مەرگەن قىزدار سايىسى

وبلىستىق مادەنيەت باسقارماسىنىڭ قول­داۋى­مەن  كەڭەس وداعىنىڭ باتىرى ءاليا مول­داعۇلوۆا اتىنداعى وبلىستىق مە­موريال­دىق  مۇراجايى مەن «ءاليا» پاتريوت­تىق ورتا­لىعى  العاش رەت  تاۋەلسىزدىكتىڭ 20 جىل­دى­عىنا ارنال­عان رەسپۋبليكالىق «مەرگەن ارۋ-2011»  پنەۆ­ما­تي­كالىق مىلتىق اتۋدان اسكەري-سپورت­تىق سايىس وتكىزدى. اقتوبە مۇناي-گاز كول­لەدجىنىڭ سپورتتىق كەشەنىندە وتكەن سايىسقا اس­تانا قا­لاسى مەن اقتوبە, اقمولا, الماتى, اتىراۋ, ماڭ­عىستاۋ, قوستاناي, قارا­عان­دى, با­تىس قا­زاقستان, شى­عىس قازاقستان وبلىستا­رى­نان  كو­ماندالار قاتىستى. ءار كوماندانىڭ قۇ­را­مىن­دا الدىن الا ىرىكتەۋ سىنىنان وتكەن 4 قىز بولدى. شارانى ۇيىمداستىرۋداعى باستى ماقسات — جاستارعا مادەني جانە اسكەري-پاتريوتتىق تاربيە بەرۋ جۇيەسىن قالىپتاستىرۋ, قىزدار اراسىندا اسكەري-قولدانبالى سپورت ءتۇرىن دا­مى­تۋدى ناسيحاتتاۋ. مەرگەندەر سايىسىنا  9-11 سى­نىپ ارالىعىنداعى وقۋشى قىزدار قاتىستى. وسىمەن سەگىزىنشى رەت ۇيىمداستىرىلىپ وتىرعان سايىس  بيىل تۇڭعىش رەت رەسپۋبليكالىق دارە­جە­دە وتكىزىلدى.  «مەرگەن ارۋ-2011» رەسپۋب­لي­كا­لىق سايىسىنا قاتىسۋشى كوماندالار مەن شا­قىرىلعان قوناقتار  ءاليا مولداعۇلوۆانىڭ مە­مو­ريالدى كەشەنىندە باتىر قىزدىڭ رۋحىنا تاع­زىم ەتىپ, گۇل شوقتارىن قويدى. سايىستىڭ  ارنايى ەرەجەسى بويىنشا,  ءار وب­لىس وزدەرىنىڭ پنەۆماتيكالىق مىلتىعى جانە وق­تارىمەن قامتاماسىز ەتىلدى. سايىس شارتى بو­يىن­شا, قاتىسۋشىلار تۇرەگەلىپ تۇرىپ, 10 مەتر قاشىقتىقتا وقتى نىساناعا ءدال تيگىزۋى قاجەت. سايىس بارىسىندا  ەڭ جوعارى بالل جينا­عان اقتوبە قالاسىنداعى №37 ورتا مەكتەپتىڭ وقۋ­شى­سى يانا باديكوۆا «مەرگەن ارۋ-2011» اتا­عىن جەڭىپ الدى. اقتوبە قالاسىنداعى №6 جانە №27 ورتا مەكتەپتىڭ وقۋشىلارى دانا ەسەن­عا­زي­نا مەن تاتيانا زينچەنكو وق­تا­رىن  نىساناعا مەيلىنشە ءدال تيگىزىپ, ەكەۋى دە جۇلدەلى ەكىنشى ورىنعا لايىق دەپ تانىلى. ورال­­دىق  جانە ماڭعىستاۋلىق نادەجدا يۆانوۆا مەن نۇرزيا كۋرەشوۆا ءۇشىنشى ورىندى قاناعات تۇت­تى. كومان­دالىق ەسەپ بويىنشا, اقتوبەلىك قىزدار ءبىرىنشى, باتىس قازاق­ستان وبلىسىنىڭ كومان­دا­سى  ەكىن­شى ورىندى يەلەندى. اس­تا­نالىق قىزدارعا ءۇشىنشى ورىن بۇيىردى. «مەرگەن ارۋ-2011» رەس­پۋبليكالىق  سايىسىنىڭ جە­ڭىم­پازدارى وبلىستىق مادەنيەت باسقارماسىنىڭ قۇرمەت گرامو­تا­لارىمەن جانە باعالى زاتتاي سىيلىقتارمەن ماراپاتتالدى. ساتىبالدى ءساۋىرباي, اقتوبە وبلىسى.