نۇرسۇلتان نازارباەۆ: مەملەكەتتىڭ ەكونوميكاعا قاتىسىن ازايتۋىمىز كەرەك

بۇگىنگى ارنايى مالىمدەمەسىندە مەملەكەت باسشىسى جاڭا ەكونوميكالىق ساياسات پەن ساياسي رەفورمالاردىڭ ءبىر-ءبىرىن تولىقتىراتىنىن ايتتى. «بيزنەس-ورتانى كەڭەيتۋ جانە بۇقارالىق كاسىپكەرلىككە قاجەت جاعدايدى جاقسارتۋ اسا ماڭىزدى. ول ءۇشىن مەملەكەتتىڭ ەكونوميكاعا قاتىسۋىن ازايتۋ كەرەك. دامۋدىڭ كەلەسى ۇلگىسىندەگى بۋىنداردىڭ ءبىرى – اگروونەركاسىپ كەشەنى, كولىك جانە لوگيستيكا. تۇرعىن-ءۇي رىنوگىن دامىتۋ, مەملەكەتتىك قولداۋ شارتتارى جايلى ءوز الدىنا بولەك ايتىلاتىن بولادى. ماكروەكونوميكالىق ساياسات دا جەتىلدىرۋدى قاجەت ەتەدى. ۇكىمەتكە «ءۇشىنشى جاڭعىرۋ» بويىنشا 2025 جىلعا دەيىنگى دامۋدىڭ ستراتەگيالىق جوسپارىن جاساۋ تاپسىرىلادى. ول «قازاقستاننىڭ ۇلتتىق تەحنولوگيالىق باستاماسى» دەپ اتالادى جانە قازىرگى زاماننىڭ قاتەرلەرىنە جاۋابىمىز بولادى. ۇكىمەتتىڭ الدىنا ماڭىزدى ماقسات-مىندەتتەر قويىلادى. ولاردى ورىنداۋعا قاجەتتى رەسۋرستار مەن مۇمكىندىكتەردىڭ ءبارى بىزدە بار. وسىنىڭ بارلىعى ۇزاق مەرزىمدى پرەسپەكتيۆادا ەكونوميكانى تۇراقتى دامىتۋعا جاعداي جاسايتىن بولادى. جاقىندا مەملەكەتتى ساياسي جاڭعىرۋ جوباسى جاريالاندى. بۇل ەكى باستاما ءبىر-ءبىرىن تولىقتىرىپ, ەلدىڭ ۇزاق مەرزىمدى دامۋىن قامتاماسىز ەتەدى» دەدى مەملەكەت باسشىسى. "وسى ارقىلى ءبىز ستراتەگيا-2050-ءدىڭ نەگىزگى ماقساتىنا قول جەتكىزىپ, الەمنىڭ ەڭ دامىعان وتىز ەلىنىڭ قاتارىنا كىرە الامىز. قازاقستاننىڭ تەحنولوگيالىق جاڭعىرۋى تۋرالى باسىم باعىتتار وسىنداي. بولاشاق دامۋ مەن مەملەكەتتىڭ گۇلدەنۋىنە باعىتتالعان بۇل جولدى قازاقستان حالقى قولدايدى دەپ سەنەمىن. الداعى ۇلكەن جۇمىسىمىزدا بارلىعىمىزعا ساتتىلىك تىلەيمىن", دەپ اياقتادى ءسوزىن نۇرسۇلتان نازارباەۆ.