اقتاۋدا كاسىپوداق توراعاسى قاماۋعا الىندى

اقتاۋدا قاراجات جىمقىردى دەگەن كۇدىكپەن كاسىپوداق توراعاسى ۇستالدى, دەپ حابارلايدى tengrinews.kz OilConstructionCompany كومپانياسىنىڭ كاسىپوداق توراعاسى ءامين ەلەۋسىنوۆكە قاراجات جىمقىردى دەگەن كۇدىك كەلتىرىلىپ وتىر. قازىرگى ۋاقىتتا ول ۋاقىتشا ۇستاۋ يزولياتورىنا قامالدى. «ءامين ەلەۋسىنوۆتىڭ كاسىپشىلەر وداعىنداعى «وسس» جشس جۇمىسشىلارىنىڭ اقشاسىن جىمقىرۋى بويىنشا قوزعالعان قىلمىستىق ءىس تەرگەلىپ جاتىر. قاجەتتى سوت ساراپتامالارى جۇرگىزىلدى. قازىرگى ۋاقىتتا ەلەۋسىنوۆتىڭ كىناسىن دالەلدەيتىن ايعاقتار جيناستىرىلىپ جاتىر», – دەدى ماڭعىستاۋ وبلىستىق ءىىد باسشىسىنىڭ ورىنباسارى الدىرزا قۋانىشكەرەەۆ. سونداي-اق ول كۇدىكتىنىڭ 7 جىلدان 12 جىلعا دەيىن باس بوستاندىعىنان ايىرىلۋى مۇمكىن ەكەنىن جەتكىزدى. بۇدان بولەك, نۇربەك قۇشاقپاەۆقا قاتىستى سوتقا دەيىنگى تەرگەۋ جۇمىستارى جۇرگىزىلىپ جاتىر. پوليتسەيلەردىڭ ايتۋىنشا, ول مۇنايشىلاردى نارازىلىق شارالارىن ۇيىمداستىرۋعا شاقىرعان. «ىشكى ىستەر ورگاندارى قۇشاقپاەۆ نۇربەككە قاتىستى قر قىلمىستىق كودەكسىنىڭ 408-بابى بويىنشا سوتقا دەيىنگى تەرگەۋ جۇمىستارىن باستادى. 2017 جىلدىڭ 20 قاڭتارىندا قۇشاقپاەۆ قر قىلمىستىق-پروتسەسسۋالدىق كودەكسىنىڭ 128-بابى بويىنشا ۇستالىپ, ۋاقىتشا ۇستاۋ يزولياتورىنا قامالدى. قازىرگى ۋاقىتتا ونىڭ كىناسىن دالەلدەيتىن ايعاقتار جيناستىرىلىپ جاتىر», – دەپ مالىمدەدى ا.قۋانىشكەرەەۆ.