قىزىلوردالىقتار ءوزىنىڭ بولاشاعىنا سەنىمدى بولا ءتۇستى – كوشەرباەۆ

بۇل تۋرالى 15 اقپانداعى تۇرعىندارمەن ەسەپتى كەزدەسۋىندە  قىزىلوردا وبلىسىنىڭ اكىمى قىرىمبەك كوشەرباەۆ حابارلادى. كەزدەسۋ بارىسىندا ول   جىل سايىن باق-تا جاريالاناتىن وبلىستىڭ الەۋمەتتىك-ەكونوميكالىق دامۋىنىڭ باسىم باعىتتارىن بەينەلەيتىن وبلىس اكىمىنىڭ ءىس-قيمىل جوسپارىنىڭ جۇزەگە اسىرىلۋ بارىسى تۋرالى ايتتى. «2016 جىلعا ارناپ قابىلدانعان وبلىس اكىمىنىڭ ءىس-قيمىل جوسپارى, بۇدان  2 جىل بۇرىن قابىلدانعان باعدارلامالار سەكىلدى. نەگىزىنەن, داعدارىسقا قارسى ءىس-قيمىل جوسپارى قىزمەتىن اتقاردى. جىلدىڭ نەگىزگى باسىمدىقتارى جۇمىسپەن قامتۋ مەن الەۋمەتتىك قورعاۋ ماسەلەلەرى, باعانى رەتسىز وسىرمەۋ, ەكونوميكانى ءارتاراپتاندىرۋ مەن ينفراقۇرىلىمدى بيۋدجەتتىك مۇمكىندىكتەردىڭ شەكتەۋلىگىنە بايلانىستى مەملەكەتتىك-جەكەلىك سەرىكتەستىك پەن حالىقارالىق قارجى ۇيىمدارى ارقىلى دامىتۋ ماسەلەلەرى بولدى», – دەپ اتاپ ءوتتى ايماق باسشىسى. 2016 جىلدىڭ ءىس-قيمىل جوسپارىنا 207 شارا ەنگىزىلگەن بولاتىن. «2015 جىلدىڭ وزىندە قىزىلوردا وبلىسىندا تابيعي ءوسىم 1000 ادامعا شاققاندا 20 پروميللە بولسا (1000 ادامعا شاققاندا 20 ادام), 2016 جىلى بۇل كورسەتكىش 21,2 پروميللەگە  جەتتى. دەمەك, جۇرت ءوزىنىڭ بولاشاعىنا سەنىمدى بولا باستاعان. تۋ كورسەتكىشى ءوسىپ, ءولىم كورسەتكىشى ازايدى», – دەپ مالىمدەدى وبلىس اكىمى.