قازاقستان رەسپۋبليكاسىنىڭ پرەزيدەنتى جوعارى مارتەبەلى ن.ءا.نازارباەۆقا
ءسىزدىڭ قازاقستان رەسپۋبليكاسىنىڭ پرەزيدەنتى قىزمەتىنە قايتا سايلانۋىڭىزعا وراي شىن ءجۇرەكتەن شىققان قۇتتىقتاۋىمدى قابىل الىڭىز.
سايلاۋداعى بۇلتارتپايتىن جەڭىسىڭىز ءسىزدىڭ ءوز حالقىڭىزدىڭ شىنايى كوشباسشىسى رەتىندەگى لايىقتى ابىرويىڭىزدى تياناقتاي ءتۇسەدى. دوستاس قازاقستاننىڭ كەيىنگى جىلداردا الەۋمەتتىك-ەكونوميكالىق سالادا, مەملەكەتتىك قۇرىلىستا, حالىقارالىق ارەنادا قول جەتكىزگەن ەلەۋلى تابىستارى سىزگە جالپىۇلتتىق قولداۋ مەن سەنىمدى قامتاماسىز ەتتى.
ءسىزدىڭ رەسەي-قازاقستان اراسىنداعى تاتۋ كورشىلىك پەن ءوزارا قۇرمەتتىڭ بەرىك داستۇرلەرىنە ارقا سۇيەيتىن ستراتەگيالىق ءارىپتەستىگىن ودان ءارى تەرەڭدەتۋ ماسەلەلەرىنە ۇدايى نازار اۋداراتىنىڭىزدى جوعارى باعالايمىن. ەكى جاقتىڭ ەرىك-جىگەرىنىڭ ارقاسىندا كوپ قىرلى ءوزارا ىقپالداستىق الداعى كەزدە دە سەرپىندى دامي بەرەتىنىنە, جاڭا اۋقىمدى جوبالارمەن باي تۇسەتىنىنە كۇماندانبايمىن.
قازاقستاننىڭ وڭىرلىك ىقپالداستىق ىنتىماقتاستىقتى دامىتۋعا تاباندى باعىت ۇستاۋىن بارشا مويىندايدى. ءبىزدىڭ ەلدەرىمىزدىڭ كەدەن وداعىنىڭ جۇمىسىن قامتاماسىز ەتۋ جانە ەۋرازەق اياسىندا ءبىرتۇتاس ەكونوميكالىق كەڭىستىك قالىپتاستىرۋ, تمد, ۇقشۇ جانە شىۇ بويىنشا بايلانىستاردى نىعايتۋ ماسەلەلەرىندەگى جۇمىسىن تىعىز ۇيلەستىرە جۇرگىزۋى ءوزىنىڭ تيىمدىلىگىن تالاي رەت دالەلدەگەن. ءبىزدىڭ بىرلەسكەن جۇمىسىمىزدى ىقپالداستىقتىڭ جاڭا كەزەڭىنە – ەۋرازيالىق ەكونوميكالىق وداققا اۋىسۋ بويىنشا جالعاستىرۋ ماڭىزدى.
رەسەي-قازاقستان وداقتاستىق قاتىناستارىنىڭ قۋاتتى الەۋەتى الداعى كەزدە دە ءبىزدىڭ ەلدەر حالىقتارىنىڭ, تۇراقتى دامۋ مەن ەۋرازيالىق كەڭىستىكتە قاۋىپسىزدىكتى قامتاماسىز ەتۋ مۇددەلەرى تۇرعىسىنان تابىستى جۇزەگە اسا بەرەتىنىنە سەنەمىن.
مىقتى دەنساۋلىق جانە تىڭ تابىستار تىلەپ,
د.مەدۆەدەۆ.
ماسكەۋ قالاسى, كرەمل
2011 جىلعى 4 ءساۋىر.
قازاقستان رەسپۋبليكاسىنىڭ پرەزيدەنتى جوعارى مارتەبەلى ن.ءا.نازارباەۆقا
ءسىزدىڭ قازاقستان رەسپۋبليكاسى پرەزيدەنتى قىزمەتىنە قايتا سايلانۋىڭىزعا بايلانىستى سىزگە شىن ءجۇرەكتەن شىققان قۇتتىقتاۋىم مەن ەڭ ىزگى تىلەكتەرىمدى جولدايمىن.
ءسىز, جوعارى ءمارتەبەلى, مەملەكەت تىزگىنىن قولعا العان ۋاقىتتان بەرى ەلدە قوعامدىق تۇراقتىلىق پەن ەكونوميكانىڭ جوعارى ءوسۋ سەرپىنى ساقتالىپ كەلەدى, حالىقتىڭ ءال-اۋقاتى ۇدايى ارتۋدا, قازاقستاننىڭ حالىقارالىق جاعدايى اناعۇرلىم نىعايۋدا. ءسىزدىڭ باسشىلىعىڭىزبەن قازاقستان حالقى مەملەكەتتى ەڭسەلەنتۋ مەن دامىتۋ ىسىندە جاڭا, اناعۇرلىم ماڭىزدى تابىستارعا قول جەتكىزەتىنىنە سەنەمىن.
قىتاي مەن قازاقستان تاتۋ كورشىلەر, جاقسى دوستار مەن سەنىمدى ارىپتەستەر بولىپ تابىلادى. ديپلوماتيالىق قاتىناستار ورناتىلعالى بەرگى 19 جىلدىڭ ىشىندە ءبىزدىڭ ەلدەرىمىزدىڭ اراسىنداعى قاتىناستار جاعىمدى ارنادا دامىپ كەلەدى. ساياسي سالادا ءوزارا قۇرمەت پەن ءوزارا سەنىمنىڭ جوعارى دەڭگەيى, ال ەكونوميكالىق سالادا ءوزارا تيىمدىلىك پەن بىرلەسە دامۋعا نەگىزدەلگەن ىنتىماقتاستىق جولعا قويىلعان. الماسۋ مەن ىنتىماقتاستىق ءارتۇرلى سالالاردا بوي كورسەتۋدە, كوپجاقتى ايادا تىعىز ءوزارا ىقپالداستىق پەن ۇيلەستىرۋ قولداۋ تابۋدا. قىتاي جاعى ءبىزدىڭ ەلدەرىمىزدىڭ اراسىنداعى كوپتەن قالىپتاسقان دوستىق قاتىناستاردى جوعارى باعالايدى. مەن سىزبەن بىرلەسە وتىرىپ ستراتەگيالىق ارىپتەستىكتىڭ قىتاي-قازاقستان قاتىناستارىن ءبىزدىڭ ەلدەرىمىز بەن حالىقتارىمىزدىڭ يگىلىگى ءۇشىن مۇنان دا جوعارى دەڭگەيگە كوتەرۋگە تالماي كۇش-جىگەر جۇمساۋعا دايىنمىن.
ءسىزدى وزىڭىزگە ىڭعايلى ۋاقىتتا قىتايعا دەمالىسقا شاقىرۋدى ءمارتەبە كورەمىن.
جوعارى مارتەبەلى, سىزگە مىقتى دەنساۋلىق جانە جۇمىستا تابىس تىلەيمىن.
قازاقستان رەسپۋبليكاسىنا قۋاتتىلىق پەن وركەندەۋ, ەل حالقىنا باقىت پەن يگىلىك تىلەيمىن.
قىتاي حالىق رەسپۋبليكاسىنىڭ توراعاسى
حۋ تسزينتاو
2011 جىلعى 4 ءساۋىر,
پەكين قالاسى.
*** مەملەكەت باسشىسى نۇرسۇلتان نازارباەۆتى پرەزيدەنتتىك سايلاۋداعى سەنىمدى جەڭىسىمەن فرانتسۋز رەسپۋبليكاسىنىڭ پرەزيدەنتى نيكوليا ساركوزي قۇتتىقتادى.
جەدەلحات ماتىنىندە بىلاي دەلىنگەن:
مەن ءسىزدى قازاقستان رەسپۋبليكاسىنىڭ پرەزيدەنتى قىزمەتىنە قايتا سايلانۋىڭىزبەن شىن جۇرەكتەن قۇتتىقتايمىن.
ءسىزدىڭ وكىلەتتىگىڭىزدى 2020 جىلعا دەيىن ۇزارتۋ ماقساتىن كوزدەگەن رەفەرەندۋم جوباسىنا قارسىلىق بىلدىرگەن كونستيتۋتسيالىق كەڭەستىڭ پىكىرىن ەسكەرە وتىرىپ, ءسىز وتكەن جىلى قازاقستان ۇلكەن تابىسپەن توراعالىق ەتكەن ەقىۇ-نىڭ قۇندىلىقتارىن ۇستاناتىنىڭىزدى كورسەتتىڭىز.
مەن ءسىزدىڭ جاڭا قىزمەتتە ءوز جۇمىسىڭىزدىڭ باسىم باعىتىنىڭ ءبىرى ساياسي رەفورماعا جاڭا قۋاتتى سەرپىلىس بەرۋ بولىپ تابىلاتىنىن بىلەمىن. بۇگىنگى مازاسىز الەمدە رەفورما ءبىزدىڭ حالىقتارىمىزدىڭ ءۇمىتى مەن كوڭىلىن قاناعاتتاندىرۋ ءۇشىن قاجەت ەكەنىن انىق تۇسىنەمىز.
ءوز تاراپىمنان مەن قازاقستاننىڭ الەمدىك ارەنادا ءوسىپ كەلە جاتقان تانىمالدىعىن نازارىما الا وتىرىپ, وسى تاقىرىپقا جانە وزگە دە ماڭىزدى حالىقارالىق تاقىرىپتارعا ارنالعان ۇنقاتىسۋدى جالعاستىرۋعا قۋانىشتى بولعان بولار ەدىم. سونداي-اق ءسىزدىڭ ەلىڭىز بيىلعى جىلى يسلام كونفەرەنتسياسى ۇيىمىنا توراعالىق ەتەتىنى سوزىمە مىسال بولا الادى.
بيىلعى جىلى ءۇلكەن جيىرمالىققا ءتوراعالىق ەتە وتىرىپ, ءوز باسىم ءبىز تالقىلاۋعا ءتيىستى ماڭىزدى ماسەلەلەر بويىنشا قازاقستاننىڭ ءۇنىن ەستىگىم كەلەدى. اتاپ ايتقاندا, بۇل قارجىلىق دامۋ ماسەلەسى جانە حالىقارالىق ۆاليۋتا جۇيەسى, سونداي-اق شيكىزات رىنوگى. فرانتسيا سونىمەن بىرگە قازاقستان مەن ەۋروپالىق وداق اراسىنداعى سەرىكتەستىكتى كۇشەيتۋ جونىندەگى جاڭا كەلىسىمنىڭ قورىتىندىسىن قولداۋعا دايىن.
ءوزىڭىز بىلەتىندەي, مەن ءبىزدىڭ ەلدەرىمىزدى بىرىكتىرۋشى, ستراتەگيالىق سەرىكتەستىك تۋرالى كەلىسىم اياسىندا ءبىزدىڭ ەكى جاقتى قارىم-قاتىناستارىمىزدى دامىتۋعا وتە ۇلكەن ءمان بەرەمىن. جۇزەگە اسىرۋ ساتىسىنداعى نەمەسە تالقىلاۋداعى بارلىق ماڭىزدى جوبالار, ءبىر ورتاق ماقساتقا – ءسىز باستاپ جۇزەگە اسىرا باستاعان ماڭىزدى يندۋستريالاندىرۋ مەن يننوۆاتسيا باعدارلاماسىنا بىرىكتىرىلگەن.
پرەزيدەنت مىرزا, سىزدەن وزىڭىزگە دەگەن زور قۇرمەتىمدى قابىل الۋىڭىزدى وتىنەمىن.
فرانتسۋز رەسپۋبليكاسىنىڭ پرەزيدەنتى
نيكوليا ساركوزي.
