"دامۋ" قورى ەڭ كوپ نەسيە بەرگەن بانكتىڭ ۇزدىك مەنەدجەرلەرىن ماراپاتتادى

بايقاۋ 2016 جىلدىڭ قورىتىندى كورسەتكىشتەرى بويىنشا وتكىزىلدى. وعان قازاقستاننىڭ بارلىق وبلىسى مەن الماتى, استانا قالالارىنان 436 قىزمەتكەر جانە «دامۋ» قورىنىڭ ايماقتىق فيليالدارىنان 83 مەنەدجەر قاتىستى. «بيىلعى ءىىى بايقاۋدىڭ اياسى كەڭەيگەن. باعالاۋ بارىسىندا نەسيەنىڭ قارجى كوزى دە ەسەپكە الىندى. ياعني, بۇل «دامۋ» قورى بولگەن قارجى ما, الدە بانكتىڭ بايقاۋعا قاتىسۋ بالىن كوتەرە تۇسەتىن ءوز قارجىسى ما دەگەن تۇستار دا ەسكەرىلدى. ءبىز كەپىلدىك بەرۋدە جىلدام شەشىم شىعارۋ, اۋىلدىق جەرلەردەگى جوبالارعا قولداۋ, «دامۋ» قورىنىڭ كەپىلدىگىمەن بانكتە جەكە قىزمەت ءتۇرىن قۇرۋ سەكىلدى وپتسيالاردى دا ەنگىزدىك. بۇل جاعدايدا بانك ءوز كليەنتتەرى ءۇشىن ءوز قىزمەت ءتۇرىن ەنگىزۋى كەرەك. بىراق «دامۋ» قورىنىڭ كەپىلدەمە بەرۋ قۇرالىن پايدالانۋ مىندەتتى. بۇعان دەيىنگى بايقاۋلاردا كەپىلدەمە بەرۋ شارتى سانى مەن بايقاۋعا قاتىسۋشىنىڭ قورجىنىندا قايتپاي قالعان نەسيەلەر بولماۋى باستى تالاپ بولاتىن», - دەيدى «دامۋ» قورى باسقارما توراعاسىنىڭ مىندەتىن اتقارۋشى ميراس بەيسەمباەۆ. 2016 جىلى «دامۋ» قورى 1 182 جوباعا كەپىلدىك بەرگەن. ولاردىڭ 951-ىمەن شارتقا قول قويىلعان. 2016 جىلى «دامۋ» قورىنىڭ كەپىلدەمەسىمەن بەرىلگەن نەسيە كولەمى 26,9 ملرد تەڭگەنى قۇراسا, كەپىلدەمە سوماسى 11,9 ملرد تەڭگە بولدى.