قىزىلوردا وبلىسىنىڭ اكىمى قوعامدىق كەڭەس الدىندا ەسەپ بەردى

قىزىلوردا قالاسىنداعى دوستىق ۇيىندە وبلىس اكىمى قىرىمبەك كوشەرباەۆتىڭ قوعامدىق كەڭەس الدىنداعى ەسەپتى كەزدەسۋى ءوتتى. وندا ايماق باسشىسى وتكەن جىلدىڭ دامۋ قورىتىندىسى بويىنشا بايانداما جاسادى. اكىمنىڭ ايتۋىنشا, 2016 جىل بارلىق سالالار ءۇشىن تابىستى بولدى. سوڭعى 4 جىلدا شيكىزاتتىق ەمەس سەكتور كولەمى 52 پايىزعا (قر بويىنشا 4 پايىزعا) ءوستى. ەڭبەك ونىمدىلىگى 6 ەسەگە (قر بويىنشا 2,4 ەسەگە) ارتتى. سوڭعى 3 جىلدا وبلىس ورتالىعىندا 11 شاعىن اۋدان بوي كوتەردى. وبلىس اكىمى سوڭعى 4 جىلدا قىزىلوردا وبلىسىندا ءبىلىم سالاسىن قارجىلاندىرۋ ەكى ەسەگە وسكەنىن اتاپ ءوتتى. ايماقتا ءۇش اۋىسىمدىق مەكتەپتەر مەن بۇلدىرشىندەردى بالاباقشامەن قامتۋ ماسەلەسى تولىعىمەن شەشىلگەن. - جىل سايىن قازاقستاننىڭ جوعارى وقۋ ورىندارىندا ءبىلىم الۋ ءۇشىن كوپبالالى جانە الەۋمەتتىك از قامتىلعان وتباسىلاردان شىققان  350 تۇلەككە  وبلىس اكىمىنىڭ گرانتى بولىنەدى. قىزىلوردا وبلىسى – ماسكەۋ جانە سانكت-پەتەربۋرگ قالالارىنداعى جەتەكشى تەحنيكالىق جوعارى وقۋ ورىندارىندا ءبىلىم الۋ ءۇشىن رف ۇكىمەتىنىڭ 150 گرانتىن الىپ وتىرعان جالعىز ايماق. مەن ءۇشىن بۇل – ۇلكەن كورسەتكىش,- دەدى قىرىمبەك كوشەرباەۆ. قوعامدىق كەڭەستىڭ اۋىلشارۋاشىلىق جانە تابيعات پايدالانۋ ماسەلەلەرى جونىندەگى سالالىق كوميسسياسىنىڭ توراعاسى سەرىكباي ومىرزاقوۆ جىل بويى اتقارىلعان جۇمىستاردىڭ ناتيجەسىن, ونىڭ ىشىندە كۇرىشتەن جينالعان رەكوردتىق ءونىم, «اق التىننىڭ» جاڭا سورتتارىن دامىتۋ تۋرالى باياندادى. قوعامدىق كەڭەستىڭ كاسىپكەرلىك, ينۆەستيتسيا جانە يننوۆاتسيالىق دامۋ ماسەلەلەرى جونىندەگى  سالالىق كوميسسياسىنىڭ توراعاسى عالىمبەك جاقسىلىقوۆ ايماقتاعى كاسىپكەرلىكتى قولداۋ, شاعىن جانە ورتا  بيزنەستى دامىتۋعا جاسالعان قامقورلىقتار جايىندا ايتتى.    وبلىستىق قوعامدىق كەڭەس توراعاسىنىڭ ورىنباسارى باقبەرگەن دوسمامبەتوۆ  ءبىلىم جانە جاستاردى قولداۋ سالاسىنداعى جۇمىستار تۋرالى باياندادى. سونداي-اق وبلىس كولەمىندە اتقارىلعان جۇمىستار جونىندە قوعامدىق كەڭەس مۇشەلەرى قارشىعا ەسىمسەيىتوۆا, ۆلاديمير تولوكوننيكوۆ جانە امانجول وڭعارباەۆ بايانداما جاسادى.