قاتىسۋشىلار لەبىزى

ناجمەددين عۇباشەۆ, ماڭعىستاۋ وبلىستىق ءماسليحاتىنىڭ دەپۋتاتى: – پرەزيدەنتىمىزگە بۇكىل حالىق سەنىمىن ار­تىپ, داۋىسىن بەرگەننەن كەيىن زاڭ بويىنشا ءوت­كى­زىلۋى ءتيىس ۇلىقتاۋ راسىمىنە قاتىسقانىما قۋا­نىشتىمىن. وسى سالتاناتقا ەلىمىزدىڭ باس­قا وب­لىس­تارىمەن قاتار, ءبىزدىڭ وبلى­سى­مىز­دان دا دەلەگاتسيا كەلدى. بۇگىن, مىنە, سول دەلەگاتسيا قۇرا­مىندا تاۋەلسىزدىك سارايىندا بولعان بيىك رۋحپەن تىنىستاپ, ەلباسىنىڭ ءسوزىن تىڭدا­دىق. ەلى­مىز­دىڭ وركەندەۋى, حالىقتىڭ جاعدايى, جاستاردىڭ بولا­شاعى دەگەندى ءبىز مەم­لەكەت باسشىسىنسىز ەلەستەتە المايمىز. سوعان بۇگىن دە كوزىمىز جەتتى. ءبىزدىڭ بايتاق وتانىمىزدىڭ ەرتەڭىنىڭ كەمەلدى بولا­تى­نىنا سەندىك. كەشەگى وتكەن كەزەكتەن تىس سايلاۋدا ماڭعىستاۋ ءوڭىرىنىڭ حالقى وزدەرىنىڭ ەلباسى ۇستاعان ساياساتتى قولدايتىنىن, ەرتەڭگى كۇنگە دەگەن سەنىمدەرى وسى كىسىمەن بايلانىستى ەكەندىگىن دالەلدەپ داۋىس­تا­رىن بەردى. نەگىزى – ەلباسى حالقىنا قالاي سەنسە, حالقىنىڭ دا ەلباسىعا سونداي سەنەتىنىن وسى جولعى سايلاۋدا تاعى دا كوردىك. مەن ءوزىم مۇنايشىمىن. ال مۇناي سالاسىنىڭ ەلىمىزدىڭ ەكو­نومي­كا­سىندا قانداي ورىن الاتىندىعى تۇسىنىكتى. مىنە, وسى سالا­نىڭ دا­مۋ­ىندا دا مۇنايشىلار ەلباسىنىڭ قامقورلىعىن ءاردايىم سەزىنىپ وتىرادى. * * * ەسلام ۋاحيتوۆ, سولتۇستىك قازاقستان وبلىسى, ءۋاليحانوۆ اۋدانىنىڭ اكىمى: – پرەزيدەنتىمىز نۇرسۇلتان نازارباەۆتى ۇلىقتاۋ ءراسىمىنىڭ استانا تورىندە بار سالتا­ناتىمەن كورسەتىلۋى, وعان مىڭداعان ادامنىڭ قاتىسۋى جانە دە اسكەري شەرۋدىڭ ساپ تۇزەپ نىق قاداممەن ءجۇرىپ ءوتۋى  ماڭىزدى تاريحي وقيعا دەسەك, ارتىق ايتقاندىق ەمەس. اتالعان ۇلىقتاۋ ءراسىمى قازاقستانداعى جي­ىر­ما جىلدا ىستەلىنگەن ەڭبەكتىڭ, سونىڭ جاق­سىلىعىنىڭ كورىنىسى بولدى. حالىق ءبىر ادامداي داۋىس بەرىپ, ەلباسىن تاڭداعاننان كەيىن ۇلىقتاۋ سالتاناتى ءوزى سالعان استانا تورىندە ءوتىپ جاتقانى –  ۇلكەن ماقتانىش ءارى مارتەبە. وسى رەتتە نۇرسۇلتان نازارباەۆتىڭ باستاماسىمەن قولعا الىنعان بارلىق شارۋالاردىڭ باسى-قاسىندا جۇرگەندىكتەن, ولاردىڭ تۇرعىندار اراسىندا قولداۋعا يە بولىپ وتىرعاندىعىن كورۋدەمىز. قازاقستان مەملەكەتىنىڭ جيىرما جىلدىعى قارساڭىندا ءوتىپ جاتقان پرەزيدەنتتى ۇلىقتاۋ سالتاناتى جاقسى نىشان بولسا كەرەك. قازىرگى كەزدە قازاقستان الەمگە تانىلىپ, كوپتەگەن يگى ىستەردى اتقا­رىپ كەلەدى. ەلىمىز ءوزىنىڭ كەز كەلگەن مىندەتتەردى ورىنداي الاتىنىن دالەلدەپ قانا قويماي, سونىمەن قاتار, وزگەلەرگە ۇلگى بولارلىقتاي دارەجەگە جەتتى. ءبىز وسىمەن دە ماقتانا ءبىلۋىمىز كەرەك. سوندىقتان بايتاق ەلىمىزگە قۇداي قۋات پەن اماندىق بەرسىن! * * * سايىن نازاربەك, قازاقستان جازۋشىلار, ساۋلەتشىلەر وداقتارىنىڭ مۇشەسى: – جاسىم جەتپىسكە كەلدى, تالاي مەيرامعا قا­تىسىپ ءجۇرمىن. بىراق ءدال بۇگىنگىدەي ەرەكشە كۇي­گە بولەنگەنىم سيرەك بولار. ەلىمنىڭ ەلدىگىنە قۋا­نىپ تۇرمىن وسى ءسات. اۋىزبىرلىگىمىز بار, بە­رە­­كە­مىز بار, ىنتىماقتى ەل ەكەنىمىزدى كور­سەت­تىك قوي. ەگەر قازاقستاندىقتار وسى قال­پى­نان تايماسا, الەمدەگى 50 ەلدىڭ بىرەۋى ەمەس, ال­عاش­قى­سى بو­لا­­تىنىنا سەنەمىن. حالىقتىڭ باعى قۇتتى بولعاي! بۇل – ءبىزدىڭ بابالارىمىزدىڭ عاسىرلار بويى قولى جەتپەگەن ارمانى ەدى عوي. تولە ءبيدىڭ, ايتەكەنىڭ, قازىبەكتىڭ, ابىلاي حان­نىڭ, ءتىپتى ودان ارعى بابالارىمىزدىڭ كوكەيىن تەسكەن ەلدىك مۇرات وسى ەمەس پە ەدى؟! جاڭا ەلىمىزدىڭ تۋىن زالعا اكەلگەندە, اتا زا­ڭى­مىزدى ۇلاندارىمىز الىپ شىققاندا وسى ءبىر ويلار جۇرەك تۇك­پىرىنەن شىمىرلاپ شىعىپ, جانىمدى تەربەتتى. ەلباسى اق كيىزدىڭ ۇستىندە تۇرىپ انت بەرگەندە ىشتەي شۇكىرشىلىك ەتىپ تۇردىم. تاۋبە! كەشەگى وتكەن سايلاۋدا حالىق ەلباسىعا سەنەتىنىن قالاي كور­سەت­تى؟ ءتىپتى كەزەككە تۇرىپ داۋىس بەردىك. بۇل – ەل سەنىمى. ال ازامات ءۇشىن ەل سەنىمىن ارقالاپ, حالقىنىڭ الدىنا بيىك ماقساتتار قويىپ, ونىڭ شىڭىنا حالقىمەن بىرگە شىققاننان ارتىق باقىت جوق. ءشۇ­كىر­شىلىك, ەلباسى 20 جىلدىڭ ىشىندە ەل سەنىمىنە سەلكەۋ تۇسىرگەن جوق. قازاق بالاسى ەلىنىڭ تاعدىرىنا سۇيىنەر زامان وسى بولار, ءسىرا! * * * اسەلحان قالىبەكوۆا, قازاقستاننىڭ حالىق اقىنى: – اقىن جۇرەگى مۇندايدا ەل-جۇرتىمەن ءبىر­گە اسىپ-تاسىپ جاتپاي ما؟ سوناۋ ءوڭتۇس­تىك­تىڭ شۇ­عى­لاسى ارقاعا اۋىپ كەلگەندەي بۇگىن ەسىل­دىڭ جا­عاسى ەرەكشە دۋمانعا بولەنىپ تۇر. ءوز تاڭداۋىن جاساعان حالىقتىڭ قۋانىشىندا شەك جوق. انت بەرۋ ءراسىمى رەسمي جاعدايدا ءوت­ىپ جاتسا, كوشەدەگى شەرۋ ەلباسىعا شىن قۇر­مەتتىڭ بەلگىسىندەي سەزىلەدى. كەۋدەمىزدى ماق­تانىش سەزىمى كەرنەيدى. ۇلت كوشباس­شى­سىن قالىڭ ەلى تۇگەل قولداپ جاتقاندا, ەندى مۇنداي كەزدە شاتتانباعاندا اقىن جۇرەگى قاشان اقتارىلادى. اقىنعا قۇرال بار ما تىلدەن ارتىق, اسپاندا شىراق بار ما كۇننەن ارتىق! بۇكىل ەل تىلەۋىڭدى تىلەپ وتىر, قازاققا پرەزيدەنت جوق سىزدەن ارتىق! – دەپ ەلباسىنىڭ وزىنە كەزەكتى ءبىر كەزدەسۋدە ايتقانمىن. سول ءبىر شۋماق جىر بۇگىنگى قۋا­نىش­تىڭ ۇستىندە تاعى دا ەسىمە ءتۇسىپ, كوڭىلىمدى كوكتەمگى سامالداي جەلپيدى. * * * بەكبولات مۇقىشەۆ, رەسپۋبليكالىق ارداگەرلەر ۇيىمى توراعاسىنىڭ ورىنباسارى: – ۇلىقتاۋ شاراسىنىڭ ءوتىپ جاتقانى ءبىز ءۇشىن قۋانىش ءارى ماقتانىش سەزىمىن تۋدى­را­تىن ەرەكشە وقيعا. بۇل ايتۋ­لى ماڭىزدى شارا حا­لىق كوڭىلىنەن شىعىپ جات­قانىنا ەشقانداي كۇمان بولماسا كەرەك. ەل باسشىسىنا دەنساۋ­لى­عىنىڭ جاقسى بولىپ, حا­لىققا رياسىز قىزمەت ەتۋىن تىلەيمىز. قازاقستان تاۋەلسىزدىگى ءۇشىن ايانباي تەر ءتو­گىپ كەلە جاتقان تۇڭعىش پرەزيدەنتىمىز نۇرسۇلتان نازارباەۆ ءالى دە بويىندا كۇش-قۋاتى مول ازامات. ەندى الدان نە كۇتەمىز دەگەنگە كەلسەك, ەلدىڭ ودان ءارى قاراي دامۋى بارشامىزدى تولعاندىراتىن ماسە­لە بولسا كەرەك. العا قويعان باستى ماقساتىمىز ەلۋ ىرگەلى مەم­لەكەتتىڭ قاتارىنان ويىپ تۇرىپ ورىن الۋ بولسا, ەڭ الدىمەن, ەكو­نومي­كا­مىزدى دامىتۋ بارشامىزعا ورتاق جاۋاپكەرشىلىك جۇكتەيدى. اسىرەسە, بىلىمگە ەرەكشە كوڭىل ءبولىنىپ, جاستاردى تاربيەلەۋ ىسىندە جاڭا باستامالار كوتەرىلگەنى ءجون. قازاقستاندا ءبىلىم سالاسىنا كو­ڭىل ءبولىنىپ تە جاتىر, بىراق سونى تەرەڭدەتە تۇسكەن ورىندى بولماق. * * * ۆەرا سيدوروۆا, سوتسياليستىك ەڭبەك ەرى: – مەن ءۇشىن نۇرسۇلتان نازارباەۆتى پرەزيدەنت رەتىندە ۇلىقتاپ جاتقان ايتۋلى وقيعا قازاقستاندا ۇلكەن مەرەكەنىڭ تويلانىپ جا­تۋى­مەن پارا-پار. ەلباسىن مەملەكەت باس­شى­سى ەتىپ قايتا سايلاۋ قازاقستان حالقىنىڭ اۋىز­بىر­شىلىگىن كورسەتتى. مەن مۇنى ۇلكەن جەڭىس ءارى باقىت دەپ باعالاعان بولار ەدىم. قازاقستاندىقتار ارقاشان دا ءوزىنىڭ ەڭ­بەكقور ءارى بەيبىتسۇيگىش حالىق ەكەنىن دالەل­دەپ كەلەدى. اسىرەسە, وزگە ۇلتتار مەن ۇلىستاردىڭ وكىلدەرىن باۋى­رى­نا باسىپ, قامقورلىق تانىتىپ كەلە جاتقان قازاق حالقىنا دەگەن ريزاشىلىعىمىز شەكسىز. مىنە, وسىنداي ورەلى دە بەرەكەلى ەلدى باسقارىپ وتىرعان نۇرسۇلتان ءابىش ۇلىنا ۇزاق ءومىر, مىقتى دەن­ساۋلىق تىلەيمىن! قازاقستان رەسپۋبليكاسى الدىندا تۇرعان بارلىق جوسپارلاردىڭ ورىندالۋىنا دا تىلەكتەستىگىمدى جەتكىزگىم كەلەدى. مەنىڭ وسى رەتتە ايتايىن دەگەنىم, جىل سايىن حالىقتىڭ تۇرمىس جاعدايى جاقسارىپ, ءال-اۋقاتى جوعارىلاي تۇسۋدە. سونىمەن قاتار, رۋحاني ءومىرىمىز دە بايىپ, ەلدىڭ قورعانىس قابى­لەتى دە ارتۋدا. الايدا, ءبىر شەشىمىن كۇتكەن پروبلەما دا جوق ەمەس. ول, ارينە, اۋىل شارۋاشىلىعى سالاسىنا قاتىستى. ەگەر ءبىز وسى سالانى ايا­عىنان نىق تۇرعىزا الساق, وندا حالىق تۇرمىسى بۇدان دا ارتاتىنى انىق. * * * ءاسانالى ءاشىموۆ, كسرو جانە قازاقستاننىڭ حالىق ءارتىسى: – قارا ورمانداي قالىڭ قازاق بۇگىن ءوزىنىڭ تاڭداعان باسشىسىن اق كيىزدىڭ ۇستىنە شىعا­رىپ, انت قابىلداۋ راسىمىنە كۋا بولدى. جۇر­تى­مىز كوڭىلى قالاعان, قانشا جىلدان بەرى كوپتىڭ كوكەيىنە سەنىم ۇيالاتقان ازاماتىنا دا­ۋىستارىن بەرىپ, كەلەشەك باعىت-باعدارىن اي­قىندادى. ەلباسى ءوزىنىڭ قىزمەتكە كىرىسۋ ءرا­سىمىندە وسى سەنىمنىڭ ۇدەسىنەن شىعاتىن وي-بايلامدارىن ورتاعا سالدى. سونداعى ايتىل­عان ىستەر جۇزەگە اسىرىلىپ, العا قويىلعان مىندەتتەر ويداعىداي اتقا­رىل­سا, ەلىمىز الدىڭعى قاتارلى دامىعان ەلۋ ەلدىڭ قاتارىنا ءالى-اق قو­سى­لارىنا كۇمانىم جوق. بۇعان پرەزيدەنتتىڭ كۇش-قۋاتى, اقىل-پا­را­ساتى, ەرىك-جىگەرى مەن ءبىلىم-بىلىگى مولىنان جەتەرىن ءوزىمىز تۇگىل سىرت كوز – سىنشىلار دا اشىق ايتۋدا. سوندىقتان ەلدىڭ ەرتەڭى سەنىمدى باسشىنىڭ قولىندا دەپ بىلەمىن. قازاقستانىن جي­ىر­ما جىلدىڭ ىشىندە زور بەلەسكە كوتەرە بىلگەن نۇرەكەڭ مۇنان كەيىن دە سول قار­قىنىنان تايمايتىنى انىق. ول انت بەرىپ تۇرىپ, وسىنى قاداپ ايتتى. ەڭ باستىسى, حالىقتىڭ ءال-اۋقاتى مەن مادەنيەتى كوشتەن قالماي كوركەيسە ەكەن. ەلىمىز تىنىش, جۇرتىمىز امان بولسا ەكەن. شەتەلدەردەگى نەبىر سويقان وقيعالاردى كورگەندە جانىڭ تۇرشىگەدى. مادەنيەت پەن ونەردى العا وزدىرۋ تۇگىلى ءومىر ءسۇرۋدىڭ ءوزى قيىنداپ تۇرعان زاماندا بايتاق دالانىڭ بايراعى كوككە جەلبىرەپ, ەكونوميكالىق تا, رۋحاني دا قارقىندى دامي ءتۇسۋى قازاقتىڭ ماڭ­دايى­نا جاراتقاننىڭ بۇيىرت­قان ءبىر ارتىعىراق سىيى ما دەپ ويلايسىڭ. سول باقتان لايىم ايىر­ماسىن, ەلباسىمىز ەلىنە ادال قىزمەت ەتە بەرسىن! * * * حاسەن مولداباەۆ, الماتى وبلىسى, ەڭبەكشىقازاق اۋدانى, ەسىك قالالىق ارداگەرلەر كەڭەسىنىڭ توراعاسى: – ەڭبەكشىقازاق اۋدانىنان وسىندا ءبىر توپ دەلەگاتسيانىڭ قۇرامىندا پرەزيدەنتتى ۇلىق­تاۋ راسىمىنە كەلگەنىم ءبىز سياقتى ارداگەرلەرگە, ەڭبەك ادامدارىنا كورسەتىلىپ وتىر­عان قۇرمەت دەپ سانايمىن. بۇكىل حالىق بو­لىپ ەلبا­سى­مىز­دى ءبىراۋىزدان سايلاۋدىڭ ءوزى ەلىمىزدىڭ اۋ­ىزبىرلىگى مەن ىنتىماقتى تىرشىلىگىن كورسەتتى. بۇل سايلاۋ حالىقتىڭ ماڭگى ەسىندە قالىپ قويا­تىنداي تاريحي وقيعا بولدى. ەندى ۇلىقتاۋ راسىمىنە قاتىسقاندا ويعا تۇيگەنىم, بۇل دا ەل ەسىندە ماڭگى قالارداي ەلەۋلى ساياسي شارا. ۇرپا­عىمىزدىڭ ەرتەڭگى كۇنىنە سەنىمدى اياق باسۋىنا ەلباسىمىز بۇگىنگى انت قابىلداۋ ارقىلى كوزىمىزدى جەتكىزدى. تاۋەلسىزدىك سارايىنىڭ ىشىندەگى وسى راسىمگە بايلانىستى ۇيىمداستىرىلعان شارالار, ەل­ور­دانىڭ ەڭسەسىن بيىكتەتكەن ءزاۋلىم عيماراتتار مەن مادەني وشاق­تار, شەرۋگە شىعىپ, ەلباسىعا قۇرمەت كورسەتكەن قاراپايىم قالا تۇرعىندا­رى­نىڭ كوتەرىڭكى كوڭىل-كۇيى بىزگە دە ەرەكشە اسەر ەتتى. ەلباسىعا ارداگەرلەر اتىنان زور دەنساۋلىق تىلەي وتىرىپ, الداعى ۋاقىتتا تا حالقىڭا ادال قىزمەت اتقارا بەر دەپ سەنىم ارتامىز. * * * راۋكەن وتىنشين, «قازاقستان» ۇا» اقتوبە فيليالىنىڭ ديرەكتورى: – تاۋەلسىزدىك سارايىنداعى وسى راسىمگە كۋا بولعان قاي ادامنىڭ دا كوڭىلى تولقىدى دەپ بىلەمىن. سەبەبى, بىزدەر تاريحي ءساتتىڭ كۋاسى بول­دىق. بىزدەن كەيىنگى تولقىن, كەلەر ۇرپاق تاريحتان وقيتىن ءساتتىڭ ىشىندە بولىپ, سونىڭ اۋاسىمەن تىنىستادىق. رۋحىمىز بيىكتەپ, كەۋدەمىزدى كەرىپ, ۇلى مەملەكەتتىڭ ازاماتى ەكەنىمىزگە قۋانىپ تۇردىق. ءبىزدىڭ اقتوبە وبلىسى كەشەگى وتكەن سايلاۋدا ەلباسىن قانشا­لىقتى قولدايتىندىقتارىن جوعارى پايىزدىق كورسەتكىشىمەن دالەل­دەدى. سەنىمدەرىن بەرگەن داۋىستارىمەن دايەكتەدى. مەن ءوزىم بايقاۋشى رەتىندە وسى داۋىس بەرۋ ۇدەرىسىندە ۇزبەستەن بولدىم. حالىق بار ىن­تا­سىمەن, ىقىلاسىمەن كەلىپ, سايلاۋدى مەرەكەدەي ەتتى. بۇل تەك ەرتە­ڭىنە سەنگەن ەلدە بولاتىن عانا قۇبىلىس دەسەم ارتىق ايتقاندىق بولماس. ەلباسى ەلدىڭ بولاشاعىن ايتقاندا ۇنەمى ۇدەمەلى يننوۆاتسيالىق دامۋدى العا تارتادى. ال ءبىزدىڭ وبلىسىمىز وسى ءىستى دامىتۋ جاعىنان الدىڭعى قاتاردا كەلەدى. حالىقتىڭ ەلباسىعا قالتقىسىز سەنۋىندە وسىنداي ۇلكەن كەلەشەكتى العا ۇستاعان بيىك ماقساتتاردىڭ اسەرى بار. ەل دە, ەلباسى دا ءبىر ماقساتقا جۇمىلۋدا. ەندەشە, بىرىگە قيمىلداعان جۇرت قانداي اسۋدى بولسا دا باعىندىرادى. اقتوبەلىكتەر دە ءتاۋ­ەلسىز قازاقستاننىڭ مەرەيى ۇستەم بولۋىنا ءوز ۇلەستەرىن قوسا بەرمەك. * * * داريكو حاسانعاليەۆا, الماتى قالالىق «قىزىل اي» قوعامىنىڭ ءتورايىمى: – وسى تۇرعانىمدا-اق جۇرەگىم لۇپىلدەپ تۇر, وتە قۋانىشتىمىن. پرەزيدەنتىمىز حالقى­نا انت بەرگەن ساتكە كۋا بولعانىم ءۇشىن ءوزىمدى باقىتتى سەزىنىپ, تولقىدىم. مەنىڭ ادام رەتىندە, انا رەتىندە تىلەگىم – قازاق حالقى ءوزى سەن­­گەن ەلباسىمەن بىرگە امان بولىپ, جۇرت جەتپەگەن بيىكتەرگە شىقسا. ىنتىماقپەن, قۋا­نىش­پەن, بەرەكەلى تىرلىكپەن 20 جىلدا باعىن­دىرعان اسۋلارىنان ءارى اسىپ, تابىستارىن ەسەلەي تۇسسە, بايرا­عى­مىز جەلبىرەي بەرەتىنىنە, قازاق دەگەن حالىقتى الەم تانىپ, موي­ىن­دايتىنىنا سەنەمىن. ءبىزدىڭ ەلباسىنىڭ بەدەلى حالىقارالىق ارەنادا دا مىقتى ەكەنىنە كوزىمىز جەتىپ ءجۇر. بىلتىرعى جىلى ەۋروپاداعى قاۋىپسىزدىك جانە ىنتىماقتاستىق ۇيىمىنا توراعا بولىپ, وسى بۇگىن ۇلىقتاۋ ءراسىمى وتكەن زالدا ۇيىمعا مۇشە 56 ەلدىڭ باسشىلارى 11 جىلدان بەرگى وتكىزىلمەگەن سامميتكە جينالدى. وسىدان ءبىرشاما جىل بۇرىن شەتەلدەردە ءبىزدىڭ ەلىمىزدى بىلە قويمايتىن. قازىر قازاقستان دەسەڭ: «و, نازارباەۆ, استانا», دەپ ءبىلىپ جاتادى. ەۋرازيانىڭ جاۋھارىنداي استانامىز قانداي اسەم. ول –تاۋەلسىزدىگىمىزدىڭ بەلگىسى, ەلباسىمىزدىڭ كەمەل قايراتىنىڭ جەمىسى ەمەس پە؟! سوندىقتان مەن بارشا قازاقستاندىقتاردى بۇگىنگىدەي مەرەكەمەن شىن جۇرەگىممەن قۇتتىقتاعىم كەلەدى. ەلىمىز امان, جۇرتىمىز تىنىش بولسىن! * * * ايكۇمىس دوسانوۆا, ماڭعىستاۋ وبلىسى, تۇپقاراعان اۋداندىق ءماسليحاتىنىڭ حاتشىسى: – 3 ساۋىردە وتكەن كەزەكتەن تىس پرەزيدەنتتىك سايلاۋدا مەن تۇپقاراعان اۋدانى بويىنشا ەلباسىنىڭ سەنىمدى وكىلى بولدىم. بۇل سايلاۋ سوڭعى 20 جىلدىڭ ىشىندە ءبىزدىڭ ەلباسىمىزعا دەگەن حالىق سەنىمىنە سەلكەۋ تۇسپەگەنىن كورسەتىپ بەردى. وتە ءبىر قيىن كەزەڭدە «كىمگە سەنەمىز؟», «كىمنىڭ سوڭىنان ەرەمىز؟», «نە ىستەيمىز؟» دەگەن ەلەڭ-الاڭ ۋاقىتتا حالىق ەلباسىعا سەنىم كورسەتىپ, مەملەكەتتىڭ تىزگىنى مىقتاپ ۇستالىپ ەدى. سول سەنىمىمىز اقتالدى. 20 جىلدىڭ ىشىندە مەملەكەتىمىز ۇلكەن بيىكتەرگە كوتەرىلدى. وركەنيەتتە ءوز ورنىن الدى. شارۋامىز وڭالدى. حالقىمىزدىڭ الەۋمەتتىك جاعدايى جاقساردى. ءبىزدىڭ قازاقستاندى دامىعان, دەموكراتيالى ەل رەتىندە دۇنيە ءجۇزى تانىدى. كەشەگى سايلاۋعا ءبىزدىڭ تۇپقاراعان اۋدانىنىڭ سايلاۋشىلارى تەگىستەي قاتىستى, ياعني ساياسي ناۋقانعا قاتىسقانداردىڭ 99 پايىزى بەلسەندىلىك تانىتتى. حالىقتىڭ 99 پايىزعا جاۋىعى ءبىراۋىزدان ەلباسىن جاقتاپ, داۋىس بەردى. ءبىز ەلباسىن ۇلىقتاۋ راسىمىنە قاتى­سىپ, ءوزىمىزدىڭ بويىمىزعا ۇلكەن كۇش-جىگەر جيناعانداي بول­دىق. ەلباسىعا اماندىق تىلەپ, وسى ءوتىپ جاتقان شارالاردىڭ بار­لى­عىنىڭ قايىرى بولسىن دەيمىز. ءبىزدىڭ الدىمىزدا بولاشاقتى كوز­دەگەن 2020 جىلعا دەيىنگى مەملەكەتتىك باعدارلامامىز, ۇدەمەلى ين­دۋستريالاندىرۋ باعدارلامالارى بار. مىنە, وسى باعدارلا­ما­لار­دىڭ ىسكە اسۋىنا بارلىعىمىز ءبىر ادامداي قاتىسىپ, ەلباسىعا كومەكشى رەتىندە جۇمىس ىستەيتىن بولامىز.