«نۇرسۇلتان بالامنىڭ جولى نۇرلى بولسىن!»

105 جاستاعى اقتاۋلىق انانىڭ اق باتاسى

ەندى ءبىر جىلدان سوڭ جارتى عاسىرلىق مەرەيتويى اتالىپ وتەتىن اقتاۋ – جاستار قالاسى دەگەندى ءجيى ەستۋگە بولادى. شىندىعىندا سولاي. شاھار ءوندىرىستى مەكەن. جالىنداعان جاستار قالانى الىپ قۇرىلىستار الاڭىنا اينالدىرىپ تا وتىر. دەگەنمەن, كۇنى كەشە وتكەن كەزەكتەن تىس پرەزيدەنتتىك سايلاۋدا قالاداعى ارداگەرلەر مەن قادىرمەندى قاريا­لارىمىز بەلسەندىلىكتەرىمەن ەل نازارىن وزدەرىنە اۋداردى. №140 سايلاۋ ۋچاسكەسىندە 96 جاستاعى راۋشان يمانباەۆا اپامىز ءبىرىنشى بولىپ داۋىس بەرگەنىن كورىپ, ول كىسىنىڭ ءجۇرىسى شيراق, ءسوزى زەردەلى ەكەندىگىنە ريزا بولعانبىز. سول ساتتە قالا اكىمى وسپان قازاقباەۆ قالاداعى ەڭ قارت سايلاۋشى انانىڭ بار ەكەندىگىن جانە ول №42 سايلاۋ ۋچاسكەسىنە ءوزى بارىپ داۋىس بەرەتىندىگىن ايتىپ قالعان-دى. انىقتاي كەلە ول 105 جاستاعى ءنازيحان بەكەجانوۆا اپايىمىز بولىپ شىقتى. ەرتەسىنە عاسىر جاساعان انامەن جانە بالا, كەلىندەرىمەن كەزدەسىپ اڭگىمەلەسۋدىڭ ءساتى ءتۇستى. ءبىزدى انانىڭ كەنجە بالاسى وتان مەن كەلىنى جاڭىل قارسى الدى. اناسى بار ادامدار قارتايمايدى دەمەكشى, الپىستى القىمداعان كەنجە ۇلى وتان جاستاۋ كورىندى. مۇناي كومپانياسىندا جۇرگىزۋشى بولىپ جۇمىس جاسايدى ەكەن. ول يسان, دانيار اتتى اعالارى مەن اسىل اتتى اپايى تۋرالى دا اڭگىمەلەپ, وزدەرىنەن وربىگەن 17 نەمەرە, 30 شوبەرە, 4 شوپشەكتىڭ عاسىر جاساعان انانىڭ قۋانىشى مەن قىزىعى ەكەندىگىن ايتتى. اپايدى باعىپ, قاراپ وتىرعان نەمەرە بالا-كەلىنى بەرەكە مەن گۇلسىم بولىپ شىقتى. وسى كىسىنىڭ جاعدايى ءۇشىن مۇعالىمدىكتى دە ازىرگە جارتىلاي جاساپ ءجۇرمىن, – دەيدى گۇلسىم قارىنداسىمىز. اڭگىمەسىنە قاراعاندا, ءنازيحان اپايىمىز تۇرمىسقا ەرتەلەۋ, ياعني 14 جاسىندا شىعىپتى. ەرى سەيىتمۇحان بالىقشى بولعان. ۇلى وتان سوعىسى كەزىندە كۇن-ءتۇن دەمەي تەڭىزدە ايلاپ ءجۇرىپ مايدان ءۇشىن, جەڭىس ءۇشىن جۇمىس جاساپتى. اتتەڭ, ومىردەن ەرتە ءوتىپتى. ءتورت بالا تاربيەسىن ءنازيحان اپا اتقارعان. كۇنكورىس قامىمەن بالىقشى دا, قۇرىلىسشى دا, ءشوپشى دە بولىپتى. بىراق تا وسى جاسقا دەيىن بىردە-ءبىر رەت اۋىرىپ ەمدەلگەن كەزىن ەسىنە تۇسىرە المادى. تاعى ءبىر كەرەمەتى, ناماز وقۋدى 9-10 جاسىندا باستاپتى. اڭگىمە كەشە وتكەن پرەزيدەنتتىك سايلاۋعا اۋىستى. 105 جاسىندا سايلاۋ ۋچاسكەسىنە ءوزى بارىپ ازاماتتىق مىندەتىن وتەگەن اسىل انانى قاجىماس قايراتى, پايىمدى پاراساتتىلىعىمەن ەلىمىزدى بەرەكە-بىرلىكتىڭ التىن-ۇياسىنا اينالدىرعان تاۋەلسىز قازاق ەلىنىڭ تۇڭعىش پرەزيدەنتى نۇرسۇلتان نازارباەۆتىڭ حالىقتىڭ تەڭدەسى جوق قىزۋ قولداۋىنا يە بولىپ قايتادان ەل پرەزيدەنتى بولىپ سايلانعانىمەن قۇتتىقتادىق. وسى تۇستا نەمەرە كەلىنى گۇلسىم الدىڭعى كۇنى №42 سايلاۋ ۋچاسكەسىنە داۋىس بەرە بارعاندارىنداعى اناعا دەگەن حالىقتىڭ قوشەمەتى, ا.يساەۆا باستاعان ۋچاسكەلىك كوميسسيا مۇشەلەرىنىڭ قۇرمەتى مەن ايماققا تانىمال كاسىپكەر ازامات مەرەكە دۇيسەنباەۆتىڭ سىي-سىياپات جاساعانىن ريزاشىلىقپەن جەتكىزدى. انامىز اڭگىمە اراسىندا «ادال» دەگەن ءسوزدى ءجيى قايتالادى. كەزدەسۋ سوڭىندا عاسىر جاساعان اسىل انا ماڭعىستاۋلىقتار اتىنان ەلىن سۇيگەن, ەلى سۇيگەن «نۇرسۇلتان بالاما بەرەر باتام بار دەگەن-ءدى. ول بىلاي ەدى. – نۇرسۇلتان بالامىزدىڭ جولى بولسىن! مەنىڭ جاسىمدى بەرسىن. ادال ەڭبەگى جانا بەرسىن, ابىرويلى بولسىن! ەرىمىزدى, جەرىمىزدى ءپىر بەكەت اتانىڭ ارۋاعى قولداسىن! ءاۋمين!». ال ءبىز عاسىر جاساعان اسىل انانىڭ وسىناۋ اق باتاسىن ەلىمىزدىڭ باس گازەتى ارقىلى كوپشىلىككە جەتكىزۋدى ماقسات ەتتىك. جولامان بوشالاق, اقتاۋ.