بىزدە باسەكەگە قابىلەتتىلىكتىڭ, كاسىپكەرلىكتىڭ جانە ەڭبەك ونىمدىلىگىنىڭ ءوسىمى ءۇشىن بارلىق العىشارتتار بار.
ءبىز «حالىقتىق كاپيتاليزم» نەگىزىن قۇرۋ جولىندا ىلگەرى باسىپ كەلەمىز.
بۇل ۇدەرىستىڭ ءبىرىنشى كەزەڭى «حالىقتىق ءىرو» بولادى.
ولار اكتيۆتەردى جوعارى ساپالى جەكەشەلەندىرۋ ۇدەرىسىنىڭ باستاۋىنا جول سالادى.
بۇل ورتا تاپتىڭ پەرسپەكتيۆالارىن جاقسارتىپ, ونىڭ ەلدى ودان ءارى دامىتۋعا دەگەن قىزىعۋشىلىعىن جوعارىلاتادى.
ءبىز جاڭا تىكەلەي جانە پورتفەلدى شەتەلدىك ينۆەستيتسيالاردى تارتۋ ءۇشىن اشىق ەكونوميكا ساياساتىن دامىتۋدامىز.
ءبىز شەتەلدىك جانە جەرگىلىكتى ينۆەستورلارعا يندۋستريالاندىرۋعا قاتىسۋ ءۇشىن تەڭدەي جاعداي جاساۋ نيەتىندەمىز.
بۇگىندە ءبىز داعدارىستان كەيىنگى ەكونوميكالىق ءوسىمنىڭ 7 پايىزىن قامتاماسىز ەتىپ, الەۋمەتتىك دامۋ مەن قازاقستاندىقتاردىڭ ءومىر ساپاسىن جوعارىلاتۋعا شەشىمدى بەتبۇرىس جاسادىق.
ءبىز ءبىلىم بەرۋدى قازاقستاندىقتاردىڭ باسەكەگە قابىلەتتىلىگىنىڭ باستى فاكتورى رەتىندە دامىتۋدامىز.
بىزدە قاعيداتتى جاڭا ۇلگىدەگى مەكتەپتەر جەلىسى – ينتەللەكتۋالدىق مەكتەپتەر قۇرىلۋدا.
ءبىز استانادا حالىقارالىق ۋنيۆەرسيتەت – الەمدەگى جەتەكشى عىلىمي-ءبىلىم بەرۋ ورتالىقتارىنىڭ پروفەسسورلارى جۇمىس ىستەيتىن تاماشا عىلىم ورتالىعىن اشتىق.
ءبىز دەنساۋلىق ساقتاۋ جۇيەسىن ءححى عاسىرداعى حالىقارالىق ستاندارتتارعا بەيىمدەي وتىرىپ جەتىلدىرۋدەمىز.
وتكەن جىلدىڭ قورىتىندىلارى بويىنشا جان باسىنا شاققانداعى ءىجو دەڭگەيى 9 مىڭ اقش دوللارىنا جەتتى.
ءبىز قورشاعان ورتانى قورعاۋعا ەرەكشە نازار اۋدارىپ كەلەمىز.
ەلدىڭ كىندىگىندە ەۋرازيانىڭ ءىنجۋ-مارجانىنا اينالعان جاڭا ەلوردا سالىندى.
استانا ۇلتتىق رۋحىمىزدىڭ تەرەڭىنە بويلاپ, كەڭدىگىنە قۇلاش ۇردى.
بارلىق قازاقستاندىقتار ءۇشىن ول جاڭارۋدىڭ, حالىقتىڭ ءوز كۇشىنە سەنىمىنىڭ, العان اسۋلارىمىز ءۇشىن ماقتانىشىمىزدىڭ سيمۆولىنا اينالدى.
مەن ەلىمىزدى قاشاندا قازىرگى زامانعى جانە قۋاتتى مەملەكەت, الدىڭعى قاتارلى دەرجاۆالاردىڭ تەڭدەي ارىپتەسى كوردىم.
سوندىقتان ءبىز اشىق ەكونوميكالى جانە دەموكراتيالى ساياسي جۇيەدەگى قازاقستاندى قۇرۋدامىز.
ءبىزدىڭ رەفورمالاردىڭ ىرعاقتىلىعى دەموكراتيا جۇزدەگەن جىلدار بويى جەتىلگەن كەز كەلگەن دامىعان مەملەكەتتەرگە قاراعاندا اناعۇرلىم جوعارى.
ءبىز قوعامدى ودان ءارى دەموكراتيالاندىرۋ جۇمىستارىن جالعاستىراتىن بولامىز.
ءبىز پارلامەنتتىڭ وكىلەتتىگى مەن ۇكىمەتتىڭ جاۋاپكەرشىلىگىن ۇلعايتۋ, سايلاۋ ۇدەرىسىن جەتىلدىرۋ جونىنەن نەعۇرلىم وڭتايلى شەشىمدەر تابۋعا ءتيىسپىز.
بيلىكتى ورتالىقسىزداندىرۋ جانە وكىلەتتىكتەردى وڭىرلەرگە بەرۋ جونىنەن بەزبەندەلگەن شەشىمدەر تابۋ قاجەت.
ءبىزدىڭ ساياسي مادەنيەتتى دامىتۋىمىز كەرەك.
وتكەن پرەزيدەنت سايلاۋىندا العاش رەت «قارا پيار» بولعان جوق.
ول قاتاڭ شيەلەنىستەرسىز, تىنىش جاعدايدا ءوتتى.
ول بارلىق الداعى سايلاۋ ناۋقاندارى ءۇشىن ۇلگى بولۋعا ءتيىس.
تەك سونداي جاعدايدا عانا بىزدە شىنايى دەموكراتيا مەن ىقپالدى كوپپارتيالىلىق داميتىن بولادى.
ءبىز جاۋاپكەرشىلىكتى جانە ەركىن باق-تار جۇيەسىن دامىتاتىن بولامىز.
مەنىڭ مىندەتىم – بارشانىڭ زاڭ الدىنداعى تەپە-تەڭدىگىن قامتاماسىز ەتۋ.
مەن سوت جۇيەسىنىڭ تيىمدىلىگىن ودان ءارى قامتاماسىز ەتۋ جونىنەن جاڭا قادامدارعا بارماق ويدامىن.
ءبىزدىڭ ورتاق مىندەتىمىز – سىبايلاس جەمقورلىققا قارسى ءبىتىمسىز كۇرەستى جالعاستىرۋ.
ءبىز سىبايلاس جەمقورلىقتى جويۋ جونىندەگى شارالاردى تەك قىلمىستىق قۋدالاۋ ارقىلى عانا ەمەس, سونىمەن بىرگە زاڭدارداعى قۇقىقتىق ساڭىلاۋلاردى جويۋ ارقىلى دا كۇشەيتەتىن بولامىز.
ءبىز جەكە جانە زاڭدى تۇلعالاردىڭ قۇقىقتارى مەن مەنشىگىن تيىسىنشە قورعاۋدى قامتاماسىز ەتەمىز.
وسى جانە وزگە دە رەفورمالار تاياۋ ونجىلدىقتا قازاقستاننىڭ ەكونوميكاداعى دا, حالىقتىڭ ءال-اۋقاتىن ارتتىرۋداعى دا سەنىمدى تابىستاردى قامتاماسىز ەتەدى.
بۇگىندە قازاقستان الەمدىك قوعامداستىقتىڭ جاۋاپتى قاتىسۋشىسىنا اينالدى.
ءبىز سەمەي سىناق پوليگونىن جاپتىق, يادرولىق قارۋدان باتىل تۇردە باس تارتتىق.
ءبىز بۇگىندە جاھاندىق انتييادرولىق قوزعالىستىڭ العاشقى قاتارىندا كەلەمىز.
ءبىز ءوزىمىزدىڭ كورشىلەرىمىزبەن, وداقتاستارىمىزبەن جانە ءارىپتەستەرىمىزبەن اوسشك, شىۇ, ۇقشۇ سياقتى وڭىرلىك قاۋىپسىزدىك پەن قىزمەتتەستىكتىڭ جاڭا تەتىكتەرىن قۇردىق.
وتكەن جىلى قازاقستاننىڭ ەقىۇ-عا توراعالىعى مەن ەقىۇ-نىڭ استاناداعى ءسامميتى تابىستى ءوتتى.
الەمدە وسىنداي قىسقا مەرزىمدە وسىنشا تابىستارعا قول جەتكىزگەن باسقا ەل جوق!
مەن ءبىزدىڭ تاۋەلسىزدىگىمىزدىڭ ەلەڭ-الاڭىندا وسىدان 20 جىل بۇرىن العا قويعان ماقساتتار مەن مىندەتتەر ورىندالدى جانە اسىرا ورىندالدى دەپ ماقتانىشپەن ايتا الامىن.
مەن جاڭا ۇلتتىڭ جانە الەم حالىقتارىنىڭ وتباسىنا لايىقتى ەنگەن ءبىزدىڭ قازاقستان سياقتى ۇلى ەلدىڭ كوشباسشىسى بولۋدىڭ اسا زور قۇرمەتىنىڭ ماعان تيگەنى ءۇشىن تاعدىرىما ريزامىن!
قىمباتتى دوستار!
20 جىلدا ءبىز ەلدى وزگەرتتىك, قازاقستاندىقتاردىڭ ءومىرىن جاقسارتتىق. بىراق الەم ءبىر ورىندا تۇرىپ قالعان جوق. ەلدەر مەن حالىقتاردىڭ الدىندا جاڭا, بۇرىنعىدان دا گورى كۇردەلى سىناقتار بوي كوتەرىپ وتىر. ءتورت تاعدىرشەشتى ۇعىم ءححى عاسىرداعى قازاقستان تابىسىنىڭ كىلتى بولىپ تابىلادى. ولار جاڭعىرۋ, حالىقتىڭ ءال-اۋقاتى, يننوۆاتسيالار, ينتەگراتسيا. مەنىڭ سايلاۋالدى باعدارلامامنىڭ ماعىناسى مەن ەلدى 2020 جىلعا دەيىن دامىتۋدىڭ ستراتەگيالىق جوسپارىنىڭ ءمانى دە ءدال وسىندا. جاڭعىرۋ – مەنىڭ مەملەكەتتىك ساياساتىمنىڭ باستى وزەگى. حالىقتىڭ ءال-اۋقاتى – ەل دامۋىنىڭ نەگىزگى شارتى. يننوۆاتسيالار مەن عىلىمي جاڭالىقتار ءححى عاسىردا بولاشاققا دەگەن سەكىرىستى ايقىندايتىن بولادى. قازاقستان باتىل يننوۆاتسيالار ومىرگە جولداما الىپ, عىلىمي زەرتحانالار مەن قازىرگى زامانعى وندىرىستەردە ءتان مەن قانعا يە بولاتىن ەلگە اينالۋى ءتيىس. ول ءۇشىن ءبىزدىڭ بۇگىننەن-اق «ءجۇز ءابسوليۋتتى يننوۆاتسيالاردى» ىزدەۋگە كىرىسۋىمىز قاجەت. ۇكىمەتتىڭ, بارلىق مينيسترلىكتەر مەن ۆەدومستۆولاردىڭ, ءوڭىرلەردىڭ الدىنا وسىنداي مىندەت قويىلدى. ءبىز ولاردان نەعۇرلىم پەرسپەكتيۆالى ون جوبانى ىرىكتەپ الىپ, ولاردى تاياۋداعى ون جىلدا جۇزەگە اسىرۋعا نازار اۋداراتىن بولامىز. وسىنىڭ ءبارى قازاقستاننىڭ قۋاتتى العا جىلجۋى ءۇشىن تىرەك بولۋعا ءتيىس. بۇل ەلدىڭ دامۋىن ايقىندايتىن ۇلتتىق يننوۆاتسيالىق تاپتى قالىپتاستىرۋدىڭ كىلتى. ءۇشىنشى ونجىلدىقتىڭ باسىنا تامان ءبىز قازاقستاننىڭ الەمدەگى يندۋستريالىق دامىعان ەلدەردىڭ قاتارىنا قوسىلۋى ءۇشىن بارلىق جاعدايلاردى جاسايتىن بولامىز. وسى ارقىلى ءبىز تاريحي «قازاقستان-2030» ستراتەگياسىن سالتاناتتى تۇردە اياقتايمىز. ءبىز ودان ارعى ونجىلدىقتارعا, ءبىزدىڭ بالالارىمىز بەن نەمەرەلەرىمىز ورىندايتىنداي جانە ءبىزدىڭ ولار ءۇشىن وسىنداي قۋاتتى بازانى قۇرعانىمىزدى ەسكە ءتۇسىرەتىندەي, بۇرىنعىدان دا گورى اسقاق جوسپارلاردى ازىرلەۋگە كىرىسەمىز. ينتەگراتسيا مەن بۇكىل الەمگە اشىقتىق – ءبىزدىڭ سانالى تاڭداۋىمىز. رەسەيمەن جانە بەلارۋسپەن بىرلەسىپ, ءبىز كەدەن وداعىن دامىتامىز, تاياۋ جىلداردا ەۋرازيالىق ەكونوميكالىق وداقتى قالىپتاستىرۋ ءۇشىن جۇمىس ىستەيمىز. ءبىز قىتاي حالىق رەسپۋبليكاسىمەن ءوزارا ءتيىمدى قىزمەتتەستىكتى كەڭەيتۋگە نيەتتىمىز. قازاقستان امەريكا قۇراما شتاتتارىمەن جانە ەۋروپا وداعى ەلدەرىمەن ستراتەگيالىق ارىپتەستىكتى نىعايتۋدى كوزدەيدى. ءبىز ءوزىمىزدىڭ ورتالىقازيالىق كورشىلەرىمىزبەن جانە تۇركى ەلدەرىمەن نەعۇرلىم تىعىز ءوزارا ىنتىماقتاستىقتا بولامىز. قازاقستاننىڭ بيىلعى يسلام كونفەرەنتسياسى ۇيىمىنا ءتوراعالىعى اياسىندا ءبىز مۇسىلمان الەمىمەن ىقپالداستىقتى كەڭەيتە تۇسپەك نيەتتەمىز. ورتالىق ازياداعى قاۋىپسىزدىك جۇيەسىنىڭ تيىمدىلىگىن ارتتىرۋ قازاقستاننىڭ ەقىۇ, اوسشك, شىۇ جانە ۇقشۇ قىزمەتىنە بەلسەندى قاتىسۋىمەن, سونداي-اق ناتو-مەن ارىپتەستىكتى كەڭەيتۋمەن بايلانىستى.قىمباتتى دوستار!
مەن قازاقستان ۇلتىنىڭ تۇراقتىلىق پەن وركەندەۋ جولىن تابىستى جالعاستىراتىنىنا سەنەمىن. ءبىزدىڭ بولاشاق جەڭىستەرىمىزدىڭ ۇلتتىڭ ارى مەن وجدانىن قۇراپ, ەلىمىزدىڭ قۋاتىن ارتتىراتىنىنا سەنىمىم مول. بۇگىندە قازاقستان ءوز الدىنا جوعارى ماقساتتار قويىپ, ولارعا قول جەتكىزۋگە قابىلەتتى, ورشىلدىگى كۇشتى ماقساتكەر ەل. ءبىز ونى دالەلدەدىك. ءبىز ونى تاعى دا دالەلدەيمىز. مەن قازاقستان حالقىنا سەنەمىن, ەلىمە سەنەمىن!قۇرمەتتى حالايىق, قادىرمەندى قوناقتار!
ىقىلاس بىلدىرگەن ارداقتى الەۋمەت!
حالقىمىزدا «كوپ تىلەگى – كيەلى, جۇرتتىڭ ءسوزى – ءۋالى» دەگەن دانا ءسوز بار. مەن جاڭا عانا قازاقستان پرەزيدەنتى رەتىندە اتا-بابالارىمىزدان قالعان اق كيىزدىڭ ءۇستىندە تۇرىپ, سالتاناتتى تۇردە انت بەردىم. مەنىڭ اينىماس انتىم – اماناتقا ادالدىقتىڭ, سەنىمگە سەرتتىڭ بەلگىسى! اقجۇرەك جۇرتىمنىڭ قالتقىسىز سەنىمى قاشاندا ماعان وراسان زور جاۋاپكەرشىلىك جۇگىن مىندەتتەيدى. مەن ءۇشىن ەل ءۇمىتىن اقتاعاننان, جۇرت سەنىمىن ساقتاعاننان اسقان باقىت جوق. مەنىڭ سايلاۋداعى بۇگىنگى جەڭىسىم – حالقىمنىڭ ىنتىماق-بىرلىگىنىڭ ماۋەلى جەمىسى. حالقىمنىڭ قولداۋى ماعان سارقىلماس كۇش-جىگەر بەرەدى. ءبىزدىڭ باعدارىمىز – ايقىن, ەندەشە, بولاشاعىمىز – جارقىن! ءبىز كەمەل كەلەشەگىمىزدىڭ بەرىك ىرگەسىن بىرگە قالايمىز! بارشاڭىز بىلەسىزدەر, ءبىز تاۋەلسىزدىك جىلدارىندا بار يگىلىكتى ءىستى جارقىن بولاشاق ءۇشىن جاساۋدامىز. سوندىقتان, سايلاۋدا بولاشاعىمىز – جاستاردىڭ بەلسەندى تۇردە ماعان داۋىس بەرگەنى مەنى ەرەكشە تەبىرەنتەدى. تاياۋدا مەن نارعىز يمانعازى دەگەن استانالىق ءبۇلدىرشىن اقىن قىزدىڭ جىر جولدارىن تىڭدادىم. وندا بىلاي دەپ جازىلعان: تاۋەلسىزدىك, اتىڭ قانداي كيەلى! سەنى قورعاۋ – ءار قازاقتىڭ پارىزى, ءار قازاقتىڭ سەن دەپ سوعار جۇرەگى! تاۋەلسىزدىك – قانداي عاجاپ بۇل ۇعىم! وسىنداي تاۋەلسىزدىكتىڭ قادىرىن جەتە سەزىنەتىن وتانشىل, مەملەكەتشىل جاستاردىڭ ءوسىپ كەلە جاتقانى مەنى قۋانىشقا بولەيدى. ءبىزدىڭ تامىرىن تەرەڭگە تارتقان ماڭگىلىك ۇلى مۇراتىمىز بار: ول – تاۋەلسىزدىكتى كوزدىڭ قاراشىعىنداي ساقتاپ, ەلدىگىمىزدى تۇعىرلى, مەملەكەتىمىزدى عۇمىرلى ەتۋ! ەلىمدى تورتكۇل دۇنيەدە تەرەزەسى تەڭ ەڭسەلى جۇرتقا, ابىرويى اسقان ايبىندى ەلگە اينالدىرۋ – مەنىڭ ومىرلىك ءورشىل مۇراتىم. سوندىقتان, مەن كۇش-قۋاتىم باردا, تاجىريبەم باردا تىلەگى ءبىر ەلدىڭ تىرەگى بولىپ قىزمەت ەتە بەرۋگە قاشاندا دايىنمىن. ءاربىر قازاقستاندىقتارعا, ءار وتباسىعا, ارقايسىلارىڭىزعا شىن جۇرەگىممەن قۇرمەت, اق نيەتىممەن زور دەنساۋلىق تىلەيمىن. ەل-جۇرتىمىز امان بولسىن, ءار جانۇيادا باقىت پەن بەرەكە ورنىقسىن. بارشاڭىزعا زور راحمەتىمدى ايتامىن! ماعان كورسەتىلگەن قانات بىتىرەتىن وسىنداي سەنىم ءۇشىن قازاقستاندىقتارعا زور ادامي العىسىمدى ايتقىم كەلەدى. ارينە, مەن كۇش-جىگەرىمدى اياماي جۇمىس ىستەيتىن بولامىن. مەن بارشاڭىزعا مىقتى دەنساۋلىق, بارلىق يگىلىكتەردى, تىنىشتىق, وتباسىنداعى ءساتتىلىكتى, دوستىقتى, ءبىزدىڭ كوپۇلتتى ەلىمىزدە ءبىتىم مەن تۇراقتىلىق تىلەيمىن. جاقسىلىقتار مول بولسىن, قىمباتتى وتانداستار!
