پرەزيدەنت ارنايى مالىمدەمە جاسادى

مەملەكەت باسشىسى نۇرسۇلتان نازارباەۆ ارنايى مالىمدەمە جاساپ, ەرتەڭ جاريا بولاتىن جولداۋدىڭ نەگىزگى تاقىرىبى تۋرالى ايتتى. «قۇرمەتتى قازاقستاندىقتار! قاسيەتتى وتانىمىز تاۋەلسىزدىكتىڭ ءۇشىنشى مۇشەلىنە اياق باستى. قازاقستان قىسقا مەرزىم ىشىندە كەمەلدەنىپ, قۋاتى تولىسقان ساقا مەملەكەتكە اينالدى. شيرەك عاسىردا ەلىمىزدى تۇبەگەيلى وزگەرتكەن ەكى جاڭعىرۋدى ىسكە اسىردىق. الدىمەن نارىقتىق ەكونوميكا قاعيدالارىنا نەگىزدەلگەن مۇلدەم جاڭا سيپاتتى مەملەكەت قۇردىق. ەكىنشىدەن, قازاقستان-2030 ستراتەگياسىن جۇزەگە اسىرىپ, اسقاق استانامىزدى سالدىق.  ال قازىر كەزەكتى ماڭىزدى بەلەستىڭ الدىندا تۇرمىز. ەرتەڭ قاڭتاردىڭ 31-ىندە مەنىڭ حالىققا جولداۋىم اقپارات قۇرالدارىندا جاريالانادى. مەن بيىلعى جولداۋىمدا ەل دامۋىنا تىڭ قارقىن بەرەتىن جاڭا باعداردى ۇسىنباقپىن. باستى تاقىرىپ «قازاقستاننىڭ ءۇشىنشى جاڭعىرۋى. ول ەلىمىزدىڭ ەكونوميكالىق دامۋىنىڭ يننوۆاتسيالىق وزەگىنە اينالىپ, باسەكەگە قابىلەتىن ارتتىرا ءتۇسۋى ءتيىس. ءبىز ساندىق تەحنولوگيالارعا نەگىزدەلگەن بولاشاعى زور باعىتتارعا ايرىقشا ءمان بەرەتىن بولامىز. ال ءبىلىم بەرۋ, دەنساۋلىق ساقتاۋ, حالىقتى الەۋمەتتىك قورعاۋ جانە باسپانامەن قامتاماسىز ەتۋ سياقتى ماڭىزدى سالالار قاشاندا باستى نازاردا قالا بەرمەك» دەدى نۇرسۇلتان نازارباەۆ. ەلباسى زاڭعا سايكەس, پرەزيدەنتتىڭ جولداۋدى اۋىزشا جانە جازباشا تۇردە جاساۋىنا بولاتىنىن, ءوزىنىڭ بيىل ەكىنشى جولىن تاڭداعانىن ايتتى.