جول قۇرىلىسىنا «جاسىل ەل» قاتىسادى

«باتىس ەۋروپا – باتىس قىتاي» حالىقارالىق ترانزيت ءدالىزىن قايتا سالۋ جوباسى جول وتەتىن وڭىرلەردە عانا ەمەس, بۇكىل رەسپۋبليكا كولەمىندە ۇلكەن قىزىعۋشىلىق تۋدىرىپ وتىرعانى بەلگىلى. جوبا باستالعالى بەرى قۇرىلىس جۇمىستارىنا 34 مىڭ ادام تارتىلعان بولاتىن.           ال كولىك جانە كوممۋنيكاتسيا مينيسترلىگى «جاسىل ەل» ەڭبەك جاساقتارى «عاسىر جوباسىنا» قاتىساتىندىعىن مالىمدەپ وتىر. ەندى «عاسىر قۇرىلىسىن» ىسكە اسىرۋعا «جاسىل ەل» جاستار ەڭبەك جاساقتارى دا قاتىساتىن بولدى. بۇل وتكەن ايدا قول قويىلعان «جاسىل ەل» جاستار ەڭبەك جاساقتارىنىڭ رەسپۋبليكالىق شتابى» جەكە مەنشىك مەكەمەسى مەن كولىك جانە كوممۋنيكاتسيا مينيسترلىگىنىڭ اۆتوموبيل جولدارى كوميتەتى  اراسىنداعى ءوزارا تۇسىنىستىك تۋرالى مەموراندۋمدا بەكىتىلگەن. دالىرەك ايتقاندا, بيىل ستۋدەنتتەردىڭ جازعى دەمالىسى كەزىندە قۇرىلىس جۇمىستارىنا 400-دەي جاستار تارتىلادى. وسىعان وراي, قازىرگى تاڭدا قۇرىلىس جۇمىستارى ءجۇرىپ جاتقان 4 وبلىستاعى اۆتوموبيل جولدارى كوميتەتىنىڭ وبلىستىق دەپارتامەنتتەرىنە «جاسىل ەل» مۇشەلەرىنىڭ جۇمىسىن ۇيىمداستىرۋ جونىندە تاپسىرمالار بەرىلگەن. ايناش ەسالي.