بيزنەس جۇرگىزۋدى جەڭىلدەتۋ جونىندە وڭىرلەر مەن قالالار رەيتينگى ەنگىزىلەدى

ءبىزدىڭ ستراتەگيالىق ماقساتىمىزدىڭ ءبىرى - ەلدىڭ ىشكى جالپى ونىمىندەگى شاعىن جانە ورتا بيزنەستىڭ ۇلەسى 2050 جىلعا قاراي كەم دەگەندە 50 پايىز بولۋىن قامتاماسىز ەتۋ. بۇل تۋرالى بۇگىن جاريالانعان پرەزيدەنت نۇرسۇلتان نازارباەۆتىڭ جولداۋىندا ايتىلدى. «بۇل - وتە ءورشىل ماقسات, بىراق وعان قول جەتكىزۋگە بولادى. ونى ورىنداۋ ءۇشىن قازىرگى كەزەڭدە مىناداي قادامدار جاسالۋى قاجەت. بىرىنشىدەن, مەنىڭ تاپسىرمام بويىنشا ۇكىمەت بيىلدان باستاپ ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىن ىسكە اسىرۋعا كىرىسىپ كەتتى. بۇدان بىلاي قازاقستان ازاماتتارى ءوز بيزنەسىن جۇرگىزۋ ءۇشىن اۋىلدا دا, قالادا دا 16 ميلليون تەڭگەگە دەيىن شاعىن نەسيە الا الادى. شاعىن نەسيە بەرۋ اياسىن كەڭەيتىپ, كاسىپكەرلەرگە كەپىلدىك جاساۋ جانە قىزمەت كورسەتۋ تەتىكتەرىن بەلسەندى پايدالانۋ كەرەك. بۇل شارالاردى بيزنەس جۇرگىزۋ جانە قارجىلىق ساۋاتتىلىققا ۇيرەتۋ ءىسىن ۇيىمداستىرۋمەن قاتار اتقارۋ كەرەك», - دەپ تاپسىردى ەلباسى. پرەزيدەنتتىڭ ايتۋىنشا, قازاقستاننىڭ ءار ءوڭىرى جاپپاي كاسىپكەرلىكتى, سونىڭ ىشىندە وتباسىلىق كاسىپكەرلىكتى دامىتۋ باعىتىندا كەشەندى شارالار ۇسىنۋى كەرەك. جاڭادان اشىلعان جۇمىس ورىندارىنىڭ سانى - بۇرىنعىشا ۇكىمەت پەن اكىمدەر قىزمەتىنىڭ تيىمدىلىگىن باعالاۋدىڭ نەگىزگى كريتەريىنىڭ ءبىرى بولادى. «ۇكىمەت «اتامەكەن» ۇلتتىق كاسىپكەرلەر پالاتاسىمەن (ۇكپ) بىرلەسىپ, بيزنەستىڭ بارلىق شىعىنىن جاپپاي ازايتۋ جونىندە شارالار قابىلداۋى قاجەت. بۇل اسىرەسە ەنەرگەتيكا, كولىك جانە لوگيستيكا, سونداي-اق, تۇرعىن ءۇي-كوممۋنالدىق شارۋاشىلىق سالالارىنداعى قىزمەت كورسەتۋ قۇنىنا قاتىستى. مەملەكەتتىك قىزمەتتەر كورسەتۋ ۇدەرىسى مەيلىنشە وڭتايلاندىرىلۋعا ءتيىس. قۇجاتتاردىڭ مەرزىمى مەن تىزبەسىن قىسقارتىپ, قايتالاناتىن راسىمدەردى جويۋ كەرەك. بۇل ورايدا ادامنىڭ ءوزىنىڭ بارۋىن قاجەتسىنبەيتىن تولىق ەلەكتروندىق فورماتقا كوشىرۋ كەرەك. سونداي-اق, بيزنەستىڭ قازىرگى قولدانىستاعى رەتتەۋشىلىك جۇكتەمەسى ءوسىمنىڭ جاڭا مودەلىن جاساۋ مىندەتىمەن ۇيلەسپەيدى. ۇكىمەت پەن اكىمدەرگە بيىلعى 1 شىلدەگە دەيىن بيزنەستى قايتا رەتتەۋ جونىندەگى جۇيەلى شارالار ازىرلەۋ مىندەتىن جۇكتەيمىن», - دەپ تاپسىردى ەلباسى. ن. نازارباەۆتىڭ ايتۋىنشا, اكىمدەر ۇكىمەتپەن بىرلەسىپ, دۇنيەجۇزىلىك بانك رەيتينگى نەگىزىندە وڭىرلەردە بيزنەس جۇرگىزۋ ءۇشىن جاعدايدى جاقسارتۋ جونىندە ناقتى جوسپارلار ازىرلەۋ كەرەك. وسى ورايدا ەلىمىزدە بيزنەس جۇرگىزۋدى جەڭىلدەتۋ جونىنەن وڭىرلەر مەن قالالار رەيتينگىن ەنگىزۋ ماڭىزدى. بۇل تۇرعىدا ۇزدىكتەر ءۇشىن ارناۋلى سىيلىق تاعايىندالماق. ول جىلىنا ءبىر رەت يندۋستريالاندىرۋ كۇنىندە تابىس ەتىلەدى.