ەلباسى قازاقستاننىڭ جاڭعىرۋىن ءۇش كەزەڭگە ءبولىپ قاراستىرا وتىرىپ, وسى جولداۋ ارقىلى قازاقستاندى ءۇشىنشى جاڭعىرتۋعا مىندەت قويدى. ەلباسىمىز ەل تاريحىنا كوز جۇگىرتە كەلە ءبىرىنشى جاڭعىرۋدىڭ قازاقستاننىڭ دەربەس مەملەكەت بولىپ قۇرىلعان كەزەڭىنە, ەكىنشى جاڭعىرۋدىڭ «قازاقستان-2030» ستراتەگياسىنىڭ قابىلدانۋى مەن ەلوردامىز استانانىڭ سالىنۋىنا ورايلاس كەلگەنىنە نازار اۋداردى. بۇگىنگى كۇندە وسى ارەكەتتەردىڭ ناتيجەلى ەڭسەرىلگەنىنە جانە ەلىمىزدىڭ ەكونوميكالىق تۇرعىدان ەداۋىر دامىعاندىعىنا ءبارىمىز كۋا بولىپ وتىرمىز.
مەملەكەت باسشىسى ەلىمىزدىڭ دامۋىندا جيناقتالعان وسىنداي مول تاجىريبەلەردەن كەيىن ءۇشىنشى جاڭعىرۋعا اياق باسۋدى مىندەتتەي وتىرىپ, بۇل جولعى جاڭعىرۋدىڭ جارقىن بولاشاققا باستايتىنىن جانە بەس ينستيتۋتتىق رەفورمانى جۇزەگە اسىرۋعا باعىتتالعان «100 ناقتى قادام» ۇلت جوسپارى ارقىلى جۇزەگە اساتىنىن مالىمدەدى. بيىلعى جولداۋدا باسقا دا وزەكتى ماسەلەلەرمەن قاتار ءدىني سالاسىندا ورىن الىپ وتىرعان ماسەلەگە دە ۇلكەن كوڭىل ءبولىندى. قازىرگى كۇندە ءدىني ەكسترەميزم ماسەلەسى – الەمدىك دەڭگەيدەگى ەڭ وزەكتى ماسەلەلەردىڭ ءبىرى. قازىرگى الەمدەگى جاھاندانۋ ۇدەرىسىندەگى تولاسسىز اقپاراتتاردىڭ قولجەتىمدىلىگى جاستاردىڭ بويىندا سول اقپاراتتاردى ەلەكتەن وتكىزە ءبىلۋدى جانە تەرىس پيعىلدى يدەولوگيالارعا قارسى تۇرا الاتىن يممۋنيتەتتى قالىپتاستىرۋدى قاجەت ەتەدى. ويتكەنى, جات پيعىلدى اعىمداردىڭ ىقپالىنا تۇسكەن ادامداردىڭ مۇنداي ارەكەتتەرگە بارۋىنىڭ باستى سەبەبى, ولاردىڭ ءدىن سالاسىنداعى ماسەلەلەر بويىنشا ساۋاتتىلىعىنىڭ تومەندىگىنەن تۋىنداپ وتىر. قازىرگى تاڭدا ينتەرنەتتىڭ قولجەتىمدىلىگىن جات پيعىلدى ءدىني اعىمدار مەن ۇيىمدار ءوز يدەيالارىن تاراتۋعا جانە قاتارلارىن كوبەيتۋگە كەڭىنەن پايدالانۋدا.
مىنە, بيىلعى جولداۋدا ءدىني ەكسترەميزمنىڭ الدىن الۋ جانە عالامتور مەن الەۋمەتتىك جەلىلەردە ولاردىڭ جولىنا ناقتى توسقاۋىل قويۋ ماسەلەسى وسى جاعدايلاردى تەرەڭ وي ەلەگىنەن وتكىزۋدەن تۋىنداعانى ءسوزسىز. بيىلعى جولداۋدىڭ ەرەكشە ايتا كەتەتىن تاعى ءبىر تۇسى – ول وسكەلەڭ ۇرپاقتى رۋحاني-ادامگەرشىلىك رۋحىندا تاربيەلەۋدىڭ اسا ماڭىزدى ەكەندىگىنىڭ ايتىلۋىندا. ءبىز بۇكىل قوعام بولىپ جاستارىمىزدىڭ ساۋاتىن ارتتىرۋعا, ۇرپاعىمىزدى ادامگەرشىلىك رۋحىندا تاربيەلەۋگە, ۇلتتىق سالت-ءداستۇرىمىزدى بويلارىنا سىڭىرۋگە جانە ولاردى ەلى مەن جەرىنە جاناشىر ازامات ەتىپ تاربيەلەۋگە باسا ءمان بەرۋىمىز ءتيىس. ءبىزدىڭ جاس ۇرپاعىمىزدى جوعارى ادامگەرشىلىك رۋحتا تاربيەلەۋدە وتباسىلىق قۇندىلىقتاردىڭ الاتىن ورنىن انىقتاپ, اتا-انالاردىڭ جاۋاپكەرشىلىگىن كوتەرۋىمىز كەرەك-اق. وسى رەتتە, ەلباسى جولداۋىندا ايتىلعان مىندەتتەردى ىسكە اسىرۋعا باعىتتالعان كەشەندى جۇمىستار ءدىن سالاسىن رەتتەيتىن زاڭنامالارعا وزگەرىستەر مەن تولىقتىرۋلار ەنگىزۋدى دە كۇن تارتىبىنە قويارى انىق. سول جاعدايدا جاسوسپىرىمدەردىڭ اتا-انا مەن ۇلكەندەردىڭ باقىلاۋىنسىز ءدىني ءىس-شارالار مەن راسىمدەرگە قاتىسۋىن زاڭ ارقىلى ايقىنداۋ كەرەك دەپ ويلايمىن.
جالپى, ەلىمىزدىڭ قارقىندى دامۋىنا جانە الدىڭعى قاتارداعى وزىق ەلدەردىڭ قاتارىنا ەنۋىنە باعىتتالعان ەلباسى جولداۋلارى مەملەكەتىمىزدىڭ ساياسي, ەكونوميكالىق, الەۋمەتتىك, مادەني جانە رۋحاني تۇرعىدان دامىپ-وركەندەۋىنە باعىت سىلتەيتىن ماڭىزدى قۇجاتتار بولىپ تابىلادى. قازاقستان ازاماتتارىن قوعامىمىزدا نىق ورنىققان ەتنوسارالىق كەلىسىم مەن كونفەسسياارالىق اۋىزبىرشىلىكتى ساقتاي وتىرىپ, ەلباسى جولداۋىندا ايتىلعان باعىتتاردىڭ پارمەندى جۇزەگە اسىرىلۋىنا بارىنشا ۇلەس قوسۋعا شاقىرامىن.
عاريفوللا ەسىم,
ۇعا اكادەميگى
