2018 جىلعا دەيىن قازاقستاندا جەكەشەلەندىرۋ اياقتالۋى كەرەك - ساعىنتاەۆ

2018 جىلدىڭ سوڭىنا دەيىن قازاقستاندا جەكەشەلەندىرىلمەگەن ءبىر دە ءبىر نىسان قالماۋى كەرەك. بۇگىن ۇكىمەت وتىرىسىندا پرەمەر-مينيستر باقىتجان ساعىنتاەۆ قارجى مينيسترلىگىنە وسىنداي مىندەت جۇكتەدى, دەپ حابارلايدى قازاقپارات. «جەكەشەلەندىرۋ ماسەلەسىنە توقتالساق, ءبىز 2020 جىلعا دەيىن جەكەشەلەندىرۋگە جاتاتىن نىسانداردىڭ ءتىزىمىن انىقتاعان بولاتىنبىز. پرەزيدەنت وسى تىزىمدەگى كاسىپورىندار 2018 جىلدىڭ سوڭىنا دەيىن جەكەشەلەندىرۋگە ءوتسىن دەگەن تاپسىرما بەردى. سوندىقتان, اقپان ايىنىڭ سوڭىنا دەيىن جەكەشەلەندىرىلەتىن ءاربىر نىساننىڭ مەرزىمىن قايتا قاراپ شىعۋ كەرەك. بۇل اسىرەسە, جەكەشەلەندىرىلەتىن نىسانداردىڭ 60 پايىزىنا يە اكىمدەرگە قاتىستى»,-دەگەن ۇكىمەت باسشىسى قارجى مينيسترلىگىنە وسى ماسەلەنى قاتاڭ باقىلاۋعا الۋ مىندەتىن جۇكتەدى. «سوندىقتان, قارجى مينيسترلىگىنە جەكەشەلەندىرۋ پروتسەسىن قاتاڭ باقىلاۋعا الۋدى تاپسىرامىن. 2018 جىلدىڭ سوڭىنا دەيىن, IPO شىعاراتىن نىسانداردى ەسەپكە الماعاندا, جەكەشەلەندىرىلمەگەن نىسان قالماۋى كەرەك»,-دەدى ساعىنتاەۆ.