پاۆلوداردا قوعامدىق كولىكتەرگە ارنالعان قوسىمشا ىسكە قوسىلادى

پاۆلوداردا اعىمداعى جىلدىڭ مامىر ايىندا قوعامدىق كولىكتەردىڭ ءجۇرۋ ۋاقىتى تۋرالى اقپارات بەرەتىن ءموبيلدى قوسىمشانى ىسكە قوسۋ جوسپارلانىپ وتىر, دەپ حابارلايدى pavlodarnews.kz. قالا اكىمىنىڭ ءباسپاسوز حاتشىسى سالتانات اكىمبەكوۆانىڭ ايتۋىنشا, بۇگىنگى كۇنى پاۆلودارلىق جانە استانالىق فيرمالار قوسىمشانىڭ جوباسىن دايىنداۋدا. «ازىرگە قوسىمشانىڭ قىزمەتى مەن GPS قۇرىلعىسىنىڭ ەنگىزىلۋى, جوبانىڭ قۇنى قالاي بولارى بەلگىسىز. ناۋرىز ايىنىڭ باسىندا قالالىق تۇرعىن ءۇي-كوممۋنالدىق شارۋاشىلىق ءبولىمى جوبانى بەكىتىپ, قاجەتتى قارجىعا سۇرانىس جولدايدى. كەيىن كونكۋرس جاريالانىپ, زاماناۋي جوبانى جاساپ شىعاراتىن جەڭىمپاز مەردىگەر انىقتالادى», - دەدى ءباسپاسوز حاتشىسى. سونداي-اق, پاۆلودار قالاسىنىڭ تۇرعىن ءۇي ينسپەكتسياسى دا پاتەر يەلەرىنىڭ كووپەراتيۆتەرىنە (پيك) ارنالعان قوسىمشانى جارىققا شىعارماق. بۇل جوبادا قالا بويىنشا پيك باسشىلارى مەن ارنايى مامانداردىڭ تەلەفون نومىرلەرى كورسەتىلىپ, تۇراقتى ساراپتاما جاسالىپ تۇراتىن بولادى.