كەڭىستىكتى ينتەرنەت ارقىلى يگەرۋ قانداي عاجاپ دەسەڭىزشى. مەنى ىزدەسەڭىز – «ءوز الەمىمنەن» تاباسىز. ينتەرنەتتەگى مەنىڭ «ءوز الەمىم» قىزىقتى, سۋ جاڭا, كوڭىل كوتەرەتىن جاڭالىقتارعا, ءتۇرلى-ءتۇستى سۋرەتتەرگە, ۆيدەوجازبالارعا تولى. جۇمىسىما كەلگەن بەتتە شۇعىل شارۋالارىمدى تەزىرەك ءبىتىرىپ, ءوز الەمىمە تەزدەتىپ كىرۋگە اسىعام. وندا مەنى قانداي قىزىقتار كۇتىپ تۇرعانىن ەلەستەتىپ كورسەڭىز عوي. ونىڭ ىشىندە قاندايى جوق دەيسىز؟ نە ىزدەسەڭىز ءبارى تابىلادى. تەك ىزدەي ءبىلۋ كەرەك. ينتەرنەت ومىرىمىزگە ەنگەن تۇستان باستاپ مەن بۇل پالەكەتتىڭ ءتىلىن مەڭگەرىپ العانىم سونشا, كەرەك نارسەمدى كوزىمدى جۇمىپ وتىرىپ تاۋىپ الام. تابىلعان سوڭ, ونىڭ پروبلەماسى شەشىلدى دەي بەرىڭىز, جاتا-جاستانا كورمەسەم دە, تۇقشيىپ وتىرىپ, كومپيۋتەردىڭ ەكرانىنا ۇڭىلەم عوي. كەي كەزدەردە كينو دا كورگىم كەلەدى. سوسىن ەش قىمسىنباستان كينو دا كورە بەرەم, قىزمەتتەستەر كومپيۋتەرىمنىڭ جانىنا جاقىنداپ, ءبىردەڭە سۇراي باستاسا, كينونى «قايىرىپ» قويا سالۋ ونشا قيىن ەمەس. ونىڭ ۇستىنە زىمىراپ بارا جاتقان ۋاقىت مەن كينو كورمەسەم دە ايالدايتىن ءتۇرى جوق سياقتى.
زاماننىڭ دا, قوعامنىڭ دا تىنىشتىعى مەن سياقتى جايباسار, جالقاۋ, قاعازبەن جۇمىس ىستەگەندى دارەجە كورىپ, ونىڭ اۋىرلىعىنا اندا-ساندا شاعىنىپ قويىپ, ءىس ءجۇزىندە «ءوز الەمىندە» ءومىر سۇرەتىندەرگە وتە ىڭعايلى بولىپ تۇر. مەن جۇمىس ىستەيتىن مەكەمەدە باسشىلاردى قوسپاعاندا تاعى دا جيىرما شاقتى قىز-جىگىت بار. ءبىز ءبىر-ءبىرىمىزدى ۇناتپايمىز. «نە ءۇشىن؟» دەگەندى ويلاپ باس قاتىرىپ, ولارعا جۋىسۋعا, اڭگىمەسىن تىڭداپ, وي بولىسۋگە ەشقاشان ىنتىققان ەمەسپىن. ولار دا ماعان جۋىمايدى. جالپى, ءبىزدىڭ مەكەمەدە ءبىر-بىرىمەن «دو-وس» بولىپ ءجۇرگەن ادام كورمەيسىز. ءبىر-ەكى قۇربى قولتىقتاسىپ السا, ول ءانشەيىن كوز الداۋ ەكەنىنە كۇمانىڭىز بولماسىن. ويتكەنى, ولار بىلاي شىعا بەرە-اق ءبىر-ءبىرىنىڭ سىباعاسىن بەرەدى. تالاي رەت كۋا بولعام. سوسىن ەشكىمگە سەنبەيمىن. ءاسىرەسە ءبىزدىڭ مەكەمەدەگىلەرگە. ءبىر تۇسىنبەيتىنىم – ولار ءوزارا قىرعي-قاباق بولعانىمەن, ايقايلاسىپ, بەت جىرتىسىپ, ءتىپتى كەتىسەردەي ءسوز ايتىپ تا جاتپايدى. كىمنىڭ-كىمدى جاقتىرمايتىنى دا ءتۇسىنىكسىز. ءبىر قاراعاندا, جۇمىستا نەشە ءتۇرلى «كورپوراتيۆكالار» ۇيىمداستىرىلىپ, بي بيلەنىپ, ءان ايتىلىپ, وعان قوسا تالاي ادەمى تىلەكتەر ءوز يەلەرىن تاۋىپ جاتادى. جينالىپ تۇستىك ىشەتىن دە كەزدەرىمىز از ەمەس. بىراق, ءبىر-ءبىرىمىزدى ۇناتپايمىز. بۇل سەزىم ىشكى تۇيسىك ارقىلى ارقايسىسىمىزعا بەرىلەدى. كەيبىرەۋىمىزدىڭ وقۋدى بىتىرگەنىمىزگە ونشاقتى جىل ەندى بولعانىمەن, ءۇنسىزدىك قۋاتىنداعى مول تىلسىم ايقىن اسەر ەتىپ, ءبىر-ءبىرىمىزگە جۋىمايتىنىمىز تاڭ قالارلىق, ارينە. دەسە دە مەن وسى ءۇنسىزدىكتەن قورقام. وسى ۇنسىزدىكتىڭ قۇشاعىنداعى ادام بولمىسىنىڭ ءالسىزدىگىنەن تايسالام. ءالسىز ادام نەشە ءتۇرلى سۇمدىققا بارادى ەمەس پە... ايتسە دە, الگىندە ايتقانداي, ءۇنسىزدىكتى بۇزعان ءالى ەشكىم جوق. ونىڭ سەبەبى – ينتەرنەتتە مە دەيمىن. ءويتكەنى, ءبارىمىز وسى كومپيۋتەرگە شۇقشيىپ وتىرامىز. سىرتتان قاراعان ادام جۇمىس ىستەپ, باسى قاتىپ وتىر دەپ ويلايدى. ولاي ەمەس. اركىم «ءوز الەمىندە» وتىرادى. ودان جالىقپايمىز دا. جۇمىستاعى ءبىر-بىرىمەن جۋىسپايتىن ادامداردىڭ ينتەرنەتتە دوسى كوپ. ماسەلەن, مەنىڭ دە ءوز باسىما جەتەتىن دوستارىم ينتەرنەتتىڭ ىشىنە كىرىپ كەتكەن... كەيبىرەۋلەرىمەن ءبىر مەكتەپتە وقىسام, كەيبىرى ۋنيۆەرسيتەتتەگى جولداستار, ءبىرەۋلەرىن ءتىپتى تانىمايمىن! ءايتەۋىر «دوستىق نيەت» جىبەرگەن سوڭ قابىل الماۋعا ءداتىم بارماي, دوس بولامىن. «ءوز الەمىمنىڭ» تاعى ءبىر جاقسىلىعى – بۇل دوستارمەن ەمىن-ەركىن سويلەسۋگە, شەر تارقاتۋعا مۇمكىندىكتىڭ مولدىعى. «م.اگەنت» ارقىلى الىستاعى دوستاردىڭ ءبارىن جانىڭا كوشىرىپ الۋعا بولادى. بىرگە ءشاي ءىشىپ وتىرعانداي اڭگىمەنى جىبەرەمىز سوسىن. ءبارىن ايتا بەر. ءبارىن جازا بەر. «م.اگەنتتە» ساعان ەشكىمنىڭ شەكتەۋ قويۋعا قاقىسى جوق. بىرەۋلەردى شەگىنە جەتكىزە جامانداپ, الەمدەگى ەڭ تاماشا ادام ءوزىڭ بوپ وتىراتىن كەزدەردى ايتسايشى! سوسىن اگەنتتىڭ تاعى ءبىر ناشار جەرى بار – ەشكىمنىڭ ءوزى دە, ءومىرى دە ساعان قۇپيا ەمەس! كىم تۋرالى بىلگىڭ كەلسە, «ونىڭ الەمىن» اشىپ قارا. كەيبىر ماقتانشاقتار ءوز ءومىرلەرىنىڭ ءار ساتىنەن حابار بەرەتىن سۋرەتتەرىن, ۇناتاتىن قىزدارىن, جىگىتتەرىن, نە ايەل, بالا-شاعاسىنا دەيىن «ءوز الەمىنە» كىرگىزىپ قويادى. ىستەيتىن ءىسىن, ويلايتىن ويىنا دەيىن سوندا جازادى. ولار تۇگىلى ءوزىم دە سوندايمىن. باسىما تاياق بوپ تيەتىن سوزدەردى ەسكەرمەي, حات جازعىشتاي بەرەم. دوستارىم دا قۇرالاقان قالدىرمايدى, ارينە. كەيدە بۇدان دا جالىعىپ, مارعاۋ عانا جاۋاپ حات جازىپ وتىراتىن كەزدەر بولادى, ايتسە دە وعان بولا ەشكىم مەنەن وسى كۇنگە دەيىن سىرت اينالعان ەمەس. بۇل ادامدار مەنىمەن قاشانعا دەيىن دوس بولاتىنىن بىلمەيمىن. بۇل ادامداردىڭ ومىردە بار ەكەنىنە كەيدە كۇماندانۋدى دا شىعارىپپىن. ونىڭ ىشىندە جىگىتتەرگە وكپەلىمىن. باسىم بوس ەكەنى «مەنىڭ الەمىمدە» بادىرايىپ جازۋلى تۇر ەمەس پە؟ نەگە جاقىنىراق تانىسپاسقا؟ كورىكسىز دە ەمەسپىن, ءبىلىمىم دە جوعارى. ارا-تۇرا ينتەرنەت ارقىلى تابىسىپ جاتقانداردى دا ەستىپ جاتامىز...
ينتەرنەتتەگى ەسكى دوستارىم دا ءبىر قاۋىم ەل. مەكتەپتە, ۋنيۆەرسيتەتتە دوس بولعان قىز-جىگىتتەردىڭ مۇندا ەرەسەك تارتقان بەينەلەرىن كورەمىن. شەتىنەن اقىلدى, پىسىقاي. اڭگىمەلەسۋگە بەيىم تۇرادى. «م.اگەنت» ارقىلى ساعاتتاپ ءسويلەسكەنىمىزبەن, ومىردە جۇزبە-ءجۇز جولىقساق, ءبارى باسقاشا بولاتىنىنا يمانىم كامىل. ويتكەنى, كورمەگەلى كوپ جىلدار ءوتكەن. ءبىر-ءبىرىمىزدى قانشا جەردەن جاقىن تارتساق تا, وتكەل بەرمەس وزەننىڭ ءبىر جاعالاۋىندا ولار, ەكىنشىسىندە مەن تۇرعانداي سەزىنەمىن.
«مەنىڭ الەمىم» قىزىققا, جاڭالىققا تولى بولعانىمەن, ونىڭ ءبارى كوز الداۋ, ۋاقىت ءولتىرۋ ەكەنىن مويىندايتىن دا كەزىم بار. اتى بەلگىلى كىسىلەردىڭ ءوزى وسىندا ساعاتتاپ وتىرعاندا, مەن سياقتىلار قىزىقتى باسقا قايدان تاپسىن دەگەن ويدىڭ اسەرىمەن وتىرا بەرەمىز دە. ايتپەسە, كەيدە ءوزىمنىڭ دە وسى ومىردە تىرلىك كەشىپ جۇرگەنىمە كۇمانمەن قارايمىن. ءۇي مەن جۇمىستىڭ اراسىنا قاتىنايتىن قىزىل ءتۇستى 22-ءشى اۆتوبۋس تا, ونداعى بەيتانىس كەيىپكەرلەرىم دە, جالعىز بولمەلى ءپاتەرىم مەن تار كابينەتتىڭ بۇرىشىنداعى ورنىم دا, اندا-ساندا ءبىراز ءسىلكىلەپ الاتىن باستىعىم دا ۆيرتۋالدى الەمنىڭ وبەكتىلەرىندەي. «ءومىر وسى» دەپ ساۋساقپەن شۇقىپ كورسەتسە دە ءبارىبىر سەنبەيتىندەي كۇيگە جەتىپپىن. مۇڭسىز-قامسىز بالالىقتان تەز ءوتىپ, جاستىقتىڭ اۋىلىندا از عانا ات ايالداتىپ, وسى ءبىر سۇلەسوق تىرلىككە تابانداپ قالعاندايمىن. مەن دە, ماعان قاتىستى ادام, زات اتاۋلى دا سونشالىقتى سۇلەسوق. سويلەسكەندە جاي عانا ىممەن ءتۇسىنىسۋ, تاپسىرما بەرسە باس شۇلعۋ, قوستاعانىمدى ءبىلدىرىپ باس يزەي سالۋ, مىنە, ءتىرى ەكەنىمدى وسىدان بىلەمىن. ەشكىمدى ساعىنبايمىن, ىزدەمەيمىن. ءۇمىتىم دە ءالسىز. الىستاعى اتا-انام مەن باۋىرلارىما كەۋدەمدە تەك اياۋشىلىق سەزىمى قالىپتى. سوندا مەن نە ءۇشىن ءومىر سۇرەمىن دەگەن وي كەۋدەمدى ەزبەيدى دەيسىز بە؟ بىراق, ونىڭ جاۋابىن ءبارىبىر تاپپاستاي سالعىرت ءارى سۇلەسوقپىن. مەن ءۇشىن ءبىر عانا جۇبانىش بار – ول ينتەرنەت, ونداعى «مەنىڭ الەمىم»...
