استانادا «قاڭتارلىق سپرينت» اۋقىمدى شاڭعى جارىسى ءوتتى

استانادا يلينكا اۋدانىندا ورنالاسقان «جاسىل بەلدەۋدىڭ» سوقپاق جولدار تراسساسىنىڭ بازاسىندا 28-ءشى دۇنيەجۇزىلىك قىسقى ۋنيۆەرسيادا اياسىندا «قاڭتارلىق سپرينت» شاڭعى جارىسى ءوتتى, دەپ حابارلايدى قالا اكىمدىگىنىڭ سايتى. شاراعا 100-دەن استام ادام قاتىستى. جارىستىڭ سالتاناتتى اشىلۋ راسىمىندە ءداستۇرلى سپورتشىلار شەرۋى ءوتتى. ۇيىمداستىرۋشىلار مەن تورەشىلەر قۇرامىنا ءىرى سپورتتىق-بۇقارالىق شارالاردى وتكىزۋ بويىنشا تاجىريبەسى مول جەتەكشى سپورتشىلار كىردى. سولاردىڭ ءبىرى – شاڭعى جارىسىنان قر ەڭبەك سىڭىرگەن جاتتىقتىرۋشىسى, جوعارى ساناتتاعى تورەشى ستاروستين يۋري ميحايلوۆيچ. «بۇل شارانىڭ ەرەكشەلىگى – ۋنيۆەرسيادا قارساڭىندا وتكىزىلىپ جاتقانىندا. جارىسقا قاتىسۋشىلار 9 جاس ساناتىندا ونەر كورسەتەدى, سونىڭ ىشىندە ۇلدار مەن قىزدار, ەرلەر مەن ايەلدەر, 40-تان اسقان ارداگەرلەر دە بار. بۇل ءداستۇرلى شارا, بۇرىن «بۇرقاسىن» دەپ اتالعان. بۇگىندە جاڭا ورىن – ۆەلوجولدى يگەرىپ جاتىرمىز. قىستا ارنايى شاڭعى جولى دايىندالادى. جىل سايىن تۇرعىنداردىڭ قىزىعۋشىلىعى ارتىپ كەلەدى. شاڭعى جارىسىن ودان ءارى دامىتۋعا بولادى, سالاۋاتتى ءومىر سالتىن دارىپتەپ, قالا تۇرعىندارى مەن قوناقتارىنا لايىقتى دەمالىس ۇسىنامىز», – دەيدى يۋري ستاروستين. «قاڭتارلىق سپرينت» باعدارلاماسىندا قاتىسۋشىلار جاس ساناتىنا قاراي ءتۇرلى قاشىقتىقتى باعىندىرادى. جارىس قورىتىندىسى بويىنشا جەڭىمپازدار باعالى سىيلىقتارمەن ماراپاتتالدى.