ۇكىمەت پەن ۇقك "قازاقستان كيبەرقالقانى" جۇيەسىن قالىپتاستىرادى

ەلباسى قازاقستان حالقىنا جولداۋىندا ۇكىمەت پەن ۇلتتىق قاۋىپسىزدىك كوميتەتىنە "قازاقستان كيبەرقالقانى" جۇيەسىن قالىپتاستىرۋ شارالارىن قابىلداۋدى تاپسىردى. پرەزيدەنتتىڭ ايتۋىنشا, كيبەرقىلمىسپەن كۇرەستىڭ وزەكتىلىگى بارعان سايىن ارتا تۇسۋدە. "قاۋىپسىزدىك احۋالى قۋاتتى جانە ارەكەت ەتە الاتىن مەملەكەتتىڭ ولشەمىنە اينالىپ كەلەدى. قازىرگى زاماندا ادامزات تەرروريزمنىڭ بەلەڭ الۋىمەن بەتپە-بەت كەلىپ وتىر. بۇل رەتتە دەسترۋكتيۆتى كۇشتەردى قارجىلاندىراتىندارعا, شەتەلدىك تەرروريستىك ۇيىمدارمەن بايلانىس جاسايتىندارعا قارسى كۇرەس جۇرگىزۋ ءىسى نەگىزگى ماسەلە بولىپ سانالادى", - دەلىنگەن جولداۋدا. مۇنىمەن قاتار, ءدىني ەكسترەميزمدى ناسيحاتتاۋدىڭ الدىن الۋ, اسىرەسە ينتەرنەت پەن الەۋمەتتىك جەلىدە ونىڭ جولىن كەسۋ جۇمىسىن جۇرگىزۋ كەرەك ەكەنى ايتىلادى. "قوعامدا, اسىرەسە, ءدىني قارىم-قاتىناس سالاسىنداعى راديكالدى كوزقاراسقا بايلانىستى كەز كەلگەن ارەكەتكە "مۇلدە توزبەۋشىلىكتى" قالىپتاستىرۋ كەرەك. باس بوستاندىعىنان ايىرۋ ورىندارىندا سوتتالعانداردى تەولوگيالىق تۇرعىدان ساۋاتتاندىرۋ قىزمەتتەرىنىڭ ماقساتتى جۇمىسى ۇيىمداستىرىلۋعا ءتيىس. وسكەلەڭ ۇرپاقتى رۋحاني-ادامگەرشىلىك رۋحىندا تاربيەلەۋ ءۇشىن قوسىمشا قادامدار جاساۋ كەرەك", - دەدى ەلباسى. سونىمەن قاتار ول بۇل ىسكە مەملەكەتتىك ەمەس سەكتوردى جانە ءدىني بىرلەستىكتەردى بەلسەندى تۇردە تارتۋ قاجەت ەكەنىن ايتتى. وسى شارانىڭ بارلىعى ەلباسىنىڭ تاپسىرماسى بويىنشا ازىرلەنىپ جاتقان, 2017-2020 جىلدارعا ارنالعان ءدىني ەكسترەميزم مەن تەرروريزمگە قارسى ارەكەت جونىندەگى مەملەكەتتىك باعدارلامادا ەسكەرىلۋى كەرەك.